Hiziqeeli 32:1-32
32 Qoleno 12ki diro, 12ki aganira umi barra, Yihowa qaali galagale anewa daye togo yiie:
2 “Manchi beetto, Gibitsete moote Feriooni daafira kiirte wiꞌli;* iso togo yii:‘Ati bashsho dagate mereero, wolqaataamu aju doobbiichi gedeeti;Ikkirono sammi yaatto gede assinoonnihe.
Ati alba laggakki giddo daakkanni,Lekkatenni waa borcitanni lagga* booreessattoho, jawa baaru moychooti.’
3 Woꞌmunkura Aliidi Mootichi Yihowa togo yaanno:
‘Lowo daga songo widoonni woshshaadoꞌya woreemmohe;Insano manxaqqoꞌyanni goshooshshe fushshitannohe.
4 Gobba tugeemmohe;Fanu xawira agureemmohe.
Iimi cea baala aanakki ofoltanno gede asseemmo;Baattote noohu dubbu moychi baaluno ate ite duuwanno gede asseemmo.
5 Maalakki ilaallate aana tugeemmo;Raqikkino xeichuwate woꞌmanno gede asseemmo.
6 Lolakkanno mundeekki gobba woꞌmite ilaallate geeshsha iillitanno gede asseemmo;Laggateno woꞌmitanno.’*
7 ‘Ati coꞌonta baꞌꞌatto woyte, gordo diweemmo; beeddaheno tunsiiseemmo.
Arrishsho gomichunni diweemmo;Aganuno xawaabba diaanno.
8 Atenni kainohunni gordoho xawannore baala tunsiiseemmo;Gobbakkino tunsichu beeshshanno gede asseemmo,’ yaanno Woꞌmunkura Aliidi Mootichi Yihowa.
9 ‘Mannakki qafade wole dagawa,Affe egennoottokki gobba masseemmo woyte, lowo manni wodani masanno gede asseemmo.
10 Albansaanni biseꞌya wala asseemmo woyte, lowo manni mase qece yaanno gede asseemmo;Mootoollansano atenni kainohunni huxidhanno.
Ati uwatto barra, insa mittu mittunku lubbonsara waajjite,Huxidhe qoꞌla hoogganno.’
11 Korkaatuno Woꞌmunkura Aliidi Mootichi Yihowa togo yaanno:
‘Baabiloonete moote bise ate aana dagganno.
12 Lowo dagakki wolqaataame bagadaano bisenni gooffanno gede asseemmo;Baalunku dagate mereero roore kakkachootaho.
Insa Gibitse kuꞌlite naaxxitannore baalankare uullate gantanno; lowo dagaseno coꞌo yite baꞌanno.
13 Saadase baala lowo wayse mule gudeemmo;Xaate waase booreessanno manchi woy saada diheedhanno.’
14 ‘Hatte yannara waansa xalashsheemmo;Laggansano zaytete gede ikkite duꞌnantanno gede asseemmo,’ yaanno Woꞌmunkura Aliidi Mootichi Yihowa.
15 ‘Gibitsete woꞌminore baala mulqe, gobba mullichonna ona asseemmo woyte,Giddose heeꞌranno manna baala ganeemmo woyte,Insa ani Yihowa ikkoommota affanno.
16 Kuni wiꞌlishshaho; mannuno hatto yee kiire wiꞌlanno;Dagate seenni hatto yee kiire wiꞌlanno;
Insa Gibitsetenna lowo dagase baalate kiire wiꞌlanno,’ yaanno Woꞌmunkura Aliidi Mootichi Yihowa.”
17 Hakkiinni 12ki diro, aganaho 15ki barra, Yihowa qaali anewa daye togo yiie:
18 “Manchi beetto, Gibitsennite lowo dagara didde wiꞌli; qoleno isenna wolqaataame daga seenne, bale* dirritannori ledo mitteenni, baattote woroonni saysi.
19 “‘Ati xumme aye rooratto? Worora dirri; barcintinokkiri ledo goxi!’
20 “‘Insa bisetenni gorrantinori ledo gooffanno. Ise bisete sayinse uynoonni; isenna lowo dagase baalanta goshooshshe.
