Lucas 4:1-44
4 Jesusqa espíritu santowan juntʼa kaspa Jordán mayumanta riporqa, chʼinnejpitaj Diospa espiritun pusaykacharqa+
2 tawa chunka diasta. Jesusqa chay diaspi mana imatapis mikhorqachu, 40 días juntʼakojtintaj yarqhachikorqa. Diablotaj Jesusta juchaman urmachiyta munaspa+
3 nerqa: “Diospa wawanchus kanki chayqa, niy kay rumita tʼantaman tukunanta”, nispa.
4 Jesustaj kuticherqa: “Qhelqasqa kashan: ‘Runaqa mana tʼantallawanchu kausanqa’,+ nispa”.
5 Diabloqa Jesusta orqo pataman pusaspa, uj ñawi chʼirmiypi rikucherqa jallpʼantinmanta nacionesta.+
6 Chantá Diabloqa nerqa: “Tukuy kay nacionesta, qhapaj kapuynintawan qopusqayki. Kay nacionesqa noqajta,+ pimanchus munani chayman qoyta atini.
7 Chayrayku sichus uj kutillatapis yupaychawanki chayqa, kay tukuynin qanpata kanqa”, nispa.
8 Jesustaj kuticherqa: “Qhelqasqa kashan: ‘Jehová* Diosniykita yupaychanayki tiyan, pay sapallantataj sirvinayki tiyan’, nispa”.+
9 Chantá Diabloqa, Jesusta Jerusalenman pusaspa temploj aswan patannejman sayaykucherqa, nerqataj: “Diospa wawanchus kanki chayqa kay patamanta wijchʼuykukuy.+
10 Qhelqasqa kashan: ‘Payqa angelesninta kachamusonqa cuidasunankupaj’.
11 ‘Paykunaqa makisninkupi japʼisonqanku ama chakisniykita rumiman takakunaykipaj’,+ nispa”.
12 Jesustaj kuticherqa: “Qhelqasqa kashan: ‘Jehová* Diosniykitaqa ama pruebaman churankichu’,+ nispa”.
13 Chantá Diabloqa Jesusta mana urmachiyta atispa uj tiempota riporqa.+
14 Jesusqa espiritoj atiyninwan juntʼa kaspa Galileaman kutirerqa.+ Chay ranchospitaj allinta paymanta parlasharqanku.
15 Chantapis sinagogasninkupi* yachachiyta qallarerqa, tukuytaj payta alabasharqanku.
16 Chantá Jesusqa Nazaret llajtaman rerqa+ maypichus uywasqa karqa chayman. Yachasqa kasqanman jinataj samarikuna pʼunchaypi sinagogaman yaykorqa,+ chantá leej sayarerqa.
17 Chaypajqa profeta Isaiaspa kʼuyuna libronta* jaywarqanku, paytaj kʼuyuraspa kay qhelqasqata tarerqa:
18 “Jehová* Diosqa espiritunta qowan. Payqa ajllawan wajchasman sumaj willaykunata willanaypaj. Kachamuwantaj ñakʼarejkunata kacharichinaypaj, presosmantaj kacharisqa kanankuta willanaypaj, ciegosmanpis watejmanta qhawarinankuta willanaypaj.+
19 Kachamullawantaj Jehová* Diospa khuyakunan watamanta willanaypaj”,+ nispa.
20 Chantá Jesusqa chay kʼuyuna librota kʼuyuykuspa, waqaychajman jaywapuytawan tiyaykukorqa, sinagogapi kajkunataj tukuyninku payllata qhawasharqanku.
21 Jesustaj paykunata nerqa: “Diosmanta Qhelqasqapi chay leesqayqa kunan juntʼakushan”,+ nispa.
22 Tukuytaj allinta paymanta parlarqanku, sumajta parlasqanmantataj tʼukuspa tapunakorqanku:+ “¿Manachu kayqa Josejpa wawan?”,+ nispa.
23 Jesustaj paykunata nerqa: “Niwankichejchari kay nisqata: ‘Doctor, qan kikiykita jampikuy. Capernaumpi ashkha imasta ruwasqaykita uyariyku, kay llajtaykipipis chayta ruwallaytaj’”,+ nispa.
