Hiziqeeli 33:1-33
33 Hakkiinni Yihowa qaali anewa daye togo yiie:
2 “Manchi beetto, mannikkira coyiꞌri; togo yiinsa:“‘Hanni mitte gobbara ani bise abbeenna, hatte gobba manni baalu mitto mancho haaꞌre agaraancho assiꞌrino yine hendo;
3 isino gobbate aana bise dagganna lae, xurumba ufuufe manna qorophisiisi.
4 Mittu manchi xurumbu huuro macciishshe heeꞌrenni qorophishsha dulli asse agurironna bise dagge lubbosi hunturo,* reyosira isi umisi xaꞌmamanno.*
5 Isi xurumbu huuro macciishshino; kayinni qorophishsha lashshi asse agurino. Reyosira xaꞌmamannohu iso umosiiti.* Qorophishsha macciishshinoha ikkoommero, lubbosi gattannohu baino.
6 “‘Kayinni agaraanchu bise dagganna lae xurumba ufuufa hoogironna manna qorophisiisannohu hoogeenna bise dagge insa giddo mittu lubbo hunturo, hakku manchi cubbisira reyanno; mundeesira kayinni agaraancho xaꞌmeemmo.’
7 “Manchi beetto, ate Israeelete minira agaraancho asse shoomoommohe; afiiꞌyanni fulanno qaale macciishshatto woyte, qorophishshaꞌya kulinsa.
8 Ani busha mancho ‘Koo busha mancho, addinta reyatto!’ yeenna, ati kayinni kuni manchi raga higanno gede qorophisiisa hoogittoro, isi busha ikkino daafira cubbisinni kainohunni reyanno; mundeesira kayinni ate xaꞌmeemmohe.
9 Ikkollana bushu manchi doogosi agure higanno gede qorophisiisseenna raga higa giwiro, isi bunshesinni kainohunni reyanno; ati kayinni lubbokki gatisiꞌratto.
10 “Manchi beetto, Israeelete minira togo yii: ‘Kiꞌne togo yitinoonni: “Bunshenkenna cubbinke duhu gede ayirre daafursinonke; ikkina lubbote hiitto ikkine heeꞌneemmo?”’
11 Togo yiinsa: “Heeshshote Magano ikkaꞌyanni xaareemmona,” yaanno Woꞌmunkura Aliidi Mootichi Yihowa, “Bushu manchi reyonni dihagiidheemmo; hatteentenni bushu manchi doogosi biddi assiꞌre lubbote heeꞌrara hasiꞌreemmo. Israeelete mine, higge; busha doogoꞌne agurtine higge; hanni mayra reytinanni?”’
12 “Manchi beetto, mannikkira togo yiinsa: ‘Keeraanchu manchi bunshe assiro, keeraanchimmasi digatissannosi; qoleno bushu manchi bunshesi agure higiro, bunshesi guficho diꞌꞌikkitannosi; aye keeraanchino cubbo loosino barra, keeraanchimmasi lubbote heeꞌranno gede assitasira didandiitanno.
13 Keeraancho mancho, “Addinta lubbote heeꞌratto” yuummoronna, isino keeraanchimmasi addaxxe bunshe* assiro, keeraanchimmate loosisi giddo mittono diqaanganni; hatteentenni assino bunshera reyanno.
14 “‘Qoleno busha mancho “Addinta reyatto” yuummoronna, cubbosi agure hige gara ikkinorenna keeraanchimma assiro,
15 qoleno kuni manchi amadisiinsoonni uduunne qoliro, mulqiꞌrinoha qole uyronna bunshe assa agure heeshsho uytanno wodhonni qaafiro, isi addinta lubbote heeꞌranno. Isi direyanno.
16 Loosino cubbi giddo mittohono dixaꞌminannisi.* Gara ikkinorenna keeraanchimma assino daafira, addintanni lubbote heeꞌranno.’
17 “Ikkollana mannikki ‘Yihowa doogo ditaalote’ yiino; taalo ikkitinokkiti kayinni insa doogooti.
18 “Keeraanchu manchi keeraanchimmasi facci asse agure bunshe assiro, bunshesira reya hasiissannosi.
