Hiziqeeli 39:1-29
39 “Manchi beetto, Googi daafira masaalo coyiꞌri; isira togo yii: ‘Woꞌmunkura Aliidi Mootichi Yihowa togo yaanno: “Mesheeqinna Tubaalihu qaru roorrichi* Googi, ani ate aana kaoommo.
2 Higatto gede asseemmohe; qoleno xeertote noote aliyye gobbanni fushshe daatto gede asseemmohe; hattono Israeelete ilaallawa abbeemmohe.
3 Guracho angakkira noo digaananna qiniiticho angakkira noo worbicho gane tugeemmo.
4 Israeelete ilaalla aana uwatto; atinna olantokki baala, hattono ledokki noo manni ubbinanni. Allaattetenna dubbu moychira sagale ikkatto gede asseemmohe.”’
5 “‘Tenne coyiꞌroommohu ane ikkoommo daafira, mullu xawira uwatto,’ yaanno Woꞌmunkura Aliidi Mootichi Yihowa.
6 “‘Qoleno Maagoogiranna giddichuwate beꞌe yitukkinni heedhannorira giira soyemmo; insano ani Yihowa ikkoommota affanno.
7 Qullaawu suꞌmiꞌya manniꞌya Israeelete mereero egennamanno gede asseemmo; qoleno xaate qullaawu suꞌmiꞌya battaawara wore diagureemmo; dagano ani Israeelete gobbara Qullaawa Magano Yihowa ikkoommota affanno.’
8 “‘Ee, kuni coy daanno; qoleno ikkanno,’ yaanno Woꞌmunkura Aliidi Mootichi Yihowa. ‘Kuni ani balaxe kuloommo barraati.
9 Israeelete katammara heeꞌranno manni fule olu bagado yaano shiimmaadda wonqonna* jajjabba wonqo, digaananna worbicho, olu dullanna* urde gamba asse giira qasanno. Insa lamala diro giira konni uduunninni giidhitanno.
10 Insa konne uduunne giidhitanno daafira, xawunni haqqe hiiqqiꞌra woy dubbunni giidhinanni haqqe gamba assiꞌra dihasiissannonsa.’
“‘Insa mulqiꞌrinonsa manna mulqidhanno; jajjansa saantinoreno saantanno,’ yaanno Woꞌmunkura Aliidi Mootichi Yihowa.
11 “‘Hakko barra, Israeelete gobbara baaraho soojjaatoonni haꞌranno manni lagichira Googira waammate baycho eemmosi; hakku baychi saꞌꞌanno mannira doogo cufanno. Googinna olantosi baala hakko madaartanno; hakkonne darga Hamooni-Googi Lagicha* yitanno.
12 Israeelete mini gobba keereensate insa madaaranni lamala agana keeshshanno.
13 Gobbate noo manni baalu insa madaaranno; tinino aneneeto gotti gotti asseemmo barra ayirrinye ikkitannonsa,’ yaanno Woꞌmunkura Aliidi Mootichi Yihowa.
14 “‘Baatto keereensate, yannate kiiro gobbate giddoonni saꞌꞌannohanna baattote aana gatino reeshsha madaaranno manna worranni. Insa gatino reeshsha hassanni lamala agana keeshshitanno.
15 Gobbate giddoonni saꞌannori mannu miqicho affanno woyte, malaatissanno. Hakkiinni madaartara worroonniri miqicho haadhe Hamooni-Googi Lagichira madaartanno.
16 Qoleno hakkiicho Hamoona* yinanni katamino heeꞌranno. Insano gobba keereensitanno.’
17 “Manchi beetto, Woꞌmunkura Aliidi Mootichi Yihowa togo yaanno: ‘Duuchunku gari ceanna dubbu moychira baalaho togo yii: “Gamba yitine amme. Qixxeessoommoꞌne kakkalo doyissitine gamba yiiyye; Israeelete ilaalla aana lowo kakkalo qixxeessoommoꞌne. Maala ittinanni, mundeeno agginanni.
18 Wolqaataammu maala ittinanni; uullate roorrooti mundeeno agginanni; insa geꞌreewu goccaati, geꞌreewu wiliiꞌleeti, meu goccaatinna boottate; baalunku harditinote Baasaani saadaati.
19 Qixxeessoommoꞌne kakkalonni cooma kokke daaꞌne geeshsha ittinanni; mundeeno dimbitina geeshsha agginanni.”’
20 “‘Kakkalote dargaꞌya faradunna saragalla guluffannori maala, hattono wolqaataammunna duuchunku gari bagadaasine maala ittine duubbinanni,’ yaanno Woꞌmunkura Aliidi Mootichi Yihowa.
21 “‘Dagate mereero ayirrinyeꞌya leellisheemmo; daga baalano yooꞌya wonshoommo garanna mereeronsa leellishoommo wolqa* laꞌanno.
22 Hakko barrinni kayse Israeelete mini ani Maganonsa Yihowa ikkoommota afanno.
23 Dagano Israeelete mini qafadame haꞌrinohu uminsa soꞌronni ikkinota affanno; korkaatuno insa anera diammanantino. Hakko daafira alba shawwu yoommonsa; qoleno diinnansara sayse oommonsa; baalanka bisetenni shinoonni.
24 Battensanna saonsa garinni qoloommonsa; albano shawwu yoommonsa.’
25 “Konnira Woꞌmunkura Aliidi Mootichi Yihowa togo yaanno: ‘Qafadame haꞌrinoha Yaaqoobi sircho qoleemmo; Israeelete mine baalano maareemmo; qoleno qullaawu suꞌmiꞌya daafira diinaggaawe gaarameemmo.*
26 Anera ammanama hoogansanni assitinoe sao baalantera shollinye adhituhu gedensaanni, waajjishannonsahu nookkiha baattonsara teesse heedhanno.
27 Dagate mereerinni qoleemmonsa woytenna diinnansa gobbanni gamba asseemmonsa woyte, batinye daga albaanni mereeronsa aneneeto qullaawa asseemmo.’
28 “‘Dagate mereero qafadante hadhanno gede asseemmonsa woytenna mittuno gatikkinni galagale gobbansa qoleemmonsa woyte, ani Maganonsa Yihowa ikkoommota affanno.
29 Ayyaanaꞌya Israeelete minira duneemmo daafira, xaate alba shawwu diyeemmonsa,’ yaanno Woꞌmunkura Aliidi Mootichi Yihowa.”
Lekkaalliidi Qaagiishshuwa
^ Woy “qaru gashshaanchi.”
^ Roore anga digaana amaddannori wonqidhanno wonqo.
^ “Dulla” yaano ikkara dandaanno. Olaho horoonsiꞌnannita qaraame siqqo.
^ Woy “Googi Olanto Lagicha.”
^ “Lowo daga” yaate.
^ Noo gedeenni tirriro, “anga.”
^ Woy “qullaawu suꞌmiꞌyara hinaaseemmo.”
