Hiziqeeli 4:1-17
4 “Atino manchi beetto, xuube haadhe albakkiinni wodhi. Ise aanano Yerusaalamete katama sumudi.
2 Hakkiinni iso doyissi; gaangeessite kinchu huxxa huxxi; huxxaho gamba assite bushsha duuni; olu qachuwano seekki; qooxoteno kinchu huxxa diinganni heelliicho wori.
3 Siwiilu mixashsho haadhe atenna katamu mereero huxxu gede assite uurrisi. Hakkiinni alba katamu widira higi; katamu doyissamanno; atino doyissatto. Kuni Israeelete minira malaateho.
4 “Hakkiinni gurachu midaadinni goxi; Israeelete mini cubbino aanakki* heeꞌranno. Midaadikkinni goxatto barra baala cubbonsa duqqatto.
5 Insa cubbo loossino diri deerrinni, 390 barra eemmohe; atino Israeelete mini cubbo duqqatto.
6 Oommohe barrano guda hasiissannohe.
“Hakkiinni layinkimeeshsho qiniitichu midaadinni goxxe, Yihudu mini cubbo 40 barra duqqatto. Mittu mittunku dirira mitto mitto barra oommohe.
7 Atino anga edhite alba doyissante noo Yerusaalamewa higatto; ise daafirano masaalo coyiꞌratto.
8 “Kuneeti! Katama doyissatto barri goofikkinni midaado higattokki gede, siiwotenni usureemmohe.
9 “Qoleno sinde, hayxe, baaqeela, missira, bashanqanna ajja haadhe mitteenni karsite daabbo gaꞌni. Midaadunni goxattoha 390 barra woꞌma ise itatto.
10 Barru barrunku 20 seqile* keente itatto. Qoleno rosantino saatera itatto.
11 “Waano hiinetenni mitto leekkiha* bikkite agatto. Qoleno rosantino saatera agatto.
12 “Hayxu tima itatto garinni itatto; moola lowiidi shuma giidhite, insa laꞌanna daabbo gaꞌnite itatto.”
13 Hakkiinni Yihowa togo yii: “Israeele billaalliseemmonsa daga mereero konni garinni battaabbino daabbo ittanno.”
14 Hakkiinni ani togo yuummo: “Woꞌmunkura Aliidi Mooticha Yihowa, hatto ikkoonke ballo! Anjeꞌyanni kayse xaa geeshsha, reytino saada woy moychu shiino saada maala ite battaawe diegennoommo;* battaawino* maalano afiiꞌyara wodhe diegennoommo.”
15 Isino togo yiie: “Maahoyyena, mannu shuma agurte, obbikose giidhite daabbo isenni gaꞌni.”
16 Hakkiinni togo yiie: “Manchi beetto, Yerusaalamete shiqqanno sagale uurritanno gede asseemmo;* shiima daabbo keenne uyneenna lowo geeshsha yaaddanni ittanno; waano shiima shiima bikkine uyneenna massanni agganno.
17 Kuni ikkannohu daabbonna waa hoogge, masse mimmito laꞌanno gedeetinna cubbinsanni kainohunni jaabbe qooqqete fultanno gedeeti.
Lekkaalliidi Qaagiishshuwa
^ Noo gedeenni tirriro, “aana.” Kunino Hiziqeeliho guracho midaadooti.
^ 230 giraame balla ikkitanno. Guwuursha B14 lai.
^ 0.6 litire balla. Guwuursha B14 lai.
^ Woy “lubboꞌya battaabbe diegentino.”
^ Woy “bowino.”
^ Noo gedeenni tirriro, “daabbote dulluwa hiiqqeemmo.” Daabbo duunnanni dulluwa ikkitukkinni digattino.
