Hiziqeeli 41:1-26
41 Hakkunni gedensaanni isi Qullaawa Darga* eessie; hakkiinni kawanna kaꞌaanni noo heelliichuwa bikki; heelliichuwa godowa mitto widoonni lee cigileeti;* wole widoonnino lee cigileeti.
2 Eꞌnanni xullichi godowa tonne cigileeti; xullichu girgiddi* mitto widoonni onte cigileeti; wole widoonnino onte cigileeti. Qullaawu mini hojja bikkita, 40 cigile ikki; godowu qole 20 cigile ikki.
3 Hakkiinni giddora* eꞌꞌe, xullichoho lamenka widoonni noo heelliichuwa bikki; insano duꞌmille lame cigile ikki; xullichu halaꞌlinye lee cigileeti. Eꞌnanni xullichira kawanna kaꞌaanni noo girgiddi* lamala cigileeti.
4 Hakkiinni alba Qullaawu Dargi widira higge noo kifile bikkita, seendille 20 cigile, godowa 20 cigile ikkitu; isino “Kuni Qullaawa Holgeeti” yiie.
5 Hakkiinni qullaawu mini girgidda bikkita, duꞌmille lee cigile ikki. Qullaawa mine gaangeessine minnoonni kifilla godowa shoole cigileeti.
6 Tini kifilla aanaanni lame fooqe afidhinote; mitte mittente fooqera 30 kifilla no. Qullaawu mini girgiddi qooxora, midaadoonni noo kifilla dukke amaddinoti jawa xarra no; konnira tini xarra qullaawu mini girgidda qasse dieꞌino.
7 Qullaawu minira lamenka widoonni qiqqishantino doogo* no; tini doogo aleenni noo kifillawa fulli kiiro halaꞌlitanni hadhanno. Mittu manchi mitte fooqenni wole fooqewa gooddiꞌri kiiro fooqe halaꞌlitanni hadhanno.
8 Qullaawu mini gaangaawira dirimu nooha laummo; midaadoonni noo kifilla safo dhaawate geeshsha woꞌma siqqo yaano lee cigile ikkitanno.
9 Midaadoonni noo kifillahu gobbaydi girgiddi godowa onte cigileeti. Midaadoonni noo kifillara qoteho qullaawu mini ledo xaadinohu fanu dargi* no.
10 Qullaawu mininna sagale intanni kifilla* mereero lamenka widoonni godowa 20 cigile ikkanno dargi no.
11 Midaadoonni noo kifillanna fanu dargi mereero aliyyeenni mittu xullichi no; wodiidoonni wolu xullichi no. Fanu dargi baalanka raga godowa onte cigileeti.
12 Galchimi ragaanni alba fanu dargi widira hige noo mini godowa 70 cigileeti, seendille 90 cigileeti; minu girgiddi raga baala duꞌmille onte cigileeti.
13 Isi qullaawa mine bikkita, seendille 100 cigile ikki. Fanu dargi, minunna* minu girgiddino seendille 100 cigile ikki.
14 Alba soojjaati widira higge nooti qullaawu mini kifilenna fanu dargi godowa 100 cigileeti.
15 Qullaawu minira badheenni alba fanu dargi widira hige noo mine, lamenka widoonni noote saꞌnanni faro ledo bikkita, seendille 100 cigile ikki.
Qoleno Qullaawa Darga, Qullaawa Holgenna hoowete baranda bikki;
16 xullichuwa, ruukkitanni hadhanno maskoottanna konne sasenka darga noota saꞌnanni farono bikki. Xullichu mule girgidda uullanni maskootete geeshsha xaawulunni biifinsoonni; maskoottano diwante no.
17 Xullichoho aleenni nooha, qullaawu minira giddoydonna gobbaydo hattono qooxeessaho noo girgidda baala bikkini.
18 Girgiddu aana kirubeelenna saattichu haqqi misile seekkinoonni; lame kirubeele mereero saattu haqqi misile no; mitte mittenti kirubeele lame alba afidhino.
19 Manchu albi alba mitto ragaanni noohuwa saattichu haqqi widira hige no; doobbiichu* albino alba wole ragaanni noohuwa saattichu haqqi widira hige no; insa misile qullaawa mine baalankawa konni garinni seekkinoonni.
20 Qullaawu mini girgiddira uullanni kayse eꞌnanni xullichira aleenni noo baychi geeshsha kirubeelenna saattichu haqqi misile seekkinoonni.
21 Qullaawu mini waalchi gafo* shoolenka midaado taalote. Qullaawu dargira* albaanni,
22 hojja sase cigile, seendille lame cigile ikkannohu haqqunni seekkinoonniha kakkalote darga lawannori no. Isira dhaawate tuuqqa noosi; woriidonna* midaadosi haqqunni seekkinoonni. Hakkiinni manchu, “Kuni Yihowa albaanni noo xarapheessaati” yiie.
23 Qullaawu Dargiranna Qullaawu Holgira lamu lamu waalchi noonsa.
24 Mittu mittunku waalchi lamewa faꞌnamannoha lame cufana afiꞌrino.
25 Girgiddu aana noo kirubeelenna saattichu haqqi misile qullaawu mini saanquwa aanano seekkinoonni. Qoleno gobbaanni barandaho aleenni hige caalshiishannori haqqunni seekkinoonniri* no.
26 Barandaho lamenka widoonni, qullaawu minira midaadoonni noo kifilla aananna barandaho aleenni noo daasi mule ruukkitanni hadhanno maskoottanna saattu haqqi misile no.
Lekkaalliidi Qaagiishshuwa
^ Noo gedeenni tirriro, “qullaawa mine.” Fooliishsho 41 nna 42te, kuni qaali Qullaawa Darga woy qullaawa mine gudisama (Qullaawa Darganna Qullaawa Holgeno lendeenna) xawisanno.
^ Tini seeda cigileeti. Guwuursha B14 lai.
^ Noo gedeenni tirriro, “midaadu.”
^ Hakkuno qullaawu dargite giddiidi kifileeti woy Qullaawa Holgeeti.
^ Noo gedeenni tirriro, “Eꞌnanni xullichi godowi.”
^ Qunqumado dirima ikkikkinni digatino.
^ Qullaawu mini gaangaawira noota ruukkashsho doogo ikkitukkinni digattino.
^ Woy “Qullaawu mininna kifillate.”
^ Qullaawu dargira galchimaanni noo mineeti.
^ Woy “aju doobbiichi.”
^ Qullaawa Darga massanno xullicho ikkikkinni digatino.
^ Qullaawa Holge ikkikkinni digatino.
^ Noo gedeenni tirriro, “seendillenna.”
^ Woy “daasi.”
