Hiziqeeli 46:1-24
46 “Woꞌmunkura Aliidi Mootichi Yihowa togo yaanno: ‘Soojjaatoonni noohu giddiidi hoowe waalchi looso loonsanniha lee barra cufama hasiissannosi; Sambatu barranna haaru agani fulanno barra kayinni faꞌnama hasiissannosi.
2 Roorrichu gobbanni waalchu barandi widoonni hige eꞌꞌe, waalchu gafo mule uurranno. Kakkalaano shilqote kakkalosinna mittimmate kakkalosi shiqishshanno; isino waalchu xullichira heeꞌre kumbuulihu gedensaanni, fule haꞌranno. Waalchu kayinni hawarro geeshsha cufama dihasiissannosi.
3 Gobbate noo mannino Sambatu barranna haaru agani fulanno barra, waalchu xullichira Yihowa albaanni kumbuulanno.
4 “‘Roorrichu Sambatu barra Yihowara shilqote kakkalo asse shiqishanno saada, muso afiꞌrinokkire lee geꞌreewu wiliiꞌlenna muso afiꞌrinokkiha mitto geꞌrechu goco ikka hasiissanno.
5 Gidu fushshaate geꞌrechu goci ledo mitte iife,* geꞌreewu wiliiꞌli ledo kayinni wolqasi assitu deerrinni shiqishona; qoleno mitte mittente iife ledo mitte hiine* zayte shiqishona.
6 Haaru agani fulanno barra, hoshshate giddonni muso afiꞌrinokkiha mitto booto, lee geꞌreewu wiliiꞌlenna mitto geꞌrechu goco fushshaate asse shiqishanno; baalunku muso afiꞌrinokkire ikka hasiissannonsa.
7 Gidu fushshaate bootu ledo mitte iife, geꞌrechu goci ledono mitte iife, geꞌreewu wiliiꞌli ledo kayinni wolqasi assitu deerrinni shiqishona. Mitte mittente iife ledono mitte hiine zayte shiqishona.
8 “‘Roorrichu eanno woyte, waalchu barandi widoonni hige eona; fulanno woyteno hakkaanni hige fulona.
9 Gobbate noo manni ayyaannate woggara Yihowa albira shiqanno woyte, magansiꞌrara aliyye waalchi widoonni eannohu wodiidi waalchi widoonni fulona; wodiidi waalchi widoonni eannohu kayinni aliyye waalchi widoonni fulona. Aye manchino duumbara hige eino waalchi widoonni fula dihasiissannosi; fula hasiissannonsahu albaanni noohu wolu waalchi widoonniiti.
10 Mereeronsa noo roorrichi mannu eanno woyte eona; fulanno woyteno fulona.
11 Ayyaannate* woggara gidu fushshaate bootu ledo mitte iife, geꞌrechu goci ledono mitte iife, geꞌreewu wiliiꞌli ledo kayinni wolqasi assitu deerrinni shiqishona; mitte mittente iife ledono mitte hiine zayte shiqishona.
12 “‘Roorrichu shilqote kakkalo woy mittimmate kakkalo Yihowara baxe umisinni shiqishiꞌra hasiꞌriro, soojjaati waalcho fannannisi; isino Sambatu barra assannonte gede, shilqote kakkalosinna mittimmate kakkalosi shiqishiꞌranno. Isi fule haꞌrihu gedensaanni, waalcho cunfona.
13 “‘Barru barrunku muso afiꞌrinokkiha mittu diriha geꞌrechu wiliiꞌlicho shilqote kakkalo assite Yihowara shiqishi. Soodo soodonte hatto assi.
14 Konni ledono soodo soodonte lewunni mitte anga iife gidu fushshaate, hattono liiqo bulleera dunnannita sasunni mitte anga hiine ikkitanno zayte Yihowara woꞌmu woytiha gidu fushshate assite shiqishi. Tini soorrantannokki wodhooti.
15 Soodo soodonte geꞌrechu wiliiꞌlicho, gidu fushshaatenna zayte woꞌmu woytita shilqote kakkalo assite shiqishshona.’
16 “Woꞌmunkura Aliidi Mootichi Yihowa togo yaanno: ‘Roorrichu mittu mittunku labballi oososira iqqu gede asse afansha uyinsaro, hakku afanshi insa miinjaati. Iqqinoonninsa jajjaati.
17 Ikkollana roorrichu mittu soqqamaanchisira raggesi giddonni afansha uyro, wolaphanno diri iilla geeshsha isiha ikkanno; hakkunni gedensaanni kayinni roorrichaho qolanno. Geedote uminsaha ikke gatannohu oososi iqqa callaho.
18 Roorrichu manna qaensanni shorre iqqansa adha dihasiissannosi. Manniꞌya giddonni mittuno jajjisi aaninni shorramannokki gede, isi labballi oososira iqqa umisi baattonni aa hasiissannosi.’”
19 Hakkiinni, aliyye wido higge noote kakkalaano sagale ittannote qullaawa kifillawa massanno waalchi mule noo xullichi widoonni qole abbie; hakkiicho galchimaanni, badheenni hige mittu dargi nooha laummo.
20 Isino togo yiie: “Kakkalaano mitto coyeno gobbaydi hoowe haadhe fushshite qullaambe mannaho sayissannokki gede,* saote kakkaloranna cubbu kakkalora shiqinshoonni maala gaffannohunna gidu fushshaate tima gantanno dargi konneeti.”
21 Gobbaydi hoowewa haaꞌre fushshiehu gedensaanni, shoolente hoowete qasiro widoonni qole saysie; gobbaydi hoowera mitte mittente qasirora mitte hoowe laummo.
22 Shoolente qasirora seendille 40 cigile,* godowa 30 cigile ikkitannoti shiimmaadda hoowe no. Shoolenti geeshsha taaloho.*
23 Shoolentera gaangaawaho kinchu huxxi* no; qoleno kinchu huxxira woroonni kakkalote shiqino maala ganfanni darguwa no.
24 Hakkiinni togo yiie: “Tini qullaawu mini soqqamaasine mannu kakkalote abbiꞌrino maala gaffanno minnaati.”
Lekkaalliidi Qaagiishshuwa
^ Guwuursha B14 lai.
^ Guwuursha B14 lai.
^ Woy “Jajjabba ayyaannanna qullaawa barruwa.”
^ Noo gedeenni tirriro, “manna qullaawa assitannokki gede.”
^ Tini seeda cigileeti. Guwuursha B14 lai.
^ Woy “Shoolentinna qasiꞌronsa suudi geeshsha taaloho.”
^ Woy “dirimu.”
