Hiziqeeli 44:1-31
44 Isi alba soojjaati widira hige noohuwa qullaawu dargihu gobbaydi waalchiwa qole abbie; waalchuno cufame no.
2 Hakkiinni Yihowa togo yiie: “Kuni waalchi cufamino gedeenni heeꞌranno. Faꞌnama dihasiissannosi; aye manchino hakkaanni hige dieanno; korkaatuno Israeelete Magani Yihowa hakkaanni hige eino; hakko daafira cufamino gedeenni heeꞌranno.
3 Roorrichu kayinni roorricha ikkino daafira, Yihowa albaanni sagale itara hakko ofollanno. Isi hakkiira waalchu barandi widoonni eanno; fulanno woyteno hakkaanni hige fulanno.”
4 Hakkiinni aliyye waalchi widoonni qole qullaawu minira albaanni abbie. Laeemmo woyte, Yihowa ayirrinyi Yihowaha qullaawa mine woꞌme nooha afummo. Hakko daafira, alba hige gombisame uwummo.
5 Hakkiinni Yihowa togo yiie: “Manchi beetto, Yihowahu qullaawu mini wodhonna seeri daafira kuleemmohere baala illachishi,* seekkite lai, hattono macca worte macciishshi. Qullaawu mini waalchuwanna qullaawu dargi furcho baala illachishi.
6 Finqilu Israeelete minira togo yii: ‘Woꞌmunkura Aliidi Mootichi Yihowa togo yaanno: “Israeelete mine, mancaꞌꞌa assooteꞌne xaate agurre!
7 Wodananna maala barciminokkiha wole gobba manna qullaawa dargaꞌya abbitinanni woyte, insa qullaawa mineꞌya batteessanno. Mancau assootiꞌne baalunni kainohunni gondooriꞌya diigame heeꞌreenna sagaleꞌya yaano coomanna mundee shiqishshinanni.
8 Qullaawa mineꞌya nooha qullaawa coye ditowaattinoonni. Hatteentenni, qullaawu miniꞌya looso loossara woloota wortinoonni.”’
9 “‘Woꞌmunkura Aliidi Mootichi Yihowa togo yaanno: “Wodananna maala barciminokkihu Israeelete mereero heeꞌrannohu wole gobbahu mittu manchino qullaawa mineꞌya eoonke.”’
10 “‘Ikkollana, Israeele tiyyiꞌnanni magannansa* haꞌrunsitara anewiinni ballekku woyte anewiinni xeertidhu Leewaawooti cubbinsa abbanno guma mixxitanno.
11 Hakkiinni qullaawa dargaꞌya qullaawu mini waalchuwa illaallissannorenna qullaawa mine soqqantanno soqqamaasine ikkitanno. Shilqote fushshaatenna kakkalo mannaho gorritanno; qoleno soqqantansara mannaho albaanni uurritanno.
12 Tiyyiꞌnanni magannansa albaanni soqqantinonsa daafiranna Israeelete mini cubbo loosanno gede guficho ikkitino daafira, xaare insa aana anga kaysoommo,’ yaanno Woꞌmunkura Aliidi Mootichi Yihowa; ‘insano cubbinsa abbanno guma mixxitanno.
13 Kakkalaano ikkite soqqantaera anewa shiqqi diyitanno; qoleno ane loosira bande worroonni coywa shiqqi diyitanno. Assitinohu mancau coyinni kainohunni saala duqqitanno.
14 Ikkollana qullaawu mini looso annimmatenni loossannore, yaano hakko soqqammanni soqqanshonna hakko assinannire baala illaallissannore asseemmonsa.’
15 “‘Israeele anewiinni xeertidhu yannara qullaawu miniꞌya looso loossuri Saadooqi oosonna Leewaawoota ikkitino kakkalaano kayinni, soqqantaera anewa shiqqi yitanno; qoleno coomanna mundee shiqishshaera albaꞌyaanni uurritanno,’ yaanno Woꞌmunkura Aliidi Mootichi Yihowa.
16 ‘Qullaawa dargaꞌya eꞌannori insaati; qoleno insa soqqantaera kakkalote dargiꞌyawa shiqqi yitanno; ane albaanni noonsa qeechano wonshitanno.
17 “‘Giddiidi hoowewa massitanno waalchuwa widoonni eꞌanno woyte, shalaalatenni seekkinoonni uddano uddiꞌra hasiissannonsa. Giddiidi hoowe waalchuwara woy giddoonni noo darga soqqantanno woyte geꞌreewu ordanni gannoonni uddano uddiꞌra dihasiissannonsa.
18 Shalaalatenni seekkinoonni koffiyya umoho wodhitona; hallohono shalaalatenni gannoonni boogge qodhitona. Hunkiishshannonsa gede assitanno uddano horo uddiꞌra dihasiissannonsa.
19 Insa fulte mannu noowa gobbaydi hoowe martara albaanni, soqqantanni uddidhino uduunne fushshite sagale intannite qullaawa kifillara wodha hasiissannonsa. Hakkiinni, uddanonsanni qullaambe mannaho sayissannokki gede* wole uduunne uddidhanno.
20 Insa umo mexxitoonke; woy danancho lossidhoonke. Hatteentenni umo haxidhona.
21 Kakkalaano giddiidi hoowe eꞌanno woyte woyne aggoonke.
22 Insa gunnitte woy fushshine haꞌrinsoonni mancho galte assite adhitoonke; kayinni Israeelete ooso giddonni seemo ikkitinota woy kakkalaancho ikkino ayiddaanna shiidhinota adha dandiitanno.’
23 “‘Qullaawa ikkinohunna qullaawa ikkinokki coy mereero noo badooshshe manniꞌyara rosiissona; qoleno battaawinohunna keeraanchu coy mereero noo badooshsheno kultonsana.
24 Mannu mereero yekkeero kaꞌuro yoo yitona; yoo yaa hasiissannonsahu seeriꞌya garinniiti. Ayyaannaꞌya baalate daafira oommoha seeraꞌyanna wodhoꞌya agadhitona; sambataꞌyano qullaawa assitona.
25 Reyno manchiwa shiqqi yitoonke; hakkunni kaꞌa battaabbanno. Ikkollana anninsara, amansara, beettinsara, beettonsara, rodiinsara, woy mine assidhinokki rodoonsara yite insaneeto batteessa dandiitanno.
26 Kakkalaanchu keeraaꞌmihu gedensaanni, lamala barra keeshsha hasiissannosi.
27 Qullaawa darga soqqamara qullaawa darga noota giddiidi hoowe eanno barra, cubbu kakkalo shiqishiꞌrona,’ yaanno Woꞌmunkura Aliidi Mootichi Yihowa.
28 “‘Qoleno raggensa tenneeti: Raggensa aneeti. Ani jajjansa ikkoommo daafira, Israeelete gobbara insara jajja uytinoonte.
29 Gidu fushshaate, cubbu kakkalonna saote kakkalo ittannori insaati; qoleno Israeelete giddo Maganoho bandoonni coy baalunku insaha ikkanno.
30 Umi laalchi baalu giddonninna fushshaate assitine abbitinanni coy baalu giddonni dooraminohu kakkalaanonniha ikkanno. Qoleno umi laalchinni daaqqitinoonni bullee kakkalaanchoho uyiyye. Hatto assitiniro, mineꞌne atootu dirranno.
31 Kakkalaano reytinota woy moychu billa biinxa fushshino cea woy saada ittoonke.’
