Hiziqeeli 36:1-38
36 “Ati kayinni manchi beetto, Israeelete ilaalla daafira masaalo coyiꞌri; togo yii: ‘Israeelete ilaalla, Yihowa qaale macciishshe.
2 Woꞌmunkura Aliidi Mootichi Yihowa togo yaanno: “Diinu kiꞌne daafira togo yiino: ‘Hashshu! Biꞌre biꞌreehu gotti yiino dargi nafa ninkehawe ikki!’”’
3 “Hakko daafira togo yite masaalo coyiꞌri: ‘Woꞌmunkura Aliidi Mootichi Yihowa togo yaanno: “Dagate giddonni gattinorira ragge ikkitinanni gedenna mannu kiꞌne daafira hasaawanni suꞌmaꞌne hunanno gede, ona assitinoꞌnehuranna duuchunku raginni dagge qassinoꞌne daafira,
4 Israeelete ilaalla, Woꞌmunkura Aliidi Mootichiha Yihowa qaale macciishshe! Woꞌmunkura Aliidi Mootichi Yihowa ilaallatenna tulluwate, laggatenna xeichuwate, diigame onino dargira, qooxeessinsara noo daga giddonni gattinori saantinonna qacifattinote facci assine agurroonni katammara togo yaanno;
5 Woꞌmunkura Aliidi Mootichi Yihowa kurira togo yaanno: ‘Qanchose adhitaranna saantara, lowo geeshsha hagiidhitenna celleeqatte* baattoꞌya ninkete yitinorira, dagate giddonni gattinoriranna Edoomi baatto baalate, buwanno hanqiꞌyanni coyiꞌreemmo.’”’
6 “Konnira Israeelete baatto daafira masaalo coyiꞌri; qoleno ilaallatenna tulluwate, hattono laggatenna xeichuwate togo yii: ‘Woꞌmunkura Aliidi Mootichi Yihowa togo yaanno: “Kuneeti! Daga shollishshinoꞌne daafira, lowo geeshsha laalaatenna hanqe coyiꞌreemmo.”’
7 “Hakko daafira Woꞌmunkura Aliidi Mootichi Yihowa togo yaanno: ‘Qooxeessaho heedhanno daga uminsa saala duqqitanno gede, angaꞌya kayse xaareemmo.
8 Kiꞌne Israeelete ilaalla kayinni, sinna fushshitine manniꞌyara Israeelete guma laaltinanni; korkaatuno insa mulenni higganno.
9 Ani ledoꞌne noommo; albano kiꞌnewa higeemmo; qoleno kiꞌne loonse wixa winxanniꞌne.
10 Mannaꞌne yaano Israeelete mine gudise, baalanka batiseemmo; katammano mannu heeꞌrannota ikkitanno; diigaminohano galagalle minnanni.
11 Ee, mannaꞌnenna saadaꞌne batiseemmo; insano batidhanno hattono sirtanno. Qoleno albi gede mannu heeꞌrannore asseemmoꞌne; albinni roorseno latiseemmoꞌne; kiꞌneno ani Yihowa ikkoommota affinanni.
12 Mannu yaano manniꞌya Israeele, kiꞌne aana hadhanno gede asseemmo; insa ragidhannoꞌne. Kiꞌneno raggensa ikkitinanni; insano xaate kiꞌnenni kainohunni ilaweeloota diꞌꞌikkitanno.’”
13 “Woꞌmunkura Aliidi Mootichi Yihowa togo yaanno: ‘Insa kiꞌne “Manna ittannotenna dagaꞌne ooso xoqoltanno baattooti” yitinoꞌne daafira,’
14 ‘xaate manna diꞌꞌittinanni; dagaꞌneno ilaweelo diassitinanni,’ yaanno Woꞌmunkura Aliidi Mootichi Yihowa.
15 ‘Xaate daga xontaꞌnera woy mannu qacifataꞌnera wore diagureemmoꞌne; qoleno xaate dagaꞌnera guficho diꞌꞌikkitinanni,’ yaanno Woꞌmunkura Aliidi Mootichi Yihowa.”
16 Xaano Yihowa qaali galagale anewa daye togo yiie:
17 “Manchi beetto, Israeelete mini gobbansara heeꞌranno yannara, doogonsanninna assootinsanni gobbansa batteessino. Doogonsa ane albaanni, godowu daynose mancho gede battaabbinote.
18 Hakko daafira, baattote aana mundee duntinohuranna tiyyiꞌnanni magannansanni* baatto batteessitino daafira, hanqoꞌya aanansa dunoommo.
19 Konnira dagate mereero billaallisoommonsa; gobba baalateno fincaqqoommonsa. Doogonsanna assootinsa garinni yoo yoommonsa.
