Hiziqeeli 28:1-26
28 Yihowa qaali galagale anewa daye togo yiie:
2 “Manchi beetto, Xiroosi gashshaanchira togo yii: ‘Woꞌmunkura Aliidi Mootichi Yihowa togo yaanno:
“Wodanikki booꞌnino daafira, ‘Ani maganoho.
Baaru aana maganu zuufaanera ofolleemmo’ yaatto.
Wodanikkinni ani maganoho yite hedattoha ikkirono,Ati mannaho ikkinnina magano diꞌꞌikkootto.
3 ‘Kuneeti! Ani Daanieeli roore hayyichaati;
Anewiinni goꞌlitino fojo dino’ yite hedatto.
4 Hayyokkinninna wodanchakkinni ateneetira jiro duuꞌnootto;Miinju minikkirano culkanna birra duuꞌna diagurootto.
5 Daddalu hayyo afootto daafira, jirokki batiꞌra ikkitino;Jirokkinni kainohunnino wodanikki booꞌnino.”’
6 “‘Hakko daafira Woꞌmunkura Aliidi Mootichi Yihowa togo yaanno:
“Wodanikkinni ani maganoho yite hedootto daafira,
7 Dagate mereero roore kakkacha ikkinoha wole gobba manna ate aana abbeemmo;Insano hayyokkinni afiꞌroottohu biifadu coy baalu aana bise kayissanno;Gaamaarrekkino batteessitanno.
8 Insa balete* giddo tuggannohe;Baaru mereerono jaddote reyo reyatto.
9 Shaannohehura ‘Ani maganoho’ yite afatto?
Batteessitannoheri anga ati mannaho ikkinnina magano diꞌꞌikkootto.”’
10 ‘Wole gobba manni anga barciminokki manni reyo reyatto;Korkaatuno tenne coyiꞌroommohu ane umoꞌyaati’ yaanno Woꞌmunkura Aliidi Mootichi Yihowa.”
11 Yihowa qaali galagale anewa daye togo yiie:
12 “Manchi beetto, Xiroosi moote daafira kiirte wiꞌli;* isira togo yii: ‘Woꞌmunkura Aliidi Mootichi Yihowa togo yaanno:
“Ati hayyo woꞌmitinohehonnaXummekkira taalle noohekkiho guuntete lawishshaati.
13 Ati bashsho Edenete Maganunnihu kaashshu basera heeꞌratto.
Ayirradda kinnanni yaanoDuumu dilqinni, tophaazinni, iyyaasphiidinni, kirisooletinni, oniksinni, haanju dilqinni, sempeerinni, xoxxorraamu dilqinninna emeraaldinni seesootto;Tenne mitte mittenta ayirradda kinna culku uduunnichira worroonni.
Insa ati kalaqamitto barra qixxeessoommo.
14 Ate agaraancho kirubeele asse buuroommohe.
Maganunnihu qullaawu ilaalira heeꞌrootto; bubbanno kinna mereerono haꞌramootto.
15 Kalaqamitto warinni kayisseBunshe assa hanafitto yanna geeshsha doogokki baalatenni xeꞌne nookkiha ikkite heeꞌrootto.
16 Daddalikki batinyinni kainohunniGiddokki finqille woꞌmitino; hattono cubbo loosa hanafitto.
Hakko daafira battaawino coy gede asse Maganu ilaaliwiinni haaꞌre hooleemmohe;Agaraancho kirubeele, bubbanno kinnawiinni fushshe huneemmohe.
17 Xummekkinni kainohunni wodanikki booꞌnino.
Gaamaarrekkinni kainohunnino hayyokki batteessootto.
Uullara qole tugeemmohe.
Mootoollate albaanni mishamoottoha asseemmohe.
18 Jawu cubbikkinninna hanaaqu daddalikkinni, qullaawa baychokki batteessootto.
Mereerokki giira kayseemmo; iseno coꞌo assite ittannohe.
Laꞌꞌannohe manni baalu albaanni baattote aana buluulo asseemmohe.
19 Dagate mereero affinoheri baalu dhagge assidhe laꞌannohe.
Baokki hedeweelchonna waajjishshannota ikkitanno;Qoleno higge higattokkita baꞌꞌatto.”’”
20 Yihowa qaali galagale anewa daye togo yiie:
21 “Manchi beetto, alba Sidooni widira higge ise daafira masaalo coyiꞌri.
22 Togo yii: ‘Woꞌmunkura Aliidi Mootichi Yihowa togo yaanno:
“Sidooni, kuneeti ani ate aana kaoommo; mereerokki ayirreemmo;Ise aana yooꞌya wonsheemmo woytenna ise widoonni qullaawa ikkeemmo woyte, mannu ani Yihowa ikkoommota afanno.
23 Isera fayya soyemmo; dooggaserano mundee duꞌnantanno.
Ragu baalunni ise aana bise dagganno woyte, gorrinoonni manni mereerose waxaaxanno;Insano ani Yihowa ikkoommota affanno.
24 “‘“Hakkiinni xaate Israeelete mine madiissanno kokkoꞌlinna shetisanno uti yaano qacifatannonsa manni didoyissannonsa; mannuno ani Woꞌmunkura Aliidi Mooticha Yihowa ikkoommota afanno.”’
25 “‘Woꞌmunkura Aliidi Mootichi Yihowa togo yaanno: “Israeelete daga billaallite martino manni mereerinni galagale gamba asseemmo woyte, dagate albaanni insa mereero qullaawa ikkeemmo. Insano soqqamaanchiꞌya Yaaqoobira oommo baattora heedhanno.
26 Insa hakko beꞌe yitukkinni heedhanno; minna miꞌnitanno, woyneno kaasidhanno; qoleno gaangaawinsara heeꞌrannohu qacifatannonsa manni baalu aana yooꞌya wonsheemmo woyte, beꞌe yitukkinni heedhanno; insano ani Maganonsa Yihowa ikkoommota affanno.”’”
