Lucas 5:1-39
5 Jesús uj kuti Genesaret qocha* kantupi+ kashajtin, runasqa maytapuni payman kʼiskinakamorqanku Diospa palabranta uyarinankupaj.
2 Payqa iskay canoasta rikorqa qocha kantupi, pescadorestaj canoasninkumanta uraykamuspa pescado japʼina chʼipasninkuta* tʼajsasharqanku.+
3 Jesusqa Simonpa canoanman wicharispa, Simonta nerqa qocha ukhunejman canoata ithirichinanta. Chaypi tiyaykukuspataj canoamantapacha runasman yachachiyta qallarerqa.
4 Yachachiyta tukuspataj, Simonta nerqa: “Canoaykita aswan ukhunejman apay, chantá chʼipasniykichejta yakuman wijchʼuykuychej pescadosta japʼinaykichejpaj”, nispa.
5 Simontaj kuticherqa: “Yachachejníy, tutantintaña pescadosta japʼej churakuyku, nitaj uj pescadollatapis japʼiykuchu.+ Qan niwasqaykiraykulla chʼipasta yakuman wijchʼuykusaj”, nispa.
6 Ajinata ruwaspa, may chhika pescadosta japʼerqanku. Chʼipasninkupis llikʼirakusharqaña.+
7 Chantá wajyarqanku waj canoapi kaj pescado japʼej masisninkuta, jamuspa yanapanankupaj. Jamojtinkutaj, iskaynin canoasman pescadosta juntʼaykucherqanku. Canoastaj chay jina juntʼa kaspa chinkaykusharqankuña.
8 Chayta rikuspa Simón Pedroqa, Jesuspa ñaupaqenpi qonqoriykukuspa nerqa: “Señor, karunchakuy noqamanta, juchasapa kani”, nispa.
9 Chay chhika pescadosta japʼisqankumanta Pedroqa mayta tʼukorqa, jinallataj paywan kajkunapis.
10 Zebedeoj wawasnin Santiagopis Juanpis+ mayta tʼukullarqankutaj, paykunaqa Simonpa pescado japʼej masisnin karqanku. Jesustaj Simonta nerqa: “Amaña manchachikuychu. Kunanmantaqa runastañataj* pescadosta jina japʼinki”,+ nispa.
11 Chantá paykunaqa canoasta qocha kantuman apamuytawan, chay kikinpi tukuy imasninkuta saqerparispa, Jesuspa qhepanta rerqanku.+
12 Jesús uj llajtapi kashajtin, chaypi uj runa lepra onqoywan juntʼa kasharqa. Payqa Jesusta rikuytawan pampakama kʼumuykukuspa mayta mañakorqa: “Señor, munajtiykeqa atinki sanoyachiwayta”,*+ nispa.
13 Jesustaj payta llankharispa nerqa: “Arí, munani. Sanoyapuy”, nispa. Chay ratopachataj lepra onqoynin chinkaporqa.+
14 Jesustaj chay runata kamacherqa ama pimanpis chayta willananta. Nerqataj: “Rispa sacerdotewan rikuchikamuy. Sanoyachisqa kasqaykimantataj jaywanata qomuy Moisés kamachisqanman jina,+ sacerdotes yachanankupaj sanoyapusqaykitaña”,+ nispa.
15 Chaywanpis Jesusmantaqa astawan astawan tukuynejpi uyarikorqa, may chhika runastaj tantakamoj kanku payta uyarinankupaj, onqoyninkumantapis sanoyachinanpaj.+
16 Jesustajrí chʼin lugaresman rillajpuni Diosmanta mañakoj.
17 Uj pʼunchay Jesús uj wasipi yachachishajtin, fariseoswan* Leymanta yachachejkunawan chaypi tiyasharqanku. Paykunaqa jamusqanku tukuynin Galilea ranchosmanta, Judeamanta, Jerusalenmantawan. Jehová* Diostaj Jesusman atiyninta qorqa onqosqasta sanoyachinanpaj.+
18 Runastaj uj suchu runata wantunapi apamuspa imaynamantapis Jesuspa ñaupaqenman apaykuyta munarqanku.+
19 Ashkha runas kasqanraykutaj, ni imaynamanta apaykuyta aterqankuchu. Chayrayku wasi pataman wicharicherqanku, tejasta orqhospataj chayninta suchu runata wantunapi uraykucherqanku runaspa chaupinman, Jesuspa ñaupaqenman.
