Hiziqeeli 45:1-25
45 “‘Baatto ragge assitine beekkinanni yannara, gama baatto Yihowara fushshaate assitine uyiyye; tini baatto qullaawa ikkitanno. Baatto seendille 25,000 cigile,* godowa 10,000 cigile ikkitona. Dargise gudisame* qullaawa qeecha ikkanno.
2 Tenne baatto giddoonni qullaawu minira ikkannohu seendille 500 cigilenna godowa 500 cigile* ikkannohu shoolenka midaado taalo ikkino dargi heeꞌranno; baalanka ragaanni 50 cigile ikkitannoti hayissote baatto heedhanno.
3 Bande fushshinoonni qeechi giddonni, seendille 25,000 cigilenna godowa 10,000 cigile ikkitannota bikki; lowo geeshsha qullaawa ikkinohu qullaawu mini hakko giddoonni heeꞌranno.
4 Tini baatto soqqantasira Yihowa albira shiqqannoriranna qullaawu mini soqqamaasine ikkitino kakkalaanora qullaawa qeecha ikkitanno. Qoleno minnansaranna qullaawu minira qullaawa darga ikkitanno.
5 “‘Qullaawu mini soqqamaasine ikkitinorira Leewaawootaho seendille 25,000 cigilenna godowa 10,000 cigile ikkanno qeechi iillannonsa; qoleno insa sagale intannita 20 kifilla ragge assite adhitanno.
6 “‘Kiꞌneno katamaho ragge ikkanno gede, seendille 25,000 cigile (qullaawa qeecha assine uynoonni baattora qoteho), hattono godowa 5,000 cigile ikkanno baycho uyiyye. Kuni baychi Israeelete mini baalaho ikkannoho.
7 “‘Qoleno roorrichaho, qullaawa qeecha ikkitino baatto widoonninna katamaho ikkara bandoonni baychi ragaanni baatto heedhannosi. Tini baatto qullaawu qeechi qotiranna katamu baatto qotira heedhanno. Galchimi ragaanninna soojjaati ragaanni heedhanno. Galchimi danninni kayse soojjaati danni geeshsha noose seendilli mitte gaꞌrera uynoonni qeechi ledo taaloho.
8 Tini baatto Israeelete giddo isi ragge ikkitanno. Roorrootiꞌya xaate mannaꞌya dimiiccanno; insa baatto Israeelete minira gaꞌre gaꞌrensa garinni uytanno.’
9 “Woꞌmunkura Aliidi Mootichi Yihowa togo yaanno: ‘Israeelete roorroota, horo ikkitinannitawe habbinoonni!’
“‘Bunsheꞌnenna manna gadadisaꞌne agurtine, taalo coyenna keeraanchimma asse. Manniꞌya jajja mulqiꞌra agurre,’ yaanno Woꞌmunkura Aliidi Mootichi Yihowa.
10 ‘Halaalaancho keenaasincho, halaalaancho iifete safaraanchonna* halaalaancho baadoosete safaraancho* horoonsidhe.
11 Iifete safaraanchiranna baadoosete safaraanchira mittu gari keenaasinchi heeꞌra hasiissannosi. Baadoosete safaraanchi tonnunni mitte anga homere* amadannoha ikkona; iifete safaraanchino tonnunni mitte anga homere amadannoha ikkona. Homere rosamino keenaasincho ikkitanno.
12 Mitte seqile* 20 geera* ikkitona. Qoleno 20 seqile, 25 seqilenna 15 seqile mitteenni lendeenna mitte maane* ikkitoꞌnena.’
13 “‘Aa hasiissannoꞌne fushshaati konneeti: Mitte mittente homere sindenni lewunni mitte anga iifenna mitte mittente homere hayxinni lewunni mitte anga iife fushsha hasiissannoꞌne.
14 Zaytete fushshaati baadoosete safaraanchinni safarroonniha ikka hasiissannosi. Mitte baadoose tonnunni mitte anga qorooseeti;* tonne baadoose mitte homere ledo taalo ikkitino daafira tonne baadoose mitte homereeti.
15 Israeelete saada mereerinnino lame lame xibbe geꞌrecho giddonni mitte uyiyye. Kuni geꞌreewi manna cubbinsanni keereensate gidu fushshaatira, shilqote kakkaloranna mittimmate kakkalora shiqinshanniho,’ yaanno Woꞌmunkura Aliidi Mootichi Yihowa.
16 “‘Gobbate noo manni baalunku konne fushshaate Israeelete roorrichira aanno.
17 Ayyaannate woggara, haaru agani fulanno yannara, Sambatu yannara, hattono Israeelete minira uynoonni ayyaanna baalante yannara shilqote kakkalo, gidu fushshaatenna agattote fushshaate shiqishannohu kayinni roorrichaho. Israeelete mine cubbinsanni keereensate cubbu kakkalo, gidu fushshaate, shilqote kakkalonna mittimmate kakkalo shiqishannohu isooti.’
18 “Woꞌmunkura Aliidi Mootichi Yihowa togo yaanno: ‘Umi aganira, aganaho umi barra, hoshshate giddonni muso afiꞌrinokki booto haadhe, qullaawa mine cubbunni keereensi.
19 Kakkalaanchu cubbu kakkalo assine shiqinshoonni mundee aaninni gama haaꞌre, qullaawu mini gafora, kakkalote dargi dirimira shoolente madderanna giddiidi hoowe waalchi gafora buurona.
20 Aye manchino hedikkinni woy afibbeelletenni cubbo loosiro, aganaho lamalki barra hatto assi; kiꞌneno qullaawa mine cubbunni keereensitinanni.
21 “‘Umi aganira, aganaho 14ki barra Faasiku Ayyaana ayirrissinanni. Lamalu barri geeshshano tima ittinanni.
22 Hakko barra roorrichu umisiranna gobbate noo manni baalu daafira mitto booto cubbu kakkalo asse shiqishanno.
23 Ayyaana ayirrinsannihu lamalu barri giddo, mitto mittonka barra muso afidhinokkire lamala boottanna muso afidhinokkire lamala geꞌreewu gocca Yihowara shilqote kakkalo asse shiqishanno; qoleno mitto mittonka barra mitto meichu goco cubbu kakkalo asse shiqishanno.
24 Qoleno mittu mittunku booti ledo mitte iife, mittu mittunku geꞌrechu goci ledono mitte iife gidu fushshaate shiqishona; mitte mittente iife ledono mitte hiine* zayte shiqishona.
25 “‘Lamalki aganira, aganaho 15ki barra, ayyaanu woggara lamalu barri geeshsha cubbu kakkalo, shilqote kakkalo, gidu fushshaatenna zayte konni garinni shiqishona.’”
Lekkaalliidi Qaagiishshuwa
^ Tini seeda cigileeti. Guwuursha B14 lai.
^ Woy “Dannise giddoonni noohu gudisame.”
^ Noo gedeenni tirriro, “500 500nni.”
^ Guwuursha B14 lai.
^ Guwuursha B14 lai.
^ Guwuursha B14 lai.
^ Guwuursha B14 lai.
^ Guwuursha B14 lai.
^ Woy “minaane.” Guwuursha B14 lai.
^ Guwuursha B14 lai.
^ Guwuursha B14 lai.
