Hiziqeeli 43:1-27
43 Hakkiinni soojjaatoonni noo waalchiwa massie.
2 Hakkiicho Israeelete Magani ayirrinyi soojjaatinni daanna laummo; huurosi lolahanni dirranno way gedeeti; baattono ayirrinyisinni kainohunni waraꞌa yite xabbu.
3 Laoommori katama hunammora dayummo woyte* laummo ajuuja gedeeho; qoleno Keebaari lagi mule laummore lawanno; anino alba hige gombisame uwummo.
4 Hakkiinni Yihowa ayirrinyi soojjaati waalchi widoonni hige qullaawu minira ei.*
5 Hakkiinni ayyaanu kayse giddiidi hoowewa abbie; anino Yihowa ayirrinyi qullaawa mine woꞌme noota laummo.
6 Hakkiinni mittu manchi qullaawu mini giddonni coyshiishannae macciishshummo; manchuno daye muleꞌya uurri.
7 Isi togo yiie:
“Manchi beetto, kuni zuufaaneꞌya dargaati; qoleno lekkaꞌyanni kaxxeemmo baychooti; Israeelete mereero hegerera heeꞌreemmohuno kowiichooti. Israeelete mini, insanna mootoollansa, ammanama hoogansanninna* mootoollansa reeshshinni* xaate qullaawa suꞌmaꞌya dibatteessitanno.
8 Anenna insa girgiddu calla badeenna, waalchonsa waalchiꞌya mule, gafonsano gafoꞌya mule miꞌnite assitannohu mancau coyinni qullaawa suꞌmaꞌya batteessitino; hakko daafira hanqiꞌyanni coꞌo asse gudoommonsa.
9 Xa insa ayyaanaamittete foorrensa agurto; mootoollansa reeshshano anewiinni fafisso; anino mereeronsa hegerera heeꞌreemmona.
10 “Atino manchi beetto, cubbinsanni kainohunni saalfattanno gede, Israeelete minira qullaawu mini daafira xawisse kulinsa; insano akeekasi xiinxallitona.*
11 Assitino sao baalantera saalfattannoha ikkiro, qullaawu mini akeeka, minu uurrino gara, hattono eꞌnanninna fullanni raga affanno gede assi. Xaphooma akeekasinna wodhosi, hattono akeekasinna seerasi leellishinsa; qoleno akeekasinna wodhosi huwatte agadhitanno gede, insa laꞌanna borreessi.
12 Kuni qullaawu mini seeraati. Ilaalu birxe gaangeesse noo dargi baalu lowo geeshsha qullaawaho. Kuneeti! Kuni qullaawu mini seeraati.
13 “Kakkalote darga aane noo garinni cigiletenni* bikkinoonni; mitte mittenti cigile mitte mitte gaate afidhino. Kakkalote dargi woriido* mitte cigileeti; godowano mitte cigileeti. Qoleno qaccete godowa mitte taakko* ikkanno gammala afiꞌrino. Kuni kakkalote dargira woriidooti.
14 Uulla noo safonni kayse isenni aane noo dirimi geeshsha lame cigileeti; godowa kayinni mitte cigileeti. Shiimiidi diriminni lowiidi dirimi geeshsha shoole cigileeti; godowa kayinni mitte cigileeti.
15 Kakkalote boosaalli hojja shoole cigileeti; qoleno kakkalote boosaallira luphi yite leeltannoti shoole buudda no.
16 Kakkalote boosaalli shoolenka midaado taaloho; hojja 12 cigileeti; godowano 12 cigileeti.
17 Dirimunnihu shoolunku midaadi hojja 14 cigileeti; godowano 14 cigileeti; qoleno qaccete noo gammali darate cigileeti; woriidino baalanka ragaanni mitte cigileeti.
“Dirimuno soojjaati ragaanni no.”
18 Hakkiinni togo yiie: “Manchi beetto, Woꞌmunkura Aliidi Mootichi Yihowa togo yaanno: ‘Shilqote kakkalo shiqishatenna aanaho mundee wixate kakkalote darga seekkinanni woyte haꞌrunsinanni biddishshi konneeti.’
19 “‘Soqqantaera albaꞌyaanni shiqqannorira, Saadooqi sirchonna Leewaawoota ikkitino kakkalaasinera hoshshate giddonni mitto booto cubbu kakkalora aatto,’ yaanno Woꞌmunkura Aliidi Mootichi Yihowa.
20 ‘Mundeete giddonni gama haadhe shoolente kakkalote dargi buuddara, dirimunnite shoolente maddera, hattono qacce baalate buuri; tenne assattohu kakkalote darga cubbunni keereensateeti.
21 Hakkiinni cubbu kakkalora shiqinshi booto haadhe, qullaawu dargira gobbaanni, qullaawu mini giddo tennera bandoonni darga shilqishi.
22 Layinki soodo muso afiꞌrinokkiha geꞌrechu goco cubbu kakkalo assite shiqishatto; insa kakkalote darga bootu mundeenni keereensitunte gede, konninnino kakkalote darga cubbunni keereensitanno.’
23 “‘Kakkalote darga cubbunni keereensite kaittohu gedensaanni, hoshshate giddonni muso afiꞌrinokki bootonna muso afiꞌrinokkiha geꞌrechu goco kakkalo assite shiqishatto.
24 Kuri Yihowara shiqishatto; kakkalaanono aanaho maxine giggishshituhu gedensaanni, Yihowara shilqote kakkalo assite shiqishshanno.
25 Lamalu barri geeshsha, barru barrunkunni mitto meichu goco cubbu kakkalo assite shiqishatto; qoleno hoshshate giddonni mitto bootonna mitto geꞌrechu goco shiqishatto; shiqishatto saada muso afidhinokkire* ikka hasiissannonsa.
26 Lamalu barri geeshsha kakkalote darga keereensite qixxeessitanno.
27 Tini barruwa gooffuhu gedensaanni, settikki barranna hakkunni gedensaanni, kakkalaano shilqote kakkaloꞌnenna* mittimmate kakkaloꞌne kakkalote darga shiqishshanno; anerano kiꞌnenni tashshi yaannoe,’ yaanno Woꞌmunkura Aliidi Mootichi Yihowa.”
Lekkaalliidi Qaagiishshuwa
^ “Katama hunara day woyte” yaano ikkara dandaanno.
^ Noo gedeenni tirriro, “minira ei.”
^ Woy “ayyaanaamittete foorrensanni.”
^ Noo gedeenni tirriro, “mootoollansa reytanno woyte reeshshinsanni.”
^ Noo gedeenni tirriro, “akeekasi bikkitona.”
^ Tini seeda cigileeti. Guwuursha B14 lai.
^ Woy “baqo.”
^ Mitte taakko 22.2 seentimeetire balla ikkitanno. Guwuursha B14 lai.
^ Woy “guuta.”
^ Mannu shiqishiꞌrinota yaate.
