Hiziqeeli 5:1-17
5 “Ati kayinni manchi beetto, umo haxanno manchi milaace gede assite horoonsiꞌrattota gamaxantino bise adhi. Umonna ereedano meexxi; hakkiinni keenaasinchunni keente kaꞌe, danancho sasewa badi.
2 Katama doyissatto barri goofanno woyte, sayikki anga ikkanno danancho katamu giddo giiratto. Hakkiinni wole sayikki anga haadhe katamu* gaangaawira bisetenni ganatto; jeefonnita sayikki angano diilallote fincatto; anino insa shorrammora bise kaysiꞌreemmo.
3 “Qolteno, dananchu aaninni shiima haadhe, uddanokki erte giddo* worte gurdi.
4 Xaano dananchu aaninni shiima haadhe giirate giddo tugge giiri. Giira kawiinni kaꞌe Israeelete mine baala tuqqanno.
5 “Woꞌmunkura Aliidi Mootichi Yihowa togo yaanno: ‘Tini Yerusaalamete. Ise qooxeessisera heedhanno daga baalate mereerima assoommose.
6 Ise kayinni qooxeessisera heedhanno daganna gobba baalantenni roore bushshe, yooꞌyaranna wodhoꞌyara finqiltino. Korkaatuno mannise yooꞌya mishino; wodhoꞌya garinnino diqaafino.’
7 “Konni daafira, Woꞌmunkura Aliidi Mootichi Yihowa togo yaanno: ‘Qooxeessiꞌnera heedhanno daga baalatenni roore qarra kalaqqinannire ikkitinoonni daafira, wodhoꞌya garinni qaaffinoonnikki daafira, woy yooꞌya agadhitinoonnikki daafira, hatteentenni, qooxeessiꞌnera heedhanno daga yoo haꞌrunsitinoonni daafira,
8 Woꞌmunkura Aliidi Mootichi Yihowa togo yaanno: “Katama, ani ate aana kaoommo; qoleno ani umiꞌya ate giddo dagate albaanni yooꞌya wonsheemmo.
9 Effiꞌne gimbanni coye assootto daafira, konni albaanni horo asse egennoommokkire, konni kaꞌano horonta asseemmokkire ate giddo asseemmo.
10 “‘“Konni daafira, ate giddo annuwu oosonsa ittanno; oosono annuwa ittanno; mereerokki yooꞌya wonsheemmo; ate giddo gattinore baalano raga baala* billaalliseemmo.”’
11 “‘Konnira heeshshote Magano ikkaꞌyanni xaareemmona,’ yaanno Woꞌmunkura Aliidi Mootichi Yihowa, ‘Tiyyiꞌnanni magannakki baalatenninna mancau assootikki baalunni qullaawa baychoꞌya batteessootto daafira, anino misheemmohe;* illeꞌya laꞌe dimarartanno; caaqqi yee nafa dilaeemmohe.
12 Ate giddo sayikki anga ikkannohu fayyatenni* reyanno; woy mereerokki hudetenni goofanno. Wolu sayikki anga ikkannohu kayinni qooxeessikkira bisetenni waxaaxanno. Jeefonniha sayikki angano raga baala* billaalliseemmo; anino insa shorrammora bise kaysiꞌreemmo.
13 Hakkiinni hanqiꞌya qiidanno; insara aaraawoommo aarino uurranno; anino kassi yeemmo. Insano hanqoꞌya leellishe kaummohu gedensaanni, ane calla magansiꞌnaera hasiꞌre coyiꞌroommohu ane Yihowa ikkoommota affanno.
14 “‘Mullicho darga asseemmohe; qoleno qooxeessaho noo daga mereeronna doogo saꞌꞌanno manni baalu albaanni arrassinanniha asseemmohe.
15 Hanqenna aaraawe ate aana yooꞌya wonsheemmo woytenna giirame qorichisheemmohe woyte, arrassinannihanna diqantanniha ikkatto; qoleno qooxeessikkira noo dagara qorophishshanna laꞌne bararraanqanniha ikkatto. Ani Yihowa coyiꞌroommo.
16 “‘Gudannonsa gede shaannoha hudete maxxicha insa aana soyemmo. Kiꞌnewa soyemmo maxxichi hunannoꞌne. Shiqqanno sagale uurritanno gede asse, hude ledeemmoꞌne.
17 Hudenna diddishanno moycho soyemmoꞌne; insano oosoꞌne guddanno. Fayyanna olu quubbi assannoꞌne; kiꞌne aanano bise abbeemmo. Ani Yihowa coyiꞌroommo.’”
