Hiziqeeli 30:1-26
30 Yihowa qaali galagale anewa daye togo yiie:
2 “Manchi beetto, masaalo coyiꞌri; togo yii: ‘Woꞌmunkura Aliidi Mootichi Yihowa togo yaanno:
“Diddine wiꞌle; ‘Barru gamba yee daynona, baysibao!’
3 Barru gambisino; ee, Yihowa barri gambise dayno.
Hakko barra tunsino gomichi leellanno; dagate murroonni barra ikkanno.
4 Gibitsete aana bise dagganno; Gibitsete gorrinoonni manni waxaaxanno woyte,Jirose mulqiꞌnanni woytenna safose diigantanno woyte Itiyophiyu mase qece yaanno.
5 Itiyophiyu, Fuuxi, Luudi, wole gobba daga baalannaKuubi, gondooru gobba ooso* ledoBaalunku bisetenni gooffanno.”’
6 Yihowa togo yaanno:
‘Gibitsete haleno gooffanno;Kuꞌlite naaxxitanno wolqaseno baꞌanno.’
“‘Migidoolinni Seweene geeshsha, insa baattote aana bisetenni gooffanno’ yaanno Woꞌmunkura Aliidi Mootichi Yihowa.
7 ‘Insa wole gobba baalatenni roore ona ikkitanno; katammaseno wole katamma baalatenni roore diigantanno.
8 Gibitsete giira qaseemmo woytenna ise ledo namoontinori baalu cancanantanno woyte, insa ani Yihowa ikkoommota affanno.
9 Hakko barra, umosi addaxxannoha Itiyophiya huxiꞌranno gede assammora markaawetenni sokkaano soyemmo; Gibitse baꞌanno barra Itiyophiyu waajje huxiꞌranno; korkaatuno hakku barri daasi digattanno.’
10 “Woꞌmunkura Aliidi Mootichi Yihowa togo yaanno: ‘Baabiloonete Moote Nabukadanatsoori* kaxxe, Gibitsennita lowo daga gudeemmo.
11 Dagate mereero roore kakkachoota ikkitinori isinna olantosi dagge gobba huntanno. Insa Gibitsete aana bise kayissanno; gorrinoonni manni reeshshino gobba woꞌmanno.
12 Abbay gorsa mooshsheemmo; uullano bushu manni angara sayse eemmo. Gobbanna giddose noore baala wole gobba manni hunanno gede asseemmo. Tenne coyiꞌroommohu ane Yihowa umoꞌyaati.’
13 “Woꞌmunkura Aliidi Mootichi Yihowa togo yaanno: ‘Tiyyiꞌnanni magannano* huneemmo; haafa Noofi* magannano haaꞌre hooleemmo. Xaate Gibitsete gobbara gashshaanchu* diheeꞌranno; Gibitsete gobbarano waajjille naqeemmo.
14 Phaaxiroosi mullicho asseemmo; Tsoaani giira qaseemmo; qoleno Noi* aana yooꞌya wonsheemmo.
15 Gibitsete qiisho ikkinohu Siini aana hanqoꞌya dirriseemmo; Noi dagano huneemmo.
16 Gibitsete giira qaseemmo; Siini mase qece yaanno; Noi diigamanno; Noofi* barra baqaaqa siamanno!
17 Ooninna* Phibeseeti wedelli bisetenni gooffanno; katammansano qafadantanno.
18 Gibitsete qambara hiiqqeemmo woyte, Xafineesi katamira barru tunsanno; kuꞌlite naaxxitanno wolqase baꞌanno; gomichu diwannose; katammaseno qafadantanno.
19 Gibitsete aana yooꞌya wonsheemmo; insano ani Yihowa ikkoommota affanno.’”
20 Tonaa mitikki diro, umi aganira lamalki barra, Yihowa qaali anewa daye togo yiie:
21 “Manchi beetto, Gibitsete moote Feriooni cigile hiiqqoommo; hurtanno gede disissinanni; woy dhaabbatte bise amaddanno gede hoccunni dixaanxanni.”
22 “Hakko daafira, Woꞌmunkura Aliidi Mootichi Yihowa togo yaanno: ‘Kuneeti ani Gibitsete moote Feriooni aana kaoommo; jawaatano hiiqqantino cigilesino hiiqqeemmo; biseno angasinni ubbanno gede asseemmo.
23 Hakkiinni Gibitsoota dagate mereero billaalliseemmo; gobba baalateno fincaqqeemmonsa.
24 Baabiloonete moote cigile kaajjisheemmo;* biseꞌyano angasira woreemmo; Feriooni cigile hiiqqeemmo; isino reyanni noo manchi gede, albasiinni* baasa korrisanno.
25 Baabiloonete moote cigile kaajjisheemmo; Feriooni cigile kayinni leqe leqe yitanno; biseꞌya Baabiloonete moote anga woreemmo woytenna isino Gibitsete gobba aana kaysanno woyite insa ani Yihowa ikkoommota affanno.
26 Gibitsoota dagate mereero billaalliseemmo; gobba baalateno fincaqqeemmonsa; insano ani Yihowa ikkoommota affanno.’”
Lekkaalliidi Qaagiishshuwa
^ Gibitsete ledo namoontino Israeeloota ikkitukkinni digattino.
^ Noo gedeenni tirriro, “Nabukadiretsoori.” Nabukadanatsoori suꞌma konni garinnino borreessinanni.
^ Ibiraawootu qaali “fuda” yaanno qaali ledo xaadooshshe afiꞌrinoha ikkikkinni digatino; kuni qaali mitto coye mishate horoonsiꞌnanniho.
^ Woy “Memfiisi.”
^ Woy “roorrichu.”
^ Tebisi yaate.
^ Woy “Memfiisi.”
^ Heliyopoliisi yaate.
^ Woy “wolqa ledeemmosi.”
^ Baabiloonete moote albaanni yaate.
