Hiziqeeli 40:1-49
40 Qafadamme haꞌnummohunni 25ki diro, diru hanafora, aganaho tonnikki barra, katamu uwihunni 14ki diro, hakko barra Yihowa anga ane aana no; isino haaꞌre katama massie.
2 Maganuwiinni daggino ajuujanni Israeelete gobba masse, lowo geeshsha seedino ilaali aana worie; hakko ilaali aana wodiidoonni katama lawannori no.
3 Hakkiira massieta, dana camote gede ikke xawanno mancho laummo. Kuni manchi shalaalatenni gannoonni siiwonna bikkinanni siqqo* anga adhe, waalchoho uurre no.
4 Manchuno togo yiie: “Manchi beetto, seekkite lai, macca worte macciishshi, leellisheemmohere baala illachishi;* korkaatuno kawira abbinoonnihehu iseraati. Laꞌꞌattore baala Israeelete minira kuli.”
5 Qullaawu minira* gobbaanni gaangeesse nooha kinchu huxxa laummo. Manchu hojja lee cigile ikkitannota bikkinanni siqqo adhe no; mitte mittenti cigile mitte mitte gaate afidhino.* Manchu huxxa bikka hanafi; huxxuno duꞌmille mitte siqqo, hojjano mitte siqqo ikki.
6 Hakkiinni soojjaati widoonni noo waalchiwa daye, dirima fuli. Waalchu xullicho bikkita, godowa mitte siqqo ikki; kaꞌiidino godowa mitte siqqo ikki.
7 Mitte mittenti agaraasinete kifile hojja mitte siqqo, godowano mitte siqqo ikkitanno; agaraasinete kifilla mereerono onte cigile halaꞌlinyi no. Waalchu barandi mule giddoonni hige noo xullichi mitte siqqo ikki.
8 Giddoonni hige nooha waalchu barandano bikkita, mitte siqqo ikki.
9 Hakkiinni waalchu baranda bikkita, sette cigile ikki; qoleno lamenka widoonni noo heelliichuwa bikkita, lame cigile ikkitu; waalchu barandino giddoonni hige no.
10 Soojjaati waalchira lamenka widoonni sase agaraasinete kifilla no. Sasenti kifilla taalote; lamenka widoonni noo heelliichuwano taalote.
11 Hakkiinni isi waalcho bikkita, godowa 10 cigile ikki; halaꞌlinye 13 cigile ikki.
12 Agaraasinete kifillara albaanni bande huxxinoonni baychi lamenka ragaanni mitte mitte cigileeti. Lamenka ragaanni nooti agaraasinete kifilla mitte mittenti lee cigileeti.
13 Hakkiinni isi waalcho mittu agaraasinete mini guunxonni* wolu agaraasinete mini guunxo geeshsha bikkita, godowa 25 cigile ikki; mittu waalchi wolu waalchira alba hige no.
14 Hakkiinni kawanna kaꞌaanni noo heelliichuwa bikkita, hojja 60 cigile ikkitu; hoowete qooxeessira noo waalchuwara noo heelliichuwa baalano bikki.
15 Waalchoho albiidinni kayse waalchoho giddoonni noo barandira albiidi geeshsha 50 cigileeti.
16 Agaraasinete kifillanna waalchoho kawanna kaꞌaanni noo heelliichuwa, gobba higge ruukkitanni hadhanno maskootta afidhino. Barandaho giddiidi widoonni, guranna qiniiteenni maskootta no; qoleno kawanna kaꞌaanni noo heelliichuwa aana saattu haqqe misile seekkinoonni.
17 Hakkiinni isi gobbaydi hoowewa abbie; anino sagale intanni kifillanna* kinna karroonniti saꞌnanni doogo, hoowe gaangeessite noota laummo. Hattee doogo aana sagale intanniti 30 kifilla no.
18 Waalchoho midaadoonni nooti saꞌnanni doogo waalchu hojja ledo taalote; tini doogo giddiidi hoowenni woro higge hirikki yitinote.