21 “‘Wolqaataame bagadaano diime Waamma* giddo heedhe isonna halesi coyshiishshanno. Insano worora dirrite, bisetenni gorraminohu barciminokki manni gede ikkite goxxanno.
22 Asooru dagasi baalate ledo hakko no. Gaangaawisira baalaho waammansa no; baalunku bisetenni shinoonnireeti.
23 Waammase diimete bale* giddo no; dagaseno waammase doyissite no; lubbote noo waro manna shabbarsitino daafira, insa baalanka bisetenni shinoonni.
24 “‘Eelaamino lowo dagase ledo hakko waammase mule no; baalunku bisetenni shinoonnireeti. Lubbote noo yannara manna shabbarsitinori, barcintukkinni baattote woroonni saꞌino. Xa insa bale* dirritannori ledo saala duqqitanno.
25 Gorrantinori mereero isera maꞌna kartinose; lowo dagase baalano waammase gaangeessite no. Insa lubbote noo waro manna shabbarsitino daafira, baalunku barcintinokkireetinna bisetenni shinoonnireeti. Qoleno insa bale* dirritannori ledo saala duqqitanno. Iso gorrantinori mereero worroonni.
26 Mesheeqinna Tubaalino lowo dagansa* baalate ledo hakko no. Waammansano* iso gaangeessite no. Insa lubbote noo yannara manna shabbarsitino daafira, baalunku barcintinokkireetinna bise xoroorrissinoreeti.
27 Insa, reyte olu bagadinsa ledo Waamma* dirrituri, barcintinokkiri wolqaataamma olamaasine ledo digoxxanno? Kuri wolqaataammu olamaasine lubbote noo waro manna shabbarsitino daafira, mannu bisensa uminsara woroonni woranno;* cubbinsara adhitanno qorichino miqqansa aana heeꞌranno.
28 Ati kayinni barcintinokkiri mereero cancanamatto; bisetenni gorrinoonniri ledono goxatto.
29 “‘Edoomi, mootoollasenna roorrootise baalu hakko no; insa wolqaataamma ikkiturono bisetenni gorrinoonniri ledo goxxino; insano barcintinokkiri ledonna bale* dirritannori ledo goxxanno.
30 Aliyye gashshaano* baalano, Sidoonootu baalu ledo hakko no; insa wolqansanni manna shabbarsitinoha ikkirono, saala duqqite gorrantinori ledo worora dirritino. Qoleno barcintukkinni, bisetenni gorrinoonniri ledo goxxanno; bale* dirritannori ledono saala duqqitanno.
31 “‘Feriooni tenne baala laꞌꞌanno; qoleno bao iillitinonsari dagasi calla ikkitinokkita afe sheshifatanno; Feriooninna olantosi baala bisetenni gorrantanno,’ yaanno Woꞌmunkura Aliidi Mootichi Yihowa.
32 “‘Feriooni lubbote noo yannara manna shabbarsino daafira, isinna lowo dagasi baala barcintinokkirinna bisetenni gorrinoonniri ledo goxxe fooliishshidhanno,’ yaanno Woꞌmunkura Aliidi Mootichi Yihowa.”
Lekkaalliidi Qaagiishshuwa
^ Woy “wiꞌlishshi.”
^ Noo gedeenni tirriro, “laggansa.”
^ Noo gedeenni tirriro, “Lagga atewiinni (atenni) woꞌmitanno.”
^ Woy “waamma.”
^ Woy “Sioole.” Mannu ooso baalate waamma xawisanno. Qaallate Tiro lai.
^ Woy “waamma.”
^ Woy “waamma.”
^ Woy “waamma.”
^ Noo gedeenni tirriro, “dagase.”
^ Noo gedeenni tirriro, “Waammaseno.”
^ Woy “Sioole.” Mannu ooso baalate waamma xawisanno. Qaallate Tiro lai.
^ Bagadaano ayirrinye afidhara yine bisensa ledo mitteenni madaarroonninsata leellishshannota ikkitara dandiitanno.
^ Woy “waamma.”
^ Woy “massagaano.”
^ Woy “waamma.”
