Hiziqeeli 1:1-28
1 Sajjiikki diro, shoolki aganira ontikki barra, Keebaari lagi mule qafadame haꞌrino manni mereero heeꞌre, gordu faꞌnameenna Maganu leellishinoe ajuuja laꞌꞌa hanafummo.
2 Hakko aganira ontikki barra, yaano, Moote Yoaakiini qafadame haꞌrinku ontikki diro,
3 Yihowa qaali Keledootu gobbara Keebaari lagi mule kakkalaanchu Buuzi beetti Hiziqeeliwa* day. Hakko Yihowa wolqa* isi aana daggu.
4 Anino laꞌꞌanni heeꞌreenna, wolqaataame bubbe aliyye raginni daggu; qoleno waraꞌa yiino xawaabbi gaangeessinohu jawu gomichinna wala yitanno giira* leeltue; giirate giddono bilicci bilicci yaanno siwiila* lawannori no.
5 Ise giddono shoolu heeshshote kalaqama labbannori no; mittu mittunku danino mannunniha lawanno.
6 Mittu mittunkura shoolu albinna shoolu qooli noonsa.
7 Lekkansa suwaddate; lekkansa hoowino siitunniha lawanno; qoleno lekkansa fiineenna waraꞌa yitino camo gede xabbanno.
8 Insara shoolenka ragaanni qoolinsara woroonni mannu anga noonsa; qoleno shoolunkura albunna qoolu noonsa.
9 Qoolinsa kuꞌu koꞌonne kisanno. Hadhanno woyte wolewa higge wirri diyitanno; mittu mittunku alba higge subbe hadhanno.
10 Albinsa konne lawanno: Shoolunkura mannu albi noonsa; qiniiteenni doobbiichu albi, guraanni qole bootu albi noonsa; qoleno shoolunku allamurchu alba afidhino.
11 Albinsa hattooho. Qoollansa iimaanni guggushshite noonsa. Mittu mittunkura mimmito kisannohu lamu qoolinna biso diwannonsahu lamu qooli noonsa.
12 Mittu mittunku subbe alba higge hadhanno; qoleno ayyaanu haaꞌre haꞌrinsawa baalankawa hadhanno. Hadhanno woyte wolewa higge wirri diyitanno.
13 Kuri heeshshote kalaqami dana maashshi yitanno kasale labbanno; qoleno waraꞌa yee xawanno kiffala lawannorichi heeshshote kalaqami mereero kawanna kaꞌa haꞌranni no; giirate giddonnino banqo fultanni no.
14 Qoleno heeshshote kalaqami alba hige haꞌre higanno woyte, haꞌrinshonsa banqote bilicceessi gedeeti.
15 Heeshshote kalaqama laꞌꞌanni heeꞌre, baattote aana shoole alba afiꞌrinohu mittu mittunku heeshshote kalaqami mule siwiilu qale lawannore laummo.
16 Qallanna daninsa kirisooleti* gede ikke xawanno; qoleno shoolenti mimmito labbanno. Daninsanna seekkinoonni gari mitte qale wolete giddoonni higge saꞌinoha lawanno.*
17 Insa milli yitanno woyte, wolewa higge wirri yitukkinni shoolunku ragi giddo baxxuwa higge haꞌra dandiitanno.
18 Qallate qaccuwa lowo geeshsha seeddaanna ikkitino daafira waajjishshannote; qoleno shoolente qale qaccuwara ille woꞌmitino.
19 Heeshshote kalaqami milli yaanno woyte, qallano insa ledo mitteenni milli yitanno; heeshshote kalaqami baattote aaninni kaꞌꞌanno woyte, qallano kaꞌanno.
20 Insa ayyaanu hadhanno gede massaginsawa, ayyaanu haꞌriwa baalawa hadhanno. Heeshshote kalaqami giddo loosanno ayyaani* qallate giddono noo daafira, qallano insa ledo mitteenni kaꞌanno.
21 Insa milli yitanno woyte, kurino milli yitanno; insa sammi yite uurritanno woyte, kurino uurritanno; insa baattote aaninni kaꞌanno woyte, qallano insa ledo mitteenni kaꞌanno; korkaatuno heeshshote kalaqami giddo loosanno ayyaani qallate giddono no.
22 Heeshshote kalaqami umira aleenni, maalaꞌlissanno kaade gede bilicci bilicci yitanno xafare lawannori no; hakkuno insara umoonni diriire no.
23 Xafarete woroonni, qoolinsa qote qoteho hossi yee uurrino.* Mittu mittunkura mitto midaado diwannohu lamu qoolinna wole midaado diwannohu lamu qooli noonsa.
24 Qoollansa huuro macciishshummo woyte, lolahanni dirranno way huuro gedenna Woꞌmanka Dandaanno Magani huuro gedeete. Insa milli yitanno woyte, huuronsa olantonnite gedeete. Insa sammi yite uurritanno woyte, qoollansa eela qoltanno.
25 Insa umira aleenni, xafareteno umoonni mitte huuro no. (Insa sammi yite uurritanno woyte, qoollansa eela qoltanno.)
26 Insa umira aleenni noo xafarera umoonni, sampeeri kincho lawannori no; hakkuno zuufaanete gedeeho. Zuufaanete aana ofollinohuno dana manna lawannoho.
27 Hallosi lawanno bisinni kayse ale hige, giira lawannohu bilicci bilicci yaanno siwiili gede xawannori fulanna laummo; halli woro kayinni, giira lawannore laummo. Qooxeessasi baala waraꞌa yiino xawaabbi gaangeesse no;
28 hakku xawaabbino xeenu barra gomichu giddo leeltanno magani-seemo gedeeho. Qooxeessasi gaangeessino xawaabbi hattooho. Qoleno Yihowa ayirrinye lawanno. Iso laummo woyte, alba hige gombisame uwummo; hakkiinni coyiꞌranni noohu huuro macciishsha hanafummo.
Lekkaalliidi Qaagiishshuwa
^ “Maganu Jawaachishanno” yitanno tiro afiꞌrino.
^ Noo gedeenni tirriro, “anga.”
^ Woy “banqo.”
^ Culkunna birru karsooti.
^ Giddoonni xawaabba saysannoha ayirrado kincho.
^ Mitte qale midaadoonni qolle wolete qansoonniha lawanno.
^ Noo gedeenni tirriro, “Heeshshote kalaqami ayyaani.”
^ “Hossi yee diriirino” yaano ikkara dandaanno.
