Hiziqeeli 8:1-18
8 Leekki diro, leekki aganira ontikki barra, Yihudu cimeeyye albaꞌyaanni ofolte noowa mineꞌya ofolle heeꞌreenna, Woꞌmunkura Aliidi Mootichi Yihowa anga dagge amaddue.
2 Laꞌꞌanni heeꞌre, giirate dana afiꞌrinoricho afummo; hallosi lawanno bisira woroonni giira no; halli ale, danisi bilicci bilicci yaanno siwiili* gede waraꞌa yiinoho.
3 Hakkiinni anga lawannore diriirse, umiꞌya danancho amadie; ayyaanuno Maganu ajuujanni baattotenna gordu mereero gotti asse, Yerusaalamete alba aliyye widira hige noohu giddiidi hoowe waalchiwa massie; Maganu hanqo kakkayissannoti kaphu magani misile* hakko uurrite no.
4 Kuneeti! Xeichaamu xawira laummoha lawannohu Israeelete Magani ayirrinyi hakko no.
5 Hakkiinni isi togo yiie: “Manchi beetto, illekki aliyye widira qolte lai ballo.” Anino illeꞌya aliyye widira qole laummo; hakko, kakkalote dargiwa massannohu aliyye widiidihu giddiidi waalchiwa kuni hinaasote malaati* no.
6 Isino togo yiie: “Manchi beetto, Israeelete mini kowiicho assanni nooha, qullaawu baychiꞌyawiinni xeertisannoeha, shagaggiꞌnanninna tiyyiꞌnanni coye laitto? Kayinni roore bushinoha tiyyiꞌnanni coye laꞌꞌatto.”
7 Hakkiinni isi hoowete waalchiwa massie; anino laꞌꞌanni heeꞌre, girgiddu aana xullo noota afummo.
8 Isino togo yiie: “Manchi beetto, hanni girgidda kurkuri.” Anino girgidda kurkure, waalchu nooha laummo.
9 Isino togo yiie: “Giddora eꞌe, assitanni nooha bushanna tiyyiꞌnanni coye lai.”
10 Anino eꞌꞌe, godowunni hadhanno saadatanna giwisanno moychi misilla baala, hattono Israeelete minita tiyyiꞌnanni maganna* baala laummo; girgiddu aana baalankawa hatti misilla no.
11 Qoleno Israeelete miniri 70 cimeeyye insara albaanni uurrite no; Saafaani beetti Yaꞌꞌaazaniyano ledonsa uurre no. Mittu mittunku hixaana wiliishshinanni uduunnicho anga adhite no; tanni yite suꞌniitannoti hixaanu wiliileno tunnuuqqanni no.
12 Isino togo yiie: “Manchi beetto, Israeelete mini cimeeyye mittu mittunku kaphu magannansa noowa* holgeenni tunsote assitanni noore laitto? Korkaatuno insa, ‘Yihowa dilaꞌꞌannonke. Yihowa baatto facci asse agurino’” yitanno.
13 Hakkiinni isi lede togo yiie: “Insa assitannoha roore bushinoha tiyyiꞌnanni coye laꞌꞌatto.”
14 Konni daafira isi aliyye ragaanni noohu Yihowa mini waalchiwa massie; hakkiicho meentu ofolle Tamuuzi yinanni maganira wiꞌlanna laummo.
15 Isino lede togo yiie: “Manchi beetto, tenne laitto? Kawiinni roore bushinoha tiyyiꞌnanni coye laꞌꞌatto.”
16 Konni daafira Yihowa mine giddiidi hoowewa haaꞌre massie. Hakkiicho Yihowahu qullaawu mini waalchiwa, barandunna kakkalote dargi mereero, mito 25 ikkitanno labballi Yihowahu qullaawu minira badhe wodhite, alba soojjaati widira higge no; insa soojjaatoonni noo arrishshora kumbuultanni no.
17 Isino togo yiie: “Manchi beetto, tenne laitto? Yihudu mini konne tiyyiꞌnanni coye assansa, baattote aana finqille batisansanna ane hanqisannore assansa mullareeti? Insa sina* sanoꞌya geeshsha iillishshino.
18 Konnira hanqe qaafo adheemmo. Illeꞌya laꞌe dimarartanno; caaqqi yeeno dilaeemmo. Qoonqonsa gotti assite raarturo nafa, dimacciishsheemmo.”
Lekkaalliidi Qaagiishshuwa
^ Culkunna birru karsooti.
^ Noo gedeenni tirriro, “hinaaso kakkaysannohu hinaasote magani malaati.”
^ Woy “misile.”
^ Ibiraawootu qaali “fuda” yaanno qaali ledo xaadooshshe afiꞌrinoha ikkikkinni digatino; kuni qaali mitto coye mishate horoonsiꞌnanniho.
^ Woy “bonce seekkinoonni misillansa noowa.”
^ Kaphu maganna magansiꞌrate horoonsiꞌnanni sina ikkikkinni digatino.