19 Hakkiinni, woro hige hirikki yiino waalchi albiidinni kayse giddiidi hoowewa eꞌnanni waalchi geeshsha noo xeertinye* bikki. Kuni xeertinyi soojjaati widoonnino aliyye widoonnino 100 cigileeti.
20 Gobbaydi hoowe alba aliyye widira higino waalcho afidhino; isino konni waalchi hojjanna godowa bikki.
21 Lamenka widoonni sase agaraasinete kifilla no. Kawanna kaꞌaanni noo heelliichuwanna barandu, umi waalchi ledo taaloho. Hojja 50 cigileeti; godowa 25 cigileeti.
22 Maskoottasi, barandunna saattu haqqi misillasi soojjaati waalchira noori ledo taalote. Mannu lamala dirima fule hakkiira iilla dandaanno; baranduno dirimaho albaanni no.
23 Giddiidi hoowera, alba aliyye waalchi widira higinohu mittu waalchi, hattono alba soojjaati waalchi widira higinohu wolu waalchi no. Waalchuwate mereero noo xeertinye bikkita, 100 cigile ikki.
24 Aantete isi wodiidira abbie; anino wodiidoonni noo waalcho laummo. Isino kawanna kaꞌaanni noo heelliichuwanna baranda bikki; geeshshinsa wolootu ledo taaloho.
25 Waalchoho lamenka widoonninna barandaho maskootta no; maskoottano wolete gedeete. Kuni waalchino hojja 50 cigileeti; godowa 25 cigileeti.
26 Hakkiira massannohu lamalu dirimi no; barandisino dirimaho albaanni no. Guranna qiniiteenni noo heelliichuwara mitte mitte saattu haqqicho misile seekkinoonni.
27 Giddiidi hoowera alba wodiidi widira higino waalchi no; isino mittu waalchinni wolu waalchi geeshsha wodiido qole bikkita, xeertinyu 100 cigile ikki.
28 Hakkiinni wodiidi waalchi widoonni qole giddiidi hoowe massie; isi wodiidi waalcho bikkita, geeshsha wole waalchuwa ledo taalo ikki.
29 Agaraasinete kifilla, kawanna kaꞌaanni noo heelliichuwanna barandisi, geeshsha wolu waalchi ledo taaloho. Waalchoho lamenka widoonninna barandaho maskootta no. Waalchuno hojja 50 cigileeti; godowa 25 cigileeti.
30 Qooxeessaho baranduwa no; insano hojja 25 cigileetinna godowa 5 cigileeti.
31 Barandisi alba gobbaydi hoowe wido hige no; guranna qiniiteenni noo heelliichuwa aana saattu haqqe misile no; qoleno hakkiira massannohu settu dirimi no.
32 Soojjaati widinni giddiidi hoowe abbie woyteno, waalcho bikki; waalchuno geeshsha wolu ledo taalo ikki.
33 Agaraasinete kifilla, guranna qiniiteenni noo heelliichuwanna barandisi, geeshsha wolu ledo taaloho; waalchoho lamenka widoonninna barandaho maskootta no. Waalchuno hojja 50 cigileeti; godowa 25 cigileeti.
34 Barandisi alba gobbaydi hoowe widira hige no; guranna qiniiteenni noo heelliichuwa aana saattu haqqe misile seekkinoonni; qoleno hakkiira massannohu settu dirimi no.
35 Hakkiinni aliyye waalchiwa abbiehu gedensaanni, waalcho bikki; waalchuno geeshsha wolu ledo taaloho.
36 Agaraasinete kifilla, guranna qiniiteenni noo heelliichuwanna barandisi, geeshsha wolu ledo taaloho. Waalchu lamenka widoonni maskootta afiꞌrino. Hojja 50 cigileeti; godowa 25 cigileeti.
