Hiziqeeli 37:1-28
37 Yihowa anga aanaꞌya no; Yihowa ayyaanisinni haaꞌre masse lagichu mereero worie; hakku lagichi miqqa woꞌmitinoho.
2 Isino miqqa baalate mereeroonni saeemmo gede assie; anino lagichaho kiirre tunqannikkiti batinye miqqa duunante noota laummo; miqqano lowo geeshsha mooltinote.
3 Isino togo yee xaꞌmie: “Manchi beetto, tini miqqa galagalte lubbotenni heeꞌra dandiitanno?” Anino “Woꞌmunkura Aliidi Mooticha Yihowa, tenne afoottohu ateeti” yuummo.
4 Konnira isi togo yiie: “Tenne miqqara masaalo coyiꞌri; togo yiinsa: ‘Kiꞌne moola miqqa, Yihowa qaale macciishshe:
5 “‘Woꞌmunkura Aliidi Mootichi Yihowa tenne miqqara togo yaanno: “Foolu giddoꞌnera eanno gede asseemmo; kiꞌneno galagaltine lubbote heedhinanni.
6 Diimmichonna maala wore, goga diweemmoꞌne; qoleno foole woreemmoꞌne; kiꞌneno galagaltine lubbotenni heedhinanni; ani Yihowa ikkoommotano affinanni.”’”
7 Hakkiinni hajanjoonnie garinni masaalo coyiꞌrummo. Ani masaalo coyiꞌranni heeꞌreennanni, kashaartanno huuro macciishshantu; miqqano insa insanaawa xaadde sufantu.
8 Hakkiinni diimmichunna maalu daye miqqa guggushshanna laummo; goguno aanaho diwami. Kayinni xaano giddonsa foolu dino.
9 Hakkiinni togo yiie: “Diilallote masaalo coyiꞌri. Manchi beetto, masaalo coydhe diilallo togo yii: ‘Woꞌmunkura Aliidi Mootichi Yihowa togo yaanno: “Diilallo,* shoolunku raginni amo; kuni shinoonni manni galagale lubbote heeꞌranno gede, insa aana bubbisi.”’”
10 Konnira hajajinoe garinni masaalo coyiꞌrummo; fooluno* daye insa giddora ei; insano lubbote heeꞌra hanaffu; hattono kaꞌe uurritu; qoleno batiꞌranna jawa olanto ikkitu.
11 Hakkiinni togo yiie: “Manchi beetto, tini miqqa Israeelete mineeti. Insa ‘Miqqanke mooltino; hexxonkeno baꞌino. Coꞌo yine baꞌnoommo’ yitino.
12 Hakko daafira masaalo coydhe togo yiinsa: ‘Woꞌmunkura Aliidi Mootichi Yihowa togo yaanno: “Mannaꞌya, waammaꞌne fane giddonni kayseemmoꞌne; qoleno Israeelete gobba abbeemmoꞌne.
13 Mannaꞌya, waammaꞌne fane giddonni kayseemmoꞌne woyte, ani Yihowa ikkoommota affinanni.”’
14 ‘Ayyaanaꞌya giddoꞌne woreenna, galagaltine lubbote heedhinanni; qoleno gobbaꞌnera heedhinanni gede asseemmoꞌne; kiꞌneno tenne coyiꞌroommohunna assoommohu ane Yihowa umoꞌya ikkoommota affinanni,’ yaanno Yihowa.”
15 Yihowa qaali galagale anewa daye togo yiie:
16 “Atino manchi beetto, mitte siqqo haadhe ise aana, ‘Yihudahonna ledosi noohura* Israeelete mannira’ yite borreessi. Hakkiinni wole siqqo haadhe, ise aana ‘Yooseefira, yaano Efireemi riqibbanno siqqoranna ledosi noohu* Israeelete minira baalaho’ yite borreessi.
17 Hakkiinni lamenti siqqo angakki mitte ikkitanno gede, lamenta mitteenni xaadisi.
18 Mannikki* ‘Konni coy tiro maatiro dikulattonke?’ yiihero,
19 togo yiinsa: ‘Woꞌmunkura Aliidi Mootichi Yihowa togo yaanno: “Efireemi anganna ledosi noote Israeelete gaꞌre anga noota Yooseefi siqqo haaꞌre, Yihudu siqqo ledo xaadiseemmo; mitte siqqo asseemmonsa; insano angaꞌya mitte siqqo ikkitanno.”’
20 Borreessitto siqquwa insa laꞌanno gede anga amadi.
21 “Hakkiinni togo yiinsa: ‘Woꞌmunkura Aliidi Mootichi Yihowa togo yaanno: “Israeelete manna marino daga mereerinni haaꞌre fushsheemmonsa; billaallino ragi baalunkunnino gamba asse gobbansa qoleemmonsa.
22 Baattote aana Israeelete ilaallara mitte daga asseemmonsa; baalanka mittu moote gashshannonsa; insano xaate lame daga diꞌꞌikkitanno; qoleno xaate babbaxxite lame gashshoote diꞌꞌikkitanno.
23 Insa xaate tiyyiꞌnanni magannansanni,* mancau assootinsanninna saonsa baalatenni insaneeto dibatteessitanno. Ammanama hoogansanni loossino cubbi giddonni fultanno gede kaaꞌleemmonsa; qoleno keereenseemmonsa. Insa mannaꞌya ikkitanno; anino Maganonsa ikkeemmo.
24 “‘“Soqqamaanchiꞌya Daawiti mootensa ikkanno; qoleno baalunkura mittu allaalaanchi heeꞌrannonsa. Insano yooꞌya garinni qaaffanno; wodhoꞌyano seekkite agadhitanno.
25 Albi annuwansa heedhinowa, soqqamaanchiꞌya Yaaqoobira oommo baattora heedhanno; qoleno insa, oosonsanna* oosonsa ooso hatte gobbara hegerera heedhanno; soqqamaanchiꞌya Daawitino hegerera roorrichansa* ikkanno.
26 “‘“Qoleno insa ledo keeru gondooro eꞌꞌeemmo; isino hegere gondooro ikkanno. Kaajjite heedhanno gede asseemmonsa; qoleno batiseemmonsa; qullaawu miniꞌyano hegerera mereeronsa heeꞌranno gede asseemmo.
27 Dunkaaniꞌya* ledonsa* heeꞌranno; ani Maganonsa ikkeemmo; insano mannaꞌya ikkitanno.
28 Qullaawu miniꞌya hegerera mereeronsa heeꞌranno woyte, daga Israeele qullaawa assanni noommohu ane Yihowa ikkoommota affanno.”’”
Lekkaalliidi Qaagiishshuwa
^ Woy “Foole; Ayyaana.”
^ Woy “ayyaanuno.”
^ Woy “miillasi ikkinohura.”
^ Woy “miillasi ikkinohu.”
^ Noo gedeenni tirriro, “mannikki ooso.”
^ Ibiraawootu qaali “fuda” yaanno qaali ledo xaadooshshe afiꞌrinoha ikkikkinni digatino; kuni qaali mitto coye mishate horoonsiꞌnanniho.
^ Noo gedeenni tirriro, “labballi oosonsa.”
^ Woy “gashshaanchonsa.”
^ Woy “qaeꞌya; miniꞌya.”
^ Woy “aanansa.”
