Hiziqeeli 7:1-27
7 Yihowa qaali galagale anewa daye togo yiie:
2 “Manchi beetto, Woꞌmunkura Aliidi Mootichi Yihowa Israeelete baattora togo yaanno: ‘Goofimarchu! Shoolente baattote maddera goofimarchu dayno.
3 Xa atera goofimarchu iillino; hanqoꞌyano ate aana dirriseemmo; doogokki garinni yoo yeemmohe; tiyyiꞌnanni assootikkira baalaho xaꞌmeemmohe.
4 Illeꞌya laꞌe dimarartannohe; caaqqi yeeno dilaeemmohe; loosikki guma ate aana abbeemmo; tiyyiꞌnanni assootikki abbanno qarra qamasatta. Ani Yihowa ikkoommotano affinanni.’
5 “Woꞌmunkura Aliidi Mootichi Yihowa togo yaanno: ‘Kuneeti! Bao, baxxitino bao dagganni no.
6 Goofimarchu daanni no; goofimarchu daanno; ate aana kaꞌꞌanno.* Kuneeti! Daanni no.
7 Tenne gobbara heeꞌrattohura atera xa tarikki iillino.* Yanna iillitanni no; barruno muleeti. Ilaallate aana ililleette ikkikkinni cancu heeꞌranno.
8 “‘Muli yannara aaraꞌya ate aana duneemmo; hanqoꞌyano gudise ate aana dirriseemmo; doogokki garinni yoo yeemmohe; tiyyiꞌnanni assootikkira baalahono xaꞌmeemmohe.
9 Illeꞌya laꞌe dimarartanno; caaqqi yeeno dilaeemmo. Loosikki guma ate aana abbeemmo; tiyyiꞌnanni assootikki abbanno qarra qamasatta. Gananni noommoꞌnehu ane Yihowa ikkoommotano affinanni.
10 “‘Kuneeti barru! Kuneeti! Daanni no! Tarikki* iillino; siqqo daraartino; booꞌnano mudhino.
11 Finqille lophite bunshete siqqo ikkitino. Insa woy jironsa woy manninsa woy ayirrinyinsa digatanno.
12 Yanna iillitanno; barruno daanno. Manninsa baalu aana hanqu daanno daafira, hidhannohu hagiidhoonke, hirannohuno dadilloonke.*
13 Ajuuja mannu baalu aana woꞌmitanno daafira, hiranno manchi lubbosi gatturo nafa, hirino coywa dihiganno. Mittu manchino dihiganno; loosino soꞌronni kainohunni, lubbosi gatisiꞌra dandaannohu diheeꞌranno.
14 “‘Insa xurumba ufuuffeenna baalunku qixxaawanno; ikkirono, hanqiꞌya mannu baalu aana dirranno daafira mittuno olaho difulanno.
15 Gobbaanni bise no; giddoonni kayinni fayyanna hude no. Xawoho noohu baalu bisetenni reyanno; katamaho heedhannoreno hudenna fayya guddanno.
16 Ikkituta ikkite gatte saꞌurino ilaalla fultanno; xeichuwate noo lembooli gede, mittu mittunku loosino soꞌrora yuusanno.
17 Angansa baala daafurte leqe leqe yitanno; gulubbansa baalateno way cophi cophi yaanno.*
18 Insa xiddu uddano uddidhino; huxano amaddinonsa.* Mannu baalunku saalfatanno; mittu mittunku umino qulullaamo ikkanno.*
19 “‘Birransa doogote huntanno; culkansano effidhe gibbanno. Yihowa hanqi barra birrinsano culkinsano gatisansara didandaanno. Insa* kassi diyitanno; godowinsano diduuwanno; korkaatuno sodhanno gede guficho ikkinonsahu isooti.*
20 Insa seesu uduunninsanni naaxxitino; qoleno insanni* tiyyiꞌnanni misillanna giwissanno magannansa seekkidhino. Birransanna culkansa effiꞌnanni coye asseemmohu iseraati.
21 Iso* mulqiꞌranno gede wole gobba mannira, saantanno gedeno baattote aana heedhanno bushuullira eemmo; insano batteessitanno.
22 “‘Insawiinni alba shawwu yeemmo; insano maaxamino dargaꞌya* batteessitanno; mulqiꞌraanono hakkiira eꞌe batteessitanno.
23 “‘Gobbate mundeete shede abbitanno yoo batidhino daafiranna katamahono finqille woꞌmitino daafira, sansalate* seekki.
24 Dagate mereerinni roore bushshinore abbeemmo; insano minnansa ragidhanno; jawaatootu naaxxa uurritanno gede asseemmo; qullaawu darginsano battaawanno.
25 Qarru qalxe amadannonsa woyte keere hasidhanno; keeru kayinni diheeꞌranno.
26 Baote aana bao dagganno; duduwu aanano duduwu lexxanno; mannu masaalaanchuwiinni ajuuja hasiꞌranno; ikkollana seeru* kakkalaanchuwiinni, amaaleno cimeeyyetewiinni baꞌanno.
27 Moote xiddanno, roorrichuno hexxo mudhe quubbi yaanno, gobbate noo manni anga masillunni huxidhanno. Doogonsa garinni qoleemmonsa; insa yitino yoo garinni yeemmonsa. Insano ani Yihowa ikkoommota affanno.’”
Lekkaalliidi Qaagiishshuwa
^ Noo gedeenni tirriro, “baqqi yaanno.”
^ “Awawikki dayno” yaano ikkara dandaanno.
^ “Awawikki” yaano ikkara dandaanno.
^ Bao baalunkura dagganno daafira, hirannohuno hidhanno manchino afiꞌrannori diheeꞌranno yaate.
^ Waajjite shuma ciphi ciphi assitannota leellishshanno.
^ Noo gedeenni tirriro, “dibbinonsa.”
^ Xiddite umo meexxitannota leellishshanno.
^ Woy “Lubbonsa.”
^ Koye yinihu birransaatinna culkansaati.
^ Culkunna birru uduunnensaati.
^ Kaphu maganna seekkinanni birranna culkaati.
^ Yihowa miniha qullaawa holge leellishannoha ikkikkinni digatino.
^ Qafande haaꞌne haꞌnannire usurranni sansalateeti.
^ Woy “biddishshu.”