37 Guranna qiniiteenni noo heelliichuwa alba gobbaydi hoowe widira higge no; lamenka widoonni noo heelliichuwa aana saattu haqqe misile seekkinoonni; qoleno hakkiira massannohu settu dirimi no.
38 Waalchoho kawanna kaꞌaanni noo heelliichuwa mule sagale intanni kifile no; kifileno waalcho afidhinote; shilqote kakkalo baala hayishshinannihu hakkooti.
39 Waalchu barandira lamenka widoonni shilqote kakkalo, cubbu kakkalonna saote kakkalo gorrinannihu lamu lamu xarapheessi no.
40 Aliyye waalchiwa massitanno doogora, waalchoho gobbaanni lamu xarapheessi no. Waalchu barandira wole ragaannino lamu xarapheessi no.
41 Waalchoho lamenka widoonni kakkalo gorrinannihu shoolu shoolu xarapheessi, xaphoomunni sette xarapheeyye no.
42 Shilqote kakkalo shiqinshanniti shoole xarapheeyye boncoonni kinnanni seekkinoonnite. Tini xarapheeyye seendille mitte cigilenna darate, godowa mitte cigilenna darate, hattono hojja mitte cigile ikkitanno. Shilqote kakkalonna wole kakkalo gorrinanni uduunne insa aana worranni.
43 Giddiidi girgiddi ledo xaadinse seekkinoonnihu godowa mitte gaate ikkanno madardari dirame no; kakkalote shiqinshoonni maala xarapheeyyete aana worranni.
44 Giddiidi waalchira gobbaanni faarsaano sagale ittanno kifilla no; tini kifilla giddiidi hoowera aliyye widiidi waalchi mule, alba wodiidira higge no. Qoleno soojjaati waalchi mule, alba aliyye widira higginoti sagale intanniti wole kifile no.
45 Isino togo yiie: “Alba wodiidi widira higginoti tini sagale intanni kifile, qullaawu mini giddo soqqantanno kakkalaasinete.
46 Alba aliyye widira higge nooti sagale intanni kifile, kakkalote darga soqqantara worronni kakkalaasinete. Insa Saadooqi oosooti; qoleno Yihowa albira shiqqe soqqantasira worroonni Leewaawooti widooti.”
47 Hakkiinni isi giddiidi hoowe bikki. Hooweno hojja 100 cigile, godowano 100 cigile ikkitu; qoleno shoolenka midaado taalote. Kakkalote dargi qullaawu minira albaanni no.
48 Hakkiinni qullaawu mini barandiwa abbie; isino barandaho guranna qiniiteenni noo heelliichuwa bikki; mitto widoonni noo heelliicho onte cigile, wole widoonni noo heelliichono onte cigile ikkitu. Waalchu godowa mitto widoonni sase cigile, wole widoonnino sase cigile ikki.
49 Barandu seendille 20 cigile, godowa 11 cigile* ikki. Mannu hakkiira marannohu dirima fuleeti. Kawanna kaꞌaanni noo tuuqqa mule, mitte mitte heelliicho no.
Lekkaalliidi Qaagiishshuwa
^ Noo gedeenni tirriro, “shomboqqo.” Guwuursha B14 lai.
^ Noo gedeenni tirriro, “leellisheemmoheri baalu aana wodanakki wori.”
^ Noo gedeenni tirriro, “minu.” Fooliishsho 40-48 “mine” yaanno qaali qullaawu mini hoowe giddoonni noo minna baala woy qullaawa mine umosi leellishannoho.
^ Noo gedeenni tirriro, “lee cigile, mitte cigilenna mitte gaate afidhinota bikkinanni siqqo.” Tini seeda cigileeti. Guwuursha B14 lai.
^ Agaraasinete kifile girgiddira iimiido ikkikkinni digatino.
^ Woy “anino kifillanna.”
^ Noo gedeenni tirriro, “godowa.”
^ “Godowa 12 cigile” yaano ikkara dandaanno.
