Hiziqeeli 21:1-32
21 Yihowa qaali galagale anewa daye togo yiie:
2 “Manchi beetto, alba Yerusaalamete widira higge, qullaawu dargi daafiranna Israeelete gobba daafira masaalo coyiꞌri.
3 Israeelete gobbara togo yii: ‘Yihowa togo yaanno: “Kuneeti ani ate aana kaoommo; biseꞌya kou giddonni fushshe ate giddonni keeraanono bushuulleno gudeemmo.
4 Keeraanono bushuulleno ate giddonni gudeemmo daafira, biseꞌya wodiidinni aliyye geeshsha noo manna* baala qassara kou giddonni fultanno.
5 Biseꞌya kou giddonni fushshoommohu ane Yihowa umoꞌya ikkoommota mannu baalu afanno. Iseno galagalte kou giddora dihigganno.”’
6 “Manchi beetto, huxidhanni* uri; ee, insara albaanni dadillunni uri.
7 Insa ‘Mayra urtanni nootto?’ yite xaꞌmituhero, togo yii: ‘Macciishshoommo duduwi heeꞌreennaati.’ Korkaatuno macciishshitini coy woꞌmanno; qoleno wodanu baalu waajje daaqanno; anga baalano shaqqitanno; mannu baalu hexxo mudhanno; gulubba baalateno way cophi cophi yaanno.* ‘Kuneeti! Addinta ikkanno; qoleno woꞌmikkinni digatanno,’ yaanno Woꞌmunkura Aliidi Mootichi Yihowa.”
8 Yihowa qaali galagale anewa daye togo yiie:
9 “Manchi beetto, togo yite masaalo coyiꞌri: ‘Yihowa togo yaanno: “Bise! Bise gamanxoonni; qoleno fiinoonni.
10 Lowo manna gorritara gamanxoonni; banqote gede ikkite xabbarano fiinoonni.”’”
“Hagiidha dihasiissannonkeyya?”
“‘Wole haqqe baala mishshu gede, ise* beettiꞌya siqqicho mishshanno?
11 “‘Ise feye anga amaxxannohura uynoonni. Tenne bise gamanxenna fiine, shaannohu anga worroonni.
12 “‘Manchi beetto, manniꞌyara bise dagginona, diddanni raari; Israeelete roorrooti baalaho dagganno. Insa manniꞌya ledo bisetenni gooffanno. Hakko daafira dadillunni giwooda gaꞌni.
13 Korkaatuno mannaꞌya qonqolchinoonni; ikkina bise siqqicho mishshuro may maikkanno? Siqqo baꞌanno,’ yaanno Woꞌmunkura Aliidi Mootichi Yihowa.
14 “Manchi beetto, masaalo coyiꞌri; anga gantanni sase higge, ‘Bise!’ yii. Tini lowo manna gorritannonna waxaaxo gantanno biseeti.
15 Wodaninsa waajje daaqanno; batinyu mannino kataminsa waalchira waxaaxanno; anino bisetenni gorreemmo. Ee, bise banqote gede xabbanno; qoleno gorritara fiinoonni!
16 Qiniiteenni seekkite muri! Gura widoonnino muri! Qarikki noo raga baala haꞌri!
17 Anino anga ganeemmo; hanqiꞌyano qiidanno. Tenne coyiꞌroommohu ane Yihowa umoꞌyaati.”
18 Xaano Yihowa qaali galagale anewa daye togo yiie:
19 “Manchi beetto, Baabiloonete moote bise dagganno gede lame doogo malaatisi. Lamenti doogo mitte gobbanni kaꞌannote; doogo marte lamewa baxxite katama eꞌannowa malaate* wori.
20 Bise Amoonootu katama Raaba eꞌanno gede mitte doogo badde malaatisi; Yihudaho qiinshoonniha Yerusaalamete katama eꞌanno gedeno wole doogo malaatisi.
21 Korkaatuno Baabiloonete moote, doogo marte baxxitannowa yaano lakkitte doogora uurre kiiꞌlanno. Isi maxxicha doyissanno. Magannasi amaaꞌlanno; afale layiꞌranno.
22 Qiniiticho angasira noo kiili huxxa diinganni meencho woranno gede, gorrinanni bise aanno gede, olaho boolaqiꞌranno gede, waalcho diinganni heelliicho woranno gede, huxxaho gamba asse bushsha duunanno gedenna gaangeesse kinchu huxxa huxxanno gede Yerusaalamete widira qole leellishi.
23 Ikkollana insara xaarturi* laꞌanno woyte kuni kaphu kiilo lawanno. Isi kayinni bunshensa qaage qafade haaꞌre haꞌrannonsa.
24 “Konnira Woꞌmunkura Aliidi Mootichi Yihowa togo yaanno: ‘Assootiꞌne baalunni cubbiꞌne leellanno gedenna saoꞌne xawo fultanno gede assitine bunsheꞌne qaanganni gede assitinoonni. Kiꞌneno xa qaangoonniꞌne daafira, wolqatenni* haaꞌne haꞌnanniꞌne.’
25 “Ati baasa madiꞌroottohu bushu Israeelete roorrichi, barrikki iillino; ee, jeefote qoricha adhatto barri iillino.
26 Woꞌmunkura Aliidi Mootichi Yihowa togo yaanno: ‘Umoho xaaxiꞌrootto hocco tiri; baꞌlattono hooli. Kuni bashsho gede diꞌꞌikkanno. Heeshshi yiinoha gotti assi; gotti yiinoha heeshshi assi.
27 Mullicho, mullicho, mullicho asseemmose. Qoosso noohu daa geeshsha, ise ayetano diꞌꞌikkitanno; hatte yannara isira eemmosi.’
28 “Manchi beetto, togo yite masaalo coyiꞌri: ‘Woꞌmunkura Aliidi Mootichi Yihowa Amoonootunna xononsa daafira togo yaanno.’ ‘Bise! Bise gorritara kou giddonni fultino; ittaranna banqote gede xabbara fiinoonni.
29 Kiilaanokki ate daafira kaphu ajuuja laꞌinohanna kaphu kiilo kiiltinoha ikkirono, ate giddo reyno manni jeefote qoricha adhitanno barri iilleenna reytino bushuulli reeshshi* aana duunamanno.
30 Bise kou giddora qoli. Kalaqamootta baycho, ilamootta gobbara yoo yeemmohe.
31 Hanqoꞌya ate aana duneemmo. Aariꞌya giira ate aana bubbanno gede asseemmo; qoleno hunate fullahinohura kakkachu manni angara sayse eemmohe.
32 Giirate sagale ikkatta; mundeekki gobbakkira duꞌnantanno; xaate qaagannohehu diheeꞌranno; tenne ani Yihowa umiꞌya coyiꞌroommona.’”
Lekkaalliidi Qaagiishshuwa
^ Noo gedeenni tirriro, “maala.”
^ Noo gedeenni tirriro, “hallikki huxiꞌranna.”
^ Waajjite shuma ciphi ciphi assitannota leellishshanno.
^ Ise yiniti Yihowa biseeti.
^ Noo gedeenni tirriro, “anga.”
^ Kuni Yerusaalamete heeꞌranno mannaati.
^ Noo gedeenni tirriro, “angatenni.”
^ Noo gedeenni tirriro, “gorrantinori goowi.”
