Hiziqeeli 29:1-21
29 Tonnikki diro, tonnikki aganira tonaa layinki barra, Yihowa qaali anewa daye togo yiie:
2 “Manchi beetto, alba Gibitsete moote Feriooniwa higge isinna Gibitsete gobba baalate daafira masaalo coyiꞌri.
3 Togo yii: ‘Woꞌmunkura Aliidi Mootichi Yihowa togo yaanno:
“Abbay* xashshi mereero goxxe noottohu, jawu baaru moychi,Gibitsete moote Feriooni, kuneeti ani ate aana kaoommo;Ati ‘Abbay Lagi aneho.
Umiꞌyara seekkiꞌroommoho’ yootto.
4 Ani kayinni baqqaallikkira manxaqqo woreemmo; Abbay Lagikkira noo qulxuꞌme bisikkira* qaꞌmidhanno gede asseemmo.
Bisikkira qaꞌmidhinote Abbay qulxuꞌme baalate ledo Abbay Laginni fushsheemmohe.
5 Atenna Abbay Lagikkira noo qulxuꞌme baala halalla huneemmoꞌne.
Mullawa xawoho uwatto; gamba assannohehu woy kaysannohehu diheeꞌranno.
Baattote aana noo moychiranna iimi ceara sagale asseemmohe.
6 Hakkiinni Gibitsete heeꞌranno manni baalu ani Yihowa ikkoommota afanno;Korkaatuno insa kaaꞌlo Israeelete mannira shomboqqote siqqonni saꞌe diyitinote.
7 Insa anga amadduheta hiiqqaqqamitto;Qotensano qasitto.
Insa irkidhuheta hiiqqamitto;Lekkansano* leqe leqe yitanno gede assitto.”
8 “‘Hakko daafira Woꞌmunkura Aliidi Mootichi Yihowa togo yaanno: “Kuneeti ate aana bise abbeemmo; atewiinni mannano saadano gudeemmo.
9 Gibitsete gobba mullichonna ona ikkitanno; insano ani Yihowa ikkoommota affanno; korkaatuno ati* ‘Abbay Lagi aneho; ani seekkiꞌroommoho’ yootto.
10 Hakko daafira atenna Abbay Lagikki aana kaoommo; Gibitsete gobbano Migidooli, Seweenenna Itiyophiyu danni geeshsha mullicho, moolanna ona asseemmo.
11 Mannuno saadano hakkaanni higge disaꞌanno; 40 diri geeshsha hakko mannu diheeꞌranno.
12 Gibitsete gobba wole gobbuwanni roore ona asseemmo; katammaseno 40 diri geeshsha wole katammanni roore ona ikkitanno; Gibitsootano dagate mereero billaalliseemmo; gobbuwate mereerono fincaqqeemmonsa.”
13 “‘Hakko daafira Woꞌmunkura Aliidi Mootichi Yihowa togo yaanno: “Shoyilluu diri gedensaanni Gibitsoota billaallitino daga mereerinni galagale gamba asseemmo;
14 Qafadantino Gibitsoota gobbansa Phaaxiroosi qoleemmonsa; hakkiicho insa wolqiweelo gashshoote ikkitanno.
15 Gibitse wolu gashshooti baalunni ajjinota ikkitanno; xaate wole dagara diannattanno; woriidire asseemmonsa daafira wole daga digashshitanno.
16 Gibitse xaate Israeelete mini addaxxannota diꞌꞌikkitanno; hatteentenni Israeele Gibitse hexxite loossino cubbo qaagiissitannonsata calla ikkitanno. Insano ani Woꞌmunkura Aliidi Mooticha Yihowa ikkoommota affanno.”’”
17 Lemiina lamalki diro, umi aganira umi barra Yihowa qaali anewa daye togo yiie:
18 “Manchi beetto, Baabiloonete Moote Nabukadanatsoori* olantosi Xiroosi qassanni baasa daafurtanno gede assino. Umu baalu qulullaamo ikkino; qotu baaluno luqqaino. Isinna olantosi kayinni Xiroosi ledo olantu woyte daafurtino daafurira uynoonninsari dino.
19 “Hakko daafira Woꞌmunkura Aliidi Mootichi Yihowa togo yaanno: ‘Kuneeti Gibitsete gobba Baabiloonete Moote Nabukadanatsoorira* eemmo; isino jirose saamanno, horranno hattono mulqiꞌranno; hatto assannohu olantosi hunkiira baataraati.’
20 “‘Ise* qasanni dunino hunkiira Gibitsete gobba eemmosi; korkaatuno insa hatto assitinohu anera yiteeti,’ yaanno Woꞌmunkura Aliidi Mootichi Yihowa.
21 “Hakko barra Israeelete minira buudu fulanno gede asseemmo;* atino insa mereero coyiꞌratto gede faro faneemmohe; insano ani Yihowa ikkoommota affanno.”
Lekkaalliidi Qaagiishshuwa
^ Koyenna woroonni “Abbay” yinoonni qaali Abbay Laganna gorsasi leellishannoho.
^ Noo gedeenni tirriro, “gogikkira.”
^ Noo gedeenni tirriro, “hallinsa.”
^ Noo gedeenni tirriro, “isi.” Isi yinihu Feriooni ikkikkinni digatino.
^ Noo gedeenni tirriro, “Nabukadiretsoori.” Nabukadanatsoori suꞌma konni garinnino borreessinanni.
^ Noo gedeenni tirriro, “Nabukadiretsoori.” Nabukadanatsoori suꞌma konni garinnino borreessinanni.
^ Ise yiniti Xiroosiiti.
^ Woy “Israeelete minira jawaante eemmo.”
