Lucas 13:1-35
-
Juchasniykichejmanta pesachikuychej manachayqa wañunkichej (1-5)
-
Mana poqoj higo sachʼamanta kikinchay (6-9)
-
Samarikuna pʼunchaypi Jesús kʼumpusqa warmita sanoyachin (10-17)
-
Mostaza mujumanta kikinchay, levaduramanta kikinchay (18-21)
-
Kʼullku punkunta yaykunapaj mayta kallpachakuna (22-30)
-
Herodesqa atoj (31-33)
-
Jesusqa Jerusalenmanta llakikun (34, 35)
13 Chaypachallataj wakin runasqa Jesusman qayllaykuspa willarqanku Pilato galileosta wañuchisqanta, uywa wañuchisqasta jaywashajtinku.
2 Jesustaj paykunata nerqa: “¿Yuyankichejchu chay galileosqa ajinata ñakʼarisqankuta tukuy galileosmanta aswan juchasapas kasqankurayku?
3 Noqa niykichej mana ajinachu kasqanta. Manachus juchasniykichejmanta pesachikunkichej chayqa, qankunapis tukuyniykichej wañullankichejtaj.+
4 Chantapis Siloampi torre urmaykuspa 18 runasta wañuracherqa. Chaykunamantapis, ¿yuyankichejchu Jerusalenpi tukuy tiyakojkunamanta aswan juchayoj kasqankuta?
5 Noqa niykichej mana ajinachu kasqanta. Manachus juchasniykichejmanta pesachikunkichej chayqa, qankunapis tukuyniykichej paykuna jinallataj wañunkichej”, nispa.
6 Chantá kay kikinchayta paykunaman nerqa: “Uj runajta uva huertanpi higo sachʼan kasqa, higosta pallaj rispataj mana imatapis tarisqachu.+
7 Chantá uva huertata qhawajman nisqa: ‘Kinsa watataña jamuni kay higo sachʼamanta higosta pallaj, nitaj poqonchu. Kʼuturpariy, qhasilla kay sachʼa kashan mana poqospa’, nispa.
8 Huertata qhawajtaj nisqa: ‘Patronníy, kay watatawan kallachunraj. Sachʼaj muyuyninta allaspa wanuchaykurisaj.
9 Poqojtenqa allin kanqa, mana poqojtintaj kʼuturpachillanki’,+ nispa”.
10 Jesusqa, samarikuna pʼunchaypi uj sinagogapi yachachisharqa.
11 Chaypitaj uj warmi kasharqa, paytaqa uj supay 18 watastaña onqoykuchisqa, chayraykutaj kʼumpusqallaña purej, nitaj cheqanyakuyta atejchu.
12 Jesustaj payta rikuytawan nerqa: “Onqoyniykimanta kacharichisqaña kanki”,+ nispa.
13 Makisninta payman churaykusqantawan, chay warmeqa cheqanyakorqa, Diostataj jatuncharqa.
14 Sinagogata kamachejtaj phiñakorqa Jesús samarikuna pʼunchaypi sanoyachisqanmanta, runastataj nerqa: “Sojta pʼunchay tiyan trabajanapaj,+ chay pʼunchaykunapi jamunkichej sanoyachisqa kanaykichejpaj, amataj samarikuna pʼunchaypeqa”,+ nispa.
15 Señor Jesustajrí kuticherqa: “Puraj uyas,+ ¿manachu qankunaqa samarikuna pʼunchaypi toroykichejtapis burroykichejtapis phaskaraspa yakuta ujyachimunkichej?+
16 Kay warmeqa Abrahanpa wawan, ¿manachu paytaqa samarikuna pʼunchaypipis kacharichina karqa, 18 watastaña Satanás ñakʼarichisqanmanta?”, nispa.
17 Chayta nejtin payman churanakojkunaqa pʼenqakorqanku. Tukuy runastaj kusikorqanku tʼukuna imasta Jesús ruwasqanmanta.+
18 Chantá Jesusqa nillarqataj: “¿Imamantaj Diospa Gobiernon rijchʼakunman? ¿Imawantaj kikinchayman?
19 Diospa Gobiernonqa uj mostaza mujuman rijchʼakun, mayqentachus uj runa huertanman tarpusqa chayman. Chay mujoqa wiñaspa uj sachʼaman tukusqa, pʼisqostaj ramasninpi thapachakusqanku”,+ nispa.
