Hiziqeeli 6:1-14
6 Yihowa qaali galagale anewa daye togo yiie:
2 “Manchi beetto, albakki Israeelete ilaalla widira qolte insa daafira masaalo coyiꞌri.
3 Togo yii: ‘Israeelete ilaalla, Woꞌmunkura Aliidi Mootichiha Yihowa qaale macciishshe: Woꞌmunkura Aliidi Mootichi Yihowa ilaallate, tulluwate, way buꞌaranna xeichuwate togo yaanno: “Kuneeti! Kiꞌne aana bise abbeemmo; gotti yiino baychoꞌneno huneemmo.
4 Kakkalote dargiꞌne diigamanno; hixaana wiliishshinanni uduunniꞌneno hiiqqaqqamanno; gorramino mannaꞌneno tiyyiꞌnanni magannaꞌnera* albaanni tugeemmo.
5 Israeelete manni reeshsha tiyyiꞌnanni magannansara albaanni tugeemmo; miqqaꞌneno kakkalote dargiꞌne qooxeessira billaalliseemmo.
6 Heedhinanni darga baalaho noo katamma baꞌanno; gotti yiino baychino diigamanno; mulla dargano ikkanno. Kakkalote dargiꞌne hiiqqaqqame butu yaanno; tiyyiꞌnanni magannaꞌne baꞌanno; hixaana wiliishshinanni uduunniꞌne cancanamanno; loosiꞌneno feyamame baꞌꞌanno.
7 Gorrantinori mereeroꞌne ubbanno; kiꞌneno ani Yihowa ikkoommota affinanni.
8 “‘“Ikkollana mitu manni gatanno gede asseemmo; gobba baalate billaalliseemmoꞌne woyte, kiꞌne giddo mitootu dagate mereero bisetenni gattinanni.
9 Gattannorino qafande haaꞌne haꞌnoonninsa daga mereero ane qaagganno. Anewiinni shawwu yiinohu kaadaasinchu* wodaninsanni kainohunni, hattono tiyyiꞌnanni magannansa hoode hadhanni foortanno illensanni kainohunni wodaniꞌya xissiisiꞌrinota huwattanno. Assitinohu bushunna mancau coyinni kainohunni saaltanno hattono shagaggidhanno.
10 Ani Yihowa ikkoommotanna tenne bao abbeemmo yee coyiꞌroommohu mulla ikkinokkita affanno.”’
11 “Woꞌmunkura Aliidi Mootichi Yihowa togo yaanno: ‘Israeelete mini assinohu bushunna mancau coyra dadillunni anga gantanninna lekkatenni baatto kaddanni wiꞌli; korkaatuno insa bisetenni, hudetenninna fayyatenni gooffaraati.
12 Xeertote noohu fayyatenni reyanno; mule noohu bisetenni reyanno; kuri coyinni gate fulannohu kayinni hudetenni reyanno; anino hanqoꞌya insa aana gudise dirriseemmo.
13 Gorramino manninsa tiyyiꞌnanni magannansa mereero, kakkalote darginsa qooxeessira, gotti yiino darga baalaho, ilaallate guunxo baalate, halja yitino haqqe baalate hundanna tiyyiꞌnanni magannansa baala hagiirsiissara tanni yitanno kakkalo shiqishshinowa jajjabba haqqe sinna hunda diriiranno woyte, ani Yihowa ikkoommota affanno.
14 Angaꞌya insa aana diriirse baatto mullicho asseemmo; heedhanno dargi baaluno Dibila mule noo halallinni roore ona baycho ikkanno. Insano ani Yihowa ikkoommota affanno.’”
