Hiziqeeli 47:1-23
47 Hakkiinni galagale qullaawu mini xullichiwa abbie; hakko qullaawu mini xullichi woriidinni soojjaato hige lolahanni noo waa laummo; qullaawu minira albiidi, soojjaati widira hige no. Hakku way qullaawu minira qiniiteenni woriidinni fule, kakkalote dargira wodiidoonni hige dirranni no.
2 Hakkiinni aliyye waalchiwa massitanno doogo widoonni qole gobbara fushshiehu gedensaanni, alba soojjaati widira hige noo waalchiwa qole abbie; anino qiniiti widiidinni shiimu way daadanni nooha laummo.
3 Manchu bikkinanni siiwo anga adhe soojjaati widira haꞌre, 1,000 cigile* bikki; qoleno way giddoonni hige saeemmo gede assie; wayno soodo miqichi geeshsha iillannoho.
4 Hakkiinni wole 1,000 cigile bikke kae, way giddoonni hige saeemmo gede assie; wayno guluchu geeshsha iillannoho.
Xaano wole 1,000 cigile bikke, way giddoonni hige saeemmo gede assie; wayno hallu geeshsha iillannoho.
5 Xaano wole 1,000 cigile bikkita, saꞌꞌa dandeemmokki laga ikki; korkaatuno way lowo geeshsha diime ikkino daafira, daanke fulliro ikkinnina fulle dianfanniho.
6 Isino, “Manchi beetto, konne laitto?” yiie.
Hakkiinni galagale xashshu qacce massie.
7 Xashshu qacce higummoti, xashshoho kawanna kaꞌaanni kiirre tunqannikkiti batinye haqqe noota laummo.
8 Hakkiinni togo yiie: “Kuni way soojjaati qoqqowi widira hige daade, Areba* widoonni hige mare baara eanno. Baara eihu gedensaanni, hakko noo way huranno.
9 Tini wayibba* daaddannowa baalankawa batinyu heeshshote kalaqami* lubbote heeꞌranno. Kuni way hakkira hige daadanno daafira, kiirre tunqannikki qulxuꞌme heedhanno. Baaru way huranno; qoleno xashshu daadannowa baalankawa kalaqamu baalu lubbote heeꞌranno.
10 “Qulxuꞌme woshshaaxxitannori Eni-geedinni Eni-egilaymi geeshsha qaccete uurritanno; insa hakko woshshaadonsa haqqitanno. Jawu Baari* qulxuꞌme gede, hakkiicho kiirre tunqannikkiti duuchu gari qulxuꞌme heedhanno.
11 “Leephote darginna kofote way heeꞌranno; kuri dihurtannoreeti. Maxinete baatto ikkite gattanno.
12 “Xashshoho lamente qaccera intanniti duuchunku gari haqqe lophitanno. Daronsa digiggiltanno; guma laalano diagurtanno. Qullaawu mininni fulanno waa agganno daafira, aganu kiiro laaltanno. Guminsa sagale ikkanno; daronsa hurre abbitanno.”
13 Woꞌmunkura Aliidi Mootichi Yihowa togo yaanno: “Tonaalamente Israeelete gaꞌrera ragge assitine uytinanni baatto qoqqowi konneeti; Yooseefi lame qeecha adhanno.
14 Tenne baatto ragidhinanni; qoleno taalo beeqqitinanni.* Tenne gobba aammonsara albi annuwaꞌnera xaaroommo; xa kayinni kiꞌnera ragge assine uynoonniꞌne.
15 “Aliyye widiidihu baattote danni konneeti: Jawu Baarinni kae, Hetilooni massitanno doogo widoonni hige Tsedaadi iillanno;
16 Hakkiinni Hamaati geeshsha, Beroota geeshsha, hattono Demaasqote qoqqowinni Hamaati qoqqowi mereero noote Sibiraymi geeshsha, qoleno Hawuraani dannira noote Hatseeri-hatikooni geeshsha iillanno.
17 Hakko daafira dannu baaruwiinni kae aliyyeenni Demaasqote danninna Hamaati danni widoonni Hatsaari-enaani geeshsha iillanno. Tini wodiidi qasiꞌrooti.
18 “Dannu soojjaatoonni Hawuraaninni Demaasqote geeshsha, hattono Yordaanoosi mule Giliyaadinni Israeelete gobba geeshsha iillanno. Dannunni kayissine soojjaati baari* geeshsha bikke. Tini wodiidi qasiꞌrooti.
19 “Wodiidi qasiꞌro* Tiimaarinni kaꞌe Meribaati-qaadeesi wayibba geeshsha, hakkiinni Moolu Lagichi* geeshshanna Jawu Baari geeshsha iillitanno. Tini wodiidi qasiꞌrooti.*
20 “Galchimaanni, dannuwiinni kayse Lebohamaatira* albaanni noo dargi geeshsha Jawu Baari no. Tini wodiidi qasiꞌrooti.”
21 “Tenne baatto kiꞌne yaano 12nti Israeelete gaꞌre beeqqitinanni.
22 Baatto kiꞌneneetiranna ledoꞌne heeꞌre ooso ilinohura, mereeroꞌne heeꞌrannohura wole gobba mannira ragge assitine beekke; insa Israeelete ilama gede assitine kiirrensa. Insa Israeelete gaꞌre mereero kiꞌne ledo iqqa adhitanno.
23 Wole gobba manchira heeꞌranno gaꞌre qoqqowi giddo iqqa uyiyyesi,” yaanno Woꞌmunkura Aliidi Mootichi Yihowa.
Lekkaalliidi Qaagiishshuwa
^ Tini seeda cigileeti. Guwuursha B14 lai.
^ Woy “barahaamo xawo.”
^ Noo gedeenni tirriro, “Lamunku xashshi.”
^ Woy “lubbo.”
^ Kuni Mediteraaniyu Baaraati.
^ Noo gedeenni tirriro, “ragidhinanni; mittu mittunku rodiisi gede adhanno.”
^ Kuni Reyote Baaraati.
^ Noo gedeenni tirriro, “wodiidoonni nooha wodiidi midaado.”
^ Gibitsenniho moola lagichaati.
^ Noo gedeenni tirriro, “wodiidoonni nooha wodiidi midaado.”
^ Woy “Hamaati xullichira.”
