Hiziqeeli 13:1-23
13 Yihowa qaali galagale anewa daye togo yiie:
2 “Manchi beetto, Israeelete masaalaanora masaalo coyiꞌri; uminsa masaalo kalaqqe coydhannorirano* togo yii: ‘Yihowa qaale macciishshe.
3 Woꞌmunkura Aliidi Mootichi Yihowa togo yaanno: “Mitte ajuuja nafa laꞌukkinni uminsa hedo* haꞌrunsitannorira balala masaalaanora aanneꞌe!
4 Israeeli, masaalaanokki diigantino kinna mereero noo yeedaala gede ikkitino.
5 Israeele Yihowa barra olunniwa kaajjite uurritanno gede, diigamino darga Israeelete minira gatamartinara kinchu huxxiwa dimartinanni.”
6 “Yihowa soyinsakkinni ‘Yihowa togo yaanno’ yitannori kaphu ajuuja laꞌino; qoleno kapho masaaltino; insa coydhino qaali woꞌmara agadhitanno.
7 Ani mittoreno yuummokkinni, ‘Yihowa togo yaanno’ yitinanni woyte, laꞌinoonni ajuuja dikaphoho? Masaaloꞌneno dixaraho?”’
8 “‘Konni daafira Woꞌmunkura Aliidi Mootichi Yihowa togo yaanno: “‘Kapho coydhinoonni daafiranna masaaloꞌneno xara ikkitino daafira, ani kiꞌne aana kaoommo’ yaanno Woꞌmunkura Aliidi Mootichi Yihowa.”
9 Angaꞌya kaphu ajuuja laꞌannorinna kapho masaaltanno masaalaano aana kaꞌino. Insa fojoꞌya kuleemmo manni widira dikiirantanno; Israeelete mini maxaafira diborreessantanno; Israeelete gobbano dihigganno; kiꞌneno ani Woꞌmunkura Aliidi Mooticha Yihowa ikkoommota affinanni.
10 Kuni baalu ikkannohu insa keeru nookkiha “Keeru no!” yitanni mannaꞌya soꞌrisiissanno daafiraati. Mannu kinseenna uwanno girgidda seekkanno; insa hakkuyra noora gantanno.’
11 “Noora gantanni noorira girgiddu uwannota kulinsa. Barada xeena gananno; jajjabba kaade ubbanno; wolqaataame wishono diigge uullate gantanno.
12 Girgiddu diigamanno woyte, mannu ‘Gantinoonni noori hanni ma kaaꞌlino?’ yee xaꞌmannoꞌne.
13 “Hakko daafira, Woꞌmunkura Aliidi Mootichi Yihowa togo yaanno: ‘Aariꞌyanni wolqaataame wisho kayseemmo; hanqiꞌyanni barada xeena dirriseemmo; buwanno hanqiꞌyanni jajjabba kaade giggishsheemmo.
14 Noora gantinoonni girgidda diige uullara dirriseemmo; safono reqecci yite leeltanno. Katamu diigamanno woyte, kiꞌneno giddosi gooffinanni; ani Yihowa ikkoommotano affinanni.’
15 “‘Girgiddu aananna noora ganturi aana hanqoꞌya gudise dirriseemmo woyte, togo yeemmoꞌne: ‘Girgiddu diigamino; noora ganturino dino.
16 Yerusaalamete masaalo coydhannorinna keeru nookkiha keeru ajuuja laꞌannori Israeelete masaalaano gooffino”’ yaanno Woꞌmunkura Aliidi Mootichi Yihowa.
17 “Ati kayinni manchi beetto, albakki uminsa masaalo qale coyiꞌrannohu mannikki seenniwa qoli; insa daafirano masaalo coyiꞌri.
18 Togo yiinsa: ‘Woꞌmunkura Aliidi Mootichi Yihowa togo yaanno: “Manna* ugaaxate, cigilete usudhinanniha shaalado hocco* gowannoriranna mannaho hojja hojjansa garinni umoho xaaxiꞌnanni hocco qixxeessanno meentira aanneꞌe! Manniꞌya heeshsho* ugaaxxinanni, kiꞌne heeshsho* gatisiꞌrate woꞌnaaltinanni heedhinoonni?
19 Kaphoꞌne macciishsha baxanno manniꞌyara kapho kultinanni, reya hasiissannokkire* shitinanni, heeꞌra hasiissannokkire* gatissinanni, hoowo ikkanno hayxiranna hilicci daabbichora yitine manniꞌya mereero batteessitinannie?”’
20 Hakko daafira Woꞌmunkura Aliidi Mootichi Yihowa togo yaanno: “Meento, manna* ceate gede woshshaaddinanni hoccoꞌne effire giwoommo; angaꞌne aaninnino dare huneemmo; ceate gede ugaaxxinanni mannano tireemmo.
21 Umoho xaaxiꞌnanni hoccoꞌne daddare huneemmo; mannaꞌyano angaꞌnenni gatiseemmo; insa layinkita ugaaxxine diamaddinanni; kiꞌneno ani Yihowa ikkoommota affinanni.
22 Korkaatuno keeraancho mancho ani qarrisummokkinni* kiꞌne kaphiꞌnenni hexxo mudhanno gede assitinoonni; qoleno bushu manchi busha doogosi agure hige heeshshote heeꞌrannokki gede, iso jawaachishshinoonni.
23 Hakko daafira, kiꞌne meentu layinkita kaphu ajuuja dilaꞌinanni, diinokiiltinanni; mannaꞌya kiꞌne anganni gatiseemmo; kiꞌneno ani Yihowa ikkoommota affinanni.’”
