Hiziqeeli 3:1-27
3 Hakkiinni togo yiie: “Manchi beetto, albakkiinni nooha* iti. Tenne xaaxo itte kaꞌe, hadhe Israeelete minira coyiꞌri.”
2 Anino afoo faꞌnummo; isino tenne xaaxo itammora uyie.
3 Hakkiinni togo yiie: “Manchi beetto, tenne eemmohe xaaxo itte, godowa wonshiꞌri.” Hakko daafira ita hanafummo; iseno afiiꞌyara malawimma coommitue.
4 Isino togo yiie: “Manchi beetto, Israeelete minira marte, qaaleꞌya kulinsa.
5 Korkaatuno soyanni noommohehu leellannokki afoo woy anfoonnikki qaale coyiꞌranno manniwa ikkikkinni Israeelete miniraati.
6 Soyanni noommohehu leellannokki afoo woy anfoonnikki qaale coyiꞌrannohu batinyu manniwa, woy coydhannori leellannohekki manniwa diꞌꞌikkino. Insawa soyommoheha ikkoommero, insa macciishshitannohe.
7 Israeelete mini kayinni ati yaattore macciishsha dihasiꞌranno; korkaatuno insa ani coyiꞌreemmore macciishsha dihasidhanno. Israeelete mini baalunku mokkookkootahonna wodana dunduruꞌmitinoreeti.
8 Kuneeti! Ate insa gede kaajjadonna mittoreno bashshi assattokkiha assoommohe.*
9 Qoleno almaazete gedeeha assoommohe; reeqqichotennino roore kaajjado assoommohe. Finqila mine ikkitino daafira, insa waajjitooti; albansa laꞌeno massooti.”
10 Isi lede togo yiie: “Manchi beetto, kuleemmoheha qaaleꞌya baalanka wodanaho wodhi; hattono seekkite macciishshi.
11 Qafadamino mannikkiwa* marte coyiꞌri. Insa macciishshiturono macciishsha gibburono, ‘Woꞌmunkura Aliidi Mootichi Yihowa togo yaanno’ yite kulinsa.”
12 Hakkiinni ayyaanu iima qole gotti assie; anino badheꞌyaanni lowo huuro, “Ayirrinyisi daafira Yihowara guweenyu iillosi” yitanna macciishshummo.
13 Heeshshote kalaqami qoolla mimmitoho gaꞌnite luultanni no; insa muleno qalete huuronna wole lowo huuro macciishshantanno.
14 Hakkiinni ayyaanu duhe haaꞌre haꞌrie; anino caaccaawenna hanqe* fule haꞌrummo; Yihowa angano ane aana kaajjite no.
15 Konni daafira, Keebaari lagi mule Teeli-abiibi noohuwa qafadamino manniwa mare, hakko insa heedhannowa keeshshummo; mase jalli yee insa ledo lamala barra keeshshoommo.
16 Lamalki barri jeefora, Yihowa qaali anewa day:
17 “Manchi beetto, Israeelete minira agaraancho asse shoomoommohe; atino afiiꞌyanni fulanno qaale macciishshatto woyte, qorophishshaꞌya kulinsa.
18 Ani busha mancho ‘Addinta reyatto’ yeenna, ati qorophisiisa hoogittoronna bushu manchi busha doogosi agure hige lubbotenni heeꞌranno gede qorophishshaꞌya kula hoogittosiro, isi busha ikkino daafira loosino soꞌronni kainohunni reyanno; mundeesira kayinni ate xaꞌmeemmohe.
19 Ikkollana ati busha mancho qorophisiisseenna, bunshesinna busha doogosi agure higa giwiro, isi bunshesinni kainohunni reyanno; ati kayinni lubbokki gatisiꞌratto.
20 Keeraanchu manchino keeraanchimmasi facci asse agure bushare* assiro, ani albasiinni guficho woreenna reyanno. Iso qorophisiisoottokkiha ikkiro, isi cubbisinni kainohunni reyanno; keeraanchimmate loosisino diqaagamanno; mundeesira kayinni ate xaꞌmeemmohe.
21 Ikkollana keeraancho mancho cubbo loosannokki gede qorophisiisseenna isino cubbo qorophiro, qorophisiisoottosi daafira addinta lubbotenni heeꞌranno; atino lubbokki gatisiꞌratto.”
22 Hakko heeꞌreenna Yihowa wolqa* ane aana daggu; isino togo yiie: “Kaꞌe, xeichaamo xawo mari; anino hakko coyshiisheemmohe.”
23 Hakko daafira anino kae xeichaamo xawo haꞌrummo; kuneeti! Keebaari lagi mule laummo ayirrinyi gedeehu Yihowa ayirrinyi hakko no; anino alba hige gombisame uwummo.
24 Hakkiinni ayyaanu giddoꞌyara eꞌꞌe, kae uurreemmo gede assie; isino coyshiishie; togo yiie:
“Hadhe, minira eꞌe waalcho cufiꞌri.
25 Manchi beetto, fulte ledonsa milli yaattokki gede insa siiwotenni usurtannohe.
26 Anino arrawikki garoho qaꞌmannohe gede asseemmohe; finqila mine ikkitino daafira, insa seejjattokki gede danqicha ikkatto.
27 Coyshiisheemmohe woyte kayinni afookki faneemmohe; atino ‘Woꞌmunkura Aliidi Mootichi Yihowa togo yaanno’ yite kulattonsa. Macciishshannohu macciishsho; macciishshannokkihuno macciishshoonke; korkaatuno insa finqila mineeti.
