Hiziqeeli 35:1-15
-
Ilaalaame Seyri gobba daafira coyiꞌnoonni masaalo (1-15)
35 Yihowa qaali galagale anewa daye togo yiie:
2 “Manchi beetto, alba ilaalaame Seyri gobba widira higge, ise daafira masaalo coyiꞌri.
3 Ise togo yii: ‘Woꞌmunkura Aliidi Mootichi Yihowa togo yaanno: “Ilaalaame Seyri gobba, kuneeti ani ate aana kaoommo; angaꞌya ate aana diriirse mullichonna ona asseemmohe.
4 Katammakki kinnate duuno asseemmo; qoleno mullichonna ona ikkatta; ani Yihowa ikkoommotano afatta.
5 Korkaatuno giddokki keeshshino diinoomi noo daafira, Israeelete bao daggu barranna insa jeefote qoricha adhitu barra, bisete sayisse oottansa.”’
6 “‘Hakko daafira, Heeshshote Magano ikkaꞌyanni xaareemmona,’ yaanno Woꞌmunkura Aliidi Mootichi Yihowa, ‘Gorramatta barrira qixxeesseemmohe; mundeekki duꞌnantanno. Mundee giwootta daafira, mundeekki duꞌnantanno.
7 Ilaalaame Seyri gobba mullichonna ona asseemmo; hakkaanni hige saꞌꞌannohano ikko higannoha aye manchono qocci asseemmo.
8 Gorramino manni ilaallasera woꞌmanno gede asseemmo; bisetenni gorramino mannino tulluwakkira, xeichuwakkiranna laggakki baalate woꞌmanno.
9 Hegerera ona ikkatta gede asseemmohe; katammakkira mittuno diheeꞌranno; kiꞌneno ani Yihowa ikkoommota affinanni.’
10 “Yihowa umisi hakko heeꞌreennanni, ‘Tini lamenti daganna lamenti gobba aneta ikkitanno; qoleno lamenta ragiꞌneemmo’ yootta daafira,
11 ‘Heeshshote Magano ikkaꞌyanni xaareemmona,’ yaanno Woꞌmunkura Aliidi Mootichi Yihowa, ‘insa allaggisse hanqootta hanqinna hinaasootta hinaaso garinni qoleemmohe; qoleno atera yoo yeemmo woyte, insa ane affanno gede asseemmo.
12 “Ona ikkitino; qoleno egemminammora* ninkera aamantino” yitini barra, Israeelete ilaalla xontini xono baala ani Yihowa umiꞌya macciishshoommota hakkawoyte affinanni.
13 Anera booꞌnitine coydhinoonni; qoleno anera afiiꞌne abbita coydhinoonni. Yitinire baala macciishshoommo.’
14 “Woꞌmunkura Aliidi Mootichi Yihowa togo yaanno: ‘Mullichonna ona asseemmohe woyte, baatto baalate tashshi yaannose.
15 Israeelete mini ragge ona ikkiteenna hagiidhite findiriiqitta garinni, aterano hakko garinni qoleemmohe. Ilaalaame Seyri gobba, ee Edoomi baatto baala, diigante ona ikkatta; insano ani Yihowa ikkoommota affanno.’”
Lekkaalliidi Qaagiishshuwa
^ Noo gedeenni tirriro, “sagale ikkitankera.”