20 Jesustaj creesqankuta reparaspa, suchu runata nerqa: “Juchasniyki perdonasqaña kanku”,+ nispa.
21 Chayta uyarispa leymanta yachachejkunaqa* fariseoswan ninakusharqanku: “¿Pitaj kay runa kasqa Diospa contranta parlananpajri? ¿Manachu Dioslla juchastaqa perdonayta atin?”,+ nispa.
22 Jesustajrí imatachus yuyasqankuta reparaspa nerqa: “¿Imatataj sonqoykichejpi yuyashankichejri?
23 Pillapis kay runamanqa ‘juchasniyki perdonasqaña kanku’ nillanman. ‘Sayarispa puririy’ nejtinkurí, ¿puririnmanchu?
24 Kunanqa rikuchisqaykichej, noqa* atiyniyoj kasqayta kay jallpʼapi juchasta perdonanaypaj”, nispa. Chantá suchu runata nerqa: “Qanta niyki: Sayariy, wantunaykita oqharispa wasiykiman ripuy”,+ nispa.
25 Chay ratopacha chay suchu runaqa, paykuna rikushajtinku sayarerqa, wantunanta oqharispataj Diosta jatunchaspa wasinman riporqa.
26 Tukuyninkutaj tʼukuspa Diosta jatuncharqanku. Mayta tʼukuspa* nerqanku: “Kunan pʼunchay tʼukunasta rikunchej”, nispa.
27 Jesusqa chaymanta llojsiytawan rikorqa impuestota cobraj runata, Leví sutiyojta. Payqa impuesto pagana wasipi tiyashasqa. Jesustaj payta nerqa: “Qhepayta jamuy”,+ nispa.
28 Levitaj sayariytawan, tukuy imata saqerparispa Jesuspa qhepanta rerqa.
29 Chantá Leviqa, wasinpi jatun mikhuyta Jesuspaj wakicherqa, chaypitaj ashkha impuesteros mikhusharqanku, waj runaswan khuska.+
30 Chayrayku fariseoswan leymanta yachachejkunawanqa thutuspa Jesuspa discipulosninta* nerqanku: “¿Imaraykutaj mikhunkichej, ujyankichejtaj impuesteroswan juchasapaswan khuskari?”,+ nispa.
31 Jesustaj paykunata nerqa: “Sano runasqa mana doctorta necesitankuchu, onqosqaslla necesitanku.+
32 Noqaqa mana cheqan runastachu wajyaj jamuni, manachayqa juchasapasta arrepientekunankupaj”,+ nispa.
33 Paykunataj nerqanku: “Juanpa discipulosninpis fariseospa discipulosninkupis sapa kuti ayunanku, Diosmantataj mañakunku. Discipulosniykitajrí mikhunkutaj ujyankutaj”,+ nispa.
34 Jesustaj paykunaman nerqa: “Novioj amigosnintaqa mana ayunachiyta atiwajchejchu novio paykunawan kashajtenqa, ¿icharí?
35 Chaywanpis uj pʼunchay novio+ paykunamanta qhechusqa kanqa, chay pʼunchaymá ayunanqanku”,+ nispa.
36 Chantá Jesusqa kay jinata kikincharispa, paykunata nerqa: “Mana pipis mosoj ropataqa kʼutunchu maukʼa ropata remiendananpajqa. Ajinata remiendanman chayqa, chay mosoj remiendoqa maukʼa ropata llikʼirparinman, chantapis mana allinchu rikukun maukʼapi mosojqa.+
37 Manallataj pipis mosoj vinota maukʼa qara botasman* jallchʼanchu, jallchʼanman chayqa, mosoj vinoqa qara botasta phatachinman. Jinapitaj vinoqa jichʼakunman, qara botaspis usunman.
38 Mosoj vinotaqa mosoj qara botasman jallchʼana tiyan.
39 Pichus unayniyoj vinota llamirejqa nin: ‘Unayniyoj vinopuni sumajqa’, nispa. Nitaj mosoj vinotaqa ujyayta munanñachu”.
Sutʼinchaykunasnin
^ Chay Genesaret qochaqa sutikun Galilea qocha.
^ Chayri “mallasninkuta”.
^ Chayri “runastañataj kausashajta”.
^ Chayri “llimphuchawayta”.
^ Glosariopi leymanta yachachejkuna nisqata leeriy.
^ Griego parlaypeqa nin, “Runaj Wawan”. Glosariopi runaj wawan nisqata leeriy.
^ Chayri “Mayta mancharispa”.