20 Ujtawan nillarqataj: “¿Imawantaj Diospa Gobiernonta kikinchayman?
21 Diospa Gobiernonqa levaduraman rijchʼakun, mayqentachus uj warmi chunka kilos* jakʼuman chajruykusqa, chay levadurataj tukuynin masata poqochisqa”,+ nispa.
22 Jesusqa llajtamanta llajta, ranchomanta rancho yachachispa Jerusalenman risharqa.
23 Uj runataj taporqa: “Señor, ¿pisichu kanku salvakojkunaqa?”, nispa. Jesustaj nerqa:
24 “Kʼullku punkunta yaykunaykichejpaj mayta kallpachakuychej.+ Noqa niykichej, ashkhas yaykuyta munanqanku, manataj atenqankuchu.
25 Wasiyoj sayarimuspa punkuta llaveykojtinña, qankunaqa jawapi sayashaj qhepakunkichej, punkutataj takankichej ‘Señor, kicharimuwayku’+ nispa. Paytaj nimusonqachej: ‘Mana rejsiykichejchu’, nispa.
26 Qankunataj ninkichej: ‘Qanwan khuska mikhorqayku, ujyarqaykutaj, callesniykupipis yachacherqanki’,+ nispa.
27 Paytajrí nisonqachej: ‘Mana rejsiykichejchu. Riychej kaymanta, tukuyniykichej sajrata ruwajkuna’, nispa.
28 Chaypi waqankichej, kirusniykichejtapis kʼarurachinkichej,* Abrahanta, Isaacta, Jacobta, tukuy profetastawan Diospa Gobiernonpi rikuspa, qankunataj jawapi wijchʼusqa rikhurispa.+
29 Chantapis runasqa jamonqanku inti llojsimuynejmanta, inti yaykuynejmanta, norte ladomanta, sur ladomantawan,* Diospa Gobiernonpitaj mesaman tiyaykonqanku.
30 Kayta uyariychej: Qhepapi kajkunamanta wakenqa ñaupajpi kanqanku, ñaupajpi kajkunamanta wakintaj qhepapi kanqanku”,+ nispa.
31 Chay ratollataj wakin fariseosqa Jesusman chimpaykuspa nerqanku: “Llojsispa ripuy. Herodesqa wañuchiyta munashasunki”, nispa.
32 Jesustajrí nerqa: “Rispa, chay atojta* nimuychej: ‘Noqaqa kunanpis qʼayapis supaykunata qharqosaj, onqosqastapis sanoyachisaj, minchhataj* ruwanayta tukusaj’, nispa.
33 Noqaqa kunanpis, qʼayapis, minchhapis rinallaypuni tiyan, uj profetataqa mana maypipis wañuchillankumanchu, manachayqa Jerusalenllapi.+
34 Jerusalén, Jerusalén, qanqa profetasta wañuchinki, qanman kachamusqastapis rumiswan chʼanqaykunki.+ Mashkha kutitachus wawasniykita tantayta munarqani, imaynatachus wallpa chillwisninta lijrasnin* uraman tantaykun ajinata. Qankunataj mana munarqankichejchu.+
35 Qhawariychej, Diosqa wasiykichejta saqerpayanqa.+ Qankunata niykichej: Kunanmantaqa manaña rikuwankichejñachu, ‘Jehová* Diospa sutinpi jamojqa bendecisqa kachun’+ ninaykichejkama”, nispa.
Sutʼinchaykunasnin
^ Griego parlaypeqa nin, “kinsa sea midinas”. Yanapa B14 nisqata leeriy.
^ Kʼarurachinkichej nispaqa rabiakunankuta, ni imanakuyta atinankuta niyta munashan.
^ Chayri “pata ladomanta, ura ladomantawan”.
^ Atojtaqa Israelpi vivopaj qhawaj kanku.
^ Griego parlaypeqa nin, “kinsa pʼunchayninmantaj”.
^ Lijra: waj lugarespi ninku ala.