20 Ikkollana insa tenne dagawa dagguta, mannu insa daafira ‘Kuni Yihowa mannaati; ikkirono baattosi agure fulino’ yaanni qullaawa suꞌmaꞌya batteessino.
21 Konni daafira, Israeelete mini marino daga mereero batteessinohu qullaawu suꞌmiꞌyara yee qaafo adheemmo.”
22 “Hakko daafira Israeelete minira togo yii: ‘Woꞌmunkura Aliidi Mootichi Yihowa togo yaanno: “Israeelete mine, qaafo adheemmohu kiꞌnera yee ikkikkinni, martinoonni daga mereero batteessitinoonnihu qullaawu suꞌmiꞌyara yeeti.”’
23 ‘Dagate mereero batteessitineenna mereeronsa battaawinoha jawa suꞌmaꞌya addinta qullaawa asseemmo; qoleno albansaanni mereeroꞌne qullaawa ikkeemmo woyte, daga ani Yihowa ikkoommota affanno,’ yaanno Woꞌmunkura Aliidi Mootichi Yihowa.
24 ‘Dagate mereerinni fushsheemmoꞌne; gobba baalatennino gamba asse gobbaꞌne qoleemmoꞌne.
25 Xalala waa wixeemmoꞌne, kiꞌneno keeraaꞌmitinanni; batteꞌne baalatenninna tiyyiꞌnanni magannaꞌne baalatenni keereenseemmoꞌne.
26 Haaro wodana eemmoꞌne; giddoꞌneno haaro ayyaana woreemmo. Kincho wodana giddoꞌnenni hoole, maalu wodana* eemmoꞌne.
27 Ayyaanaꞌya giddoꞌne woreemmo; wodhoꞌya garinni heedhinanni gede asseemmoꞌne; yooꞌyano agadhitinanni, qoleno wonshitinanni.
28 Hakkiinni albi annuwaꞌnera oommo baattora heedhinanni; kiꞌne mannaꞌya ikkitinanni, anino Maganoꞌne ikkeemmo.’
29 “‘Batteꞌne baalatenni gatiseemmoꞌne; qoleno gide gamba asse batiseemmo; xaate hude diabbeemmoꞌne.
30 Xaate layinkita dagate mereero hudidhine shollitinannikki gede, haqqete laalonna gati laalcho batiseemmo.
31 Hakkiinni busha doogoꞌnenna dancha ikkinokki assooteꞌne qaagginanni; qoleno cubbiꞌnenninna mancau loosiꞌnenni kainohunni kiꞌneneeto boshshidhine gibbinanni.
32 Kayinni tenne habbinoonte: Tenne assanni noommohu dikiꞌnera yeeti,’ yaanno Woꞌmunkura Aliidi Mootichi Yihowa. ‘Hatteentenni, Israeelete mine, doogoꞌnenni kainohunni saalfatte; saalano duqqe.’
33 “Woꞌmunkura Aliidi Mootichi Yihowa togo yaanno: ‘Cubbiꞌne baalunni keereenseemmoꞌne barra, katammate mannu heeꞌranno gedenna diigamino dargano galagalle minnanni gede asseemmo.
34 Saꞌꞌannohunna higannohu baalu laꞌꞌannota ona baatto loonsanni.
35 Mannuno togo yaanno: “Ona baatto Edenete base gedeetawe ikkitu; diigante mulla darga ikkitino katammano qiishonnitanna mannu heeꞌrannota ikkitino.”
36 Qoleno qooxeessiꞌnera gattino daga diigaminoha minoommohunna mullicho baatto latisoommohu ane Yihowa umoꞌya ikkoommota affanno. Tenne coyiꞌroommohu ani Yihowaati; coyiꞌroommoreno assoommo.’
37 “Woꞌmunkura Aliidi Mootichi Yihowa togo yaanno: ‘Israeelete mini tenne assammonsara xaꞌmiꞌrannoe gede fajjeemmo: Mannansa hoshshate gede batiseemmo.
38 Qullaawootu hoshshanna ayyaana ayirrinsanni yannara Yerusaalamete heedhanno hoshsha gede,* alba diigante keeshshitino katammara mannu hoshsha woꞌmitanno; insano ani Yihowa ikkoommota affanno.’”
Lekkaalliidi Qaagiishshuwa
^ Woy “lubbonsanni mishshe.”
^ Ibiraawootu qaali “fuda” yaanno qaali ledo xaadooshshe afiꞌrinoha ikkikkinni digatino; kuni qaali mitto coye mishate horoonsiꞌnanniho.
^ Maganu biddishsha agadhate rahino wodana yaate.
^ “Yerusaalamete kakkalote shiqinshanni geꞌreewi hoshsha gede” yaano ikkara dandaanno.
