Hiziqeeli 22:1-31
22 Yihowa qaali galagale anewa daye togo yiie:
2 “Manchi beetto, mundee dunanno katamira yoote sokka duduwatenna* tiyyiꞌnanni assootesi baala egensiisate qixxaawootto?
3 Togo yaatto: ‘Woꞌmunkura Aliidi Mootichi Yihowa togo yaanno: “Ati mundee dunattohu, barrikki iillinohehu, ateneeto batteessate tiyyiꞌnanni maganna* seekkiꞌratto katama,
4 mundee dunakki cubbaataamo assitinohe; tiyyiꞌnanni magannakkino batteessitinohe. Barrikki rahe goofanno gede assiꞌrootto; dirikki goofimarchino dayno. Daga baala mishshannohe gedenna gobba baala arrassitannohe gede asseemmohehu iseraati.
5 Mulenna xeertote noo gobba baala arrassitannohe; ati battaawino suꞌmi noohehonna gaancu batiꞌrinohe katamaati.
6 Kuneeti! Giddokki noohu mittu mittunku Israeelete roorrichi biilloonyesi kaxxe mundee dunanno.
7 Ate giddo annansanna amansa diqattannori no. Wole gobba manna hanaaqqanno; qoleno anniweelo oosonna* gunnoota miiccanno.”’”
8 “‘Qullaawa dargaꞌya mishootto; sambataꞌyano batteessootto.
9 Ate giddo mundee duntara mixidhe suꞌma huntannori no. Ate giddo mannu ilaallate kakkalloonnire itanno; qoleno mereerokki mancaꞌꞌa coye assanno.
10 Ate giddo anninsa maꞌna batteessitannori* no; godowu dayennase lagaabbino manchono seyattanno.
11 Ate giddo mittu olliichisi galte ledo mancaꞌꞌa coye assanno; mittu qole oososi seenni ledo amanyoote bainore asse bushiishanno; wolu qole annisi beetto rodoosi bushiishanno.
12 Ate giddo gubbo itte mundee duntannori no. Woxekki qallote woy tirfe afiꞌrate liqiissatto; olliichikki woxeno mulqiꞌratto. Ee, horo hawoottoe,’ yaanno Woꞌmunkura Aliidi Mootichi Yihowa.
13 “‘Kuneeti! Hanaaqqe afiꞌrootto woxenna giddokki mundee dunoottota effire giwoommo daafira anga ganeemmo.
14 Qorichisheemmohe barra kaajjite uurra dandaatto?* Angakkino kaajjite affanno? Tenne coyiꞌroommohu ane Yihowaati; coyiꞌroommoreno wonsheemmo.
15 Dagate mereero billaalliseemmohe; gobba baalano fincaqqeemmohe; battekkino uurritanno gede asseemmo.
16 Dagate albaanni shollatto; ani Yihowa ikkoommotano afatto.’”
17 Yihowa qaali galagale anewa daye togo yiie:
18 “Manchi beetto, Israeelete mini siwiila daaqinseenna fulanno ishini gede ikkinoe. Insa baalunku booso noo camo, qorqorro, siwiilinna irsaase gedeeti. Insa birra daashshineenna fulanno ishini gede ikkitino.
19 “Konnira Woꞌmunkura Aliidi Mootichi Yihowa togo yaanno: ‘Kiꞌne baalunku siwiila daaqinseenna fulanno ishini gede ikkitinoonni daafira, Yerusaalamete gamba asseemmoꞌne.
20 Birra, camo, siwiila, irsaasenna qorqorro gamba assine booso giirate worre daaqinsanninte gede, anino kiꞌne hanqiꞌyanninna aariꞌyanni gamba asse, giira qase daaqiseemmoꞌne.
21 Baalanka gamba asse hanqiꞌya giira qaseemmoꞌne; kiꞌneno ise giddo daaqqinanni.
22 Birra goolu giira giddo daaqinsanninte gede, kiꞌneno ise giddo daaqqinanni; hanqoꞌya kiꞌne aana dirrisoommohu ane Yihowa ikkoommotano affinanni.’”
23 Yihowa qaali galagale anewa daye togo yiie:
24 “Manchi beetto, togo yiise: ‘Ati hanqu barra keeraaꞌmattakki woy xeenu dirrannokki baattooti.
25 Masaalaanose diddishannohu ittananno doobbiichi gede, giddose gano gantanno. Insa manna* egemmitanno. Insa jajjanna ayirrado coye wolqatenni adhitanno. Qoleno giddose gunnootu batiꞌranno gede assitino.
26 Kakkalaanose seeraꞌya diiggino; qullaawa dargaꞌyano batteessa diagurtino. Qullaawu coyinna qullaawa ikkinokki coy mereero noo badooshshi leellanno gede diassitino; keeraanchonna battaawino coye bande anfanni gedeno diassitino; sambataꞌya ayirrisa gibbino; aneno batteessitinoe.
27 Giddose noo gashshaasine bibbiddanno hiyyeeyye gedeeti; insa hanaaqqe woxe afidhara mundee duntanno; mannano* shitanno.
28 Masaalaanose kayinni insa assitannorira noora gantanno. Insa kaphu ajuuja laꞌanno; kaphu kiilono kiiltanno; qoleno Yihowa mittoreno yiikkinni, “Woꞌmunkura Aliidi Mootichi Yihowa togo yaanno” yitanno.
29 Gobbate heeꞌranno manni hanaaqino; qoleno mulqiꞌrino; insa hawaaxantinorenna buxane miiccino; wole gobbanni dayno mancho hanaaqqino, hattono halaale wirtinosi.’
30 “‘Insa giddo kinchu huxxa gatamarannohu woy gobba baꞌannokki gede diigamino baycho albaꞌyaanni uurranno manchi heeꞌrakka yee hasoommo; kayinni mittu manchino dino.
31 Hakko daafira, hanqoꞌya aanansa duneemmo; aariꞌya giirannino coꞌo asse huneemmonsa. Doogonsa gumano uminsa aana abbeemmo,’ yaanno Woꞌmunkura Aliidi Mootichi Yihowa.”
Lekkaalliidi Qaagiishshuwa
^ Noo gedeenni tirriro, “yoo yaatto? yoo yaatto?”
^ Ibiraawootu qaali “fuda” yaanno qaali ledo xaadooshshe afiꞌrinoha ikkikkinni digatino; kuni qaali mitto coye mishate horoonsiꞌnanniho.
^ Woy “buxonna.”
^ Noo gedeenni tirriro, “anninsa teeda fantannori.”
^ Noo gedeenni tirriro, “wodanikki kaajje uurra dandaanno?”
^ Woy “lubbo.”
^ Woy “lubbono.”