19 Ikkollana bushu manchi bunshesi agure hige, gara ikkinorenna keeraanchimma assiro, hatto assino daafira lubbote heeꞌranno.
20 “Kiꞌne kayinni, ‘Yihowa doogo ditaalote’ yitinoonni. Israeelete mine, mittu mittunkura doogoꞌne garinni yoo yeemmoꞌne.”
21 Lowo diri gedensaanni yaano qafadammummohunni 12ki diro, tonnikki aganira ontikki barra, Yerusaalametenni xooqe fulinohu mittu manchi anewa daye, “Katamu diigame baino!” yiie.
22 Xooqe fulino manchi daara albaanni noo hashsha, Yihowa anga anewa daggu; isino manchu soodo anewa daara albaanni afoo fanie. Hakko daafira, afiiꞌya faꞌnameenna galagale coyiꞌra hanafummo.
23 Hakkiinni Yihowa qaali anewa daye togo yiie:
24 “Manchi beetto, tenne diigantino katammara heeꞌranno manni Israeelete baatto daafira togo yaanni no: ‘Abirihaami mitto mancho ikke heeꞌrenni, baatto adhino. Ninke kayinni batinyeho; hakko daafira addinta baatto ninketa ikkase digattanno.’
25 “Konni daafira togo yiinsa: ‘Woꞌmunkura Aliidi Mootichi Yihowa togo yaanno: “Maala mundeente ledo ittinanni; tiyyiꞌnanni magannaꞌne* addaxxitinanni; qoleno mundee duntinanni. Ikkina baatto hiitto ikkite kiꞌneta ikkitanno?
26 Biseꞌne addaxxitinoonni; mancaꞌꞌa coye assitinanni; qoleno mittu mittunku olliichiꞌne galte batteessitinoonni. Ikkina baatto hiitto ikkite kiꞌneta ikkitanno?”’
27 “Togo yaattonsa: ‘Woꞌmunkura Aliidi Mootichi Yihowa togo yaanno: “Heeshshote Magano ikkaꞌyanni xaareemmona, diigantino katammara heedhannori bisetenni gooffanno; xawoho heedhannore dubbu moychira sagale asse eemmo; qiishotenna goddate heedhannori dhibbunni reytanno.
28 Baatto gudisante mullichonna ona ikkitanno gede asseemmo; quwa saꞌino naaxxaseno gattanno; Israeelete ilaallano ontanno; hakkaanni hige saꞌꞌannohuno diheeꞌranno.
29 Insa assitinohu mancau coy baalunni kainohunni baatto gudise mullichonna ona asseemmo woyte, ani Yihowa ikkoommota affanno.”’
30 “Manchi beetto, mannikki huxxu mulenna minnate xullichira heeꞌre, insa insanaawa ate daafira hasaawanni no. Insa mittu mittunku rodiisira, ‘Amme, Yihowawiinni daanno qaale macciishshinona’ yaanni no.
31 Insa manniꞌya gede, albakkiinni dagge ofoltanno; coyiꞌrattore macciishshitanno; kayinni diwonshitanno. Korkaatuno afiinsanni dogge guwissannohe;* wodaninsa kayinni doogimale qiniite afiꞌrate hafuurannoho.
32 Kuneeti! Ati insara gingilaate dancha gede gannanna, dancha huuronni sirbinoonnihu baxillu sirbi gedeeti. Insa coyiꞌrattore macciishshitanno; kayinni wonshannohu mittuno dino.
33 Kuni ikkanno woyte, hige ikkasino digattannona, mereeronsa masaalaanchu noota affanno.”
Lekkaalliidi Qaagiishshuwa
^ Noo gedeenni tirriro, “haadhe hooltusiro.”
^ Noo gedeenni tirriro, “mundeesi umisi aana heedhanno.”
^ Noo gedeenni tirriro, “mundeesi isi aana heedhanno.”
^ Woy “taalo ikkinokkire assiro.”
^ Noo gedeenni tirriro, “mittono diqaanganni.”
^ Ibiraawootu qaali “fuda” yaanno qaali ledo xaadooshshe afiꞌrinoha ikkikkinni digatino; kuni qaali mitto coye mishate horoonsiꞌnanniho.
^ Woy “quqquxantinori gede ikkite coydhanno.”