24 Chantá nillarqataj: “Cheqatapuni niykichej, ni mayqen profetapis llajtanpeqa allinpaj qhawasqachu.+
25 Cheqatapuni nillaykichejtaj: Eliaspa tiemponpi kinsa wata sojta killayojta mana pararqachu, chaynejta chay jallpʼantinpi manchay yarqhay karqa. Chaypachaqa Israelpi ashkha viudas karqanku.+
26 Diostajrí Eliastaqa mana chay viudasmanchu kacharqa, manachayqa Sidonpi kaj Sarepta llajtapi tiyakoj viudallaman.+
27 Profeta Eliseoj tiemponpipis Israelpi ashkha runas lepra onqoyniyoj karqanku, paytaj ni mayqenninkuta sanoyacherqachu,* manachayqa Siriamanta Naamanllata”,+ nispa.
28 Chay imasta uyarispa sinagogapi kajkunaqa mayta rabiakorqanku.+
29 Sayariytawantaj Jesusta usqhayllata llajtankumanta orqhorqanku qaqaman tanqaykamunankupaj. Chay runaspa llajtankoqa chay qaqa patapi karqa.
30 Jesustajrí paykunaj chaupinkuta llojsispa riporqa.+
31 Chaymanta Jesusqa Galileapi kaj Capernaúm llajtaman uraykorqa. Samarikuna pʼunchaykunapitaj runasman yachacherqa.+
32 Runasqa chay jinata yachachisqanmanta mayta tʼukoj kanku,+ payqa atiyniyoj jinapuni parlaj.
33 Chaypachataj sinagogapi uj millay supayniyoj runa kasharqa, chay runaqa sinchʼita qhaparerqa:+
34 “Nazareno Jesús,+ ¿ima ruwanayku tiyan qanwanri? ¿Tukuchejchu jamuwayku? Allinta yachani pichus kasqaykita. Qantaqa Dios kachamusunki”,+ nispa.
35 Jesustajrí chay supayta kʼamerqa: “¡Chʼin kay! ¡Llojsiy kay runamanta!”, nispa. Supaytaj chay runata paykunaj chaupinkuman wijchʼuytawan, mana imanaspalla paymanta llojserqa.
36 Tukuyninkutaj mayta tʼukuspa ninakorqanku: “¿Imataj kayri? Supaykunapis nisqanta kasuspa runasmanta llojsinku”, nispa.
37 Chayrayku runasqa chay muyuynintinpi Jesusmanta mayta parlasharqanku.
38 Jesusqa sinagogamanta ripuytawan, Simonpa wasinman yaykorqa, Simonpa suegrantaj sinchʼi calenturawan* kashasqa. Chaypi kajkunataj Jesusmanta mañakorqanku payta sanoyachinanta.+
39 Jesustaj Simonpa suegranman qayllaykuspa calenturanmanta sanoyacherqa. Simonpa suegrantaj chay ratopacha jatarimuytawan paykunapaj waykʼorqa.
40 Inti chinkaykushajtinña, runasqa onqosqasninkuta Jesusman pusamorqanku, Jesustaj paykunata sanoyacherqa sapa ujman makisninta churaykuspa.+
41 Supaykunapis ashkha runasmanta llojserqanku, kay jinata qhaparispa: “Qanqa Diospa Wawan kanki”,+ nispa. Jesustaj supaykunata kʼamispa mana parlajta saqerqachu,+ pay Cristo kasqanta yachasqankurayku.+
42 Qʼayantintaj Jesusqa tutamanta llojsispa chʼinnejman riporqa.+ Runastajrí payta maskʼasharqanku, taripaspataj ama ripunanpaj jarkʼanayarqanku.
43 Jesustajrí nerqa: “Waj llajtaspipis Diospa Gobiernonmanta sumaj willaykunata willamunallaytaj tiyan, chaypajmin Diosqa kachamuwan”,+ nispa.
44 Chantá Jesusqa Judeaj sinagogasninpi willaramorqa.
Sutʼinchaykunasnin
^ Glosariopi kʼuyuna libro nisqata leeriy.
^ Chayri “llimphucharqachu”.
^ Chayri “kʼaja onqoywan”.
