Lucas 9:1-62
-
Jesusqa 12 apostolesninta willamunankupaj yuyaychan (1-6)
-
Herodesqa Jesusmanta uyarispa tʼukun (7-9)
-
Jesusqa phishqa waranqa qharista mikhuchin (10-17)
-
Pedro nin Jesusqa Cristo kasqanta (18-20)
-
Jesús willan wañuchinankuta (21, 22)
-
Imatá ruwana tiyan Jesusta qhatikunapaj (23-27)
-
Jesuspa rijchʼaynenqa waj jinaman tukun (28-36)
-
Jesús sanoyachin supayniyoj waynuchuta (37-43a)
-
Jesús watejmanta willan wañuchinankuta (43b-45)
-
Discipulosnenqa siminakunku mayqenninkuchus kuraj kasqanmanta (46-48)
-
“Mana contraykichejpi kajqa, qankunawan kashan” (49, 50)
-
Samariaj ujnin ranchonpi mana Jesusta wajyarikunkuchu (51-56)
-
¿Imatá ruwananku tiyan Jesusta qhatikuyta munajkuna? (57-62)
9 Jesusqa 12 apostolesninta wajyaspa, paykunaman atiyta qorqa tukuy supaykunata runasmanta qharqonankupaj,+ onqosqastapis sanoyachinankupaj.+
2 Chantá paykunata kacharqa Diospa Gobiernonmanta willamunankupaj, onqosqastapis sanoyachimunankupaj.
3 Nerqataj: “Ama imatapis ñanpaj apakuychejchu, ni tojnuta, ni wayaqata,* ni tʼantata, ni qolqeta,* nillataj iskay ropastapis.*+
4 Mayqen wasillamanpis yaykuspaqa, chaypi qhepakuychej ripunaykichejkama.+
5 Sichus mayqen llajtallapipis mana wajyarikusonqachejchu chayqa, chaymanta llojsipushaspa chakisniykichejmanta jallpʼata thalarakuychej, ajinamanta pantasqankuta reparakunankupaj”,+ nispa.
6 Chaymanta paykunaqa ranchomanta rancho rerqanku, tukuynejpi sumaj willaykunata willaspa, onqosqastapis sanoyachispa.+
7 Galilea jallpʼapi kamachej Herodestaj,* chay tukuy imasta uyarispa, imatachus ruwananta mana yacharqachu. Wakin runasqa nisharqanku Juan wañusqas ukhumanta kausarimusqanta,+
8 wakintaj nisharqanku Elías rikhurimusqanta, wajkunataj nisharqanku unay profetasmanta ujnin kausarimusqanta.+
9 Herodestaj nerqa: “Juantaqa noqa umanta qholucherqani.+ ¿Pitaj chay runa kanmanri chay imasta paymanta uyarinaypajri?”, nispa. Chayrayku Herodesqa payta rikuytapuni munasharqa.+
10 Apostolesqa kutimuytawan, Jesusman willarqanku imatachus ruwasqankuta.+ Jesustaj paykunata pusariykukuspa Betsaida sutiyoj llajtaman rerqa, chaypi sapallanku kanankupaj.+
11 Runastajrí chayta yachaspa qhepanta rerqanku. Jesustaj paykunata tukuy sonqo japʼikorqa, Diospa Gobiernonmantataj willarqa, onqosqastapis sanoyacherqa.+
12 Tardeyaykushajtinña 12 apostolesnenqa Jesusman qayllaykuspa nerqanku: “Runasta kachapullayña qaylla ranchosman, qaylla wasisman rispa puñukamunankupaj, mikhunatapis rantikamunankupaj, kaynejqa chʼin”,+ nispa.
13 Jesustaj nerqa: “Qankuna mikhunata qoychej”,+ nispa. Paykunataj kuticherqanku: “Phishqa tʼantaslla, iskay pescadosllawan kapuwayku. Kay tukuynin runaspaj mikhunata rantimuykuman chayllapuni”, nispa.
14 Chaypeqa phishqa waranqa jina qharis karqanku. Paytajrí discipulosninta nerqa: “Runasta tiyarachiychej, sapa qotupi phishqa chunkata jina”, nispa.
15 Discipulosnintaj kasukuspa tukuyta tiyaracherqanku.
16 Jesustaj chay phishqa tʼantasta, chay iskay pescadostawan oqharerqa, cielota qhawarispataj Diosman graciasta qorqa. Chantá partiraspa discipulosninman jaywarqa, paykunataj runasman jaywararqanku.
17 Jinapi tukuyninku sajsakunankukama mikhorqanku. Puchojtataj 12 canastasta tantarqanku.+
18 Uj pʼunchay Jesús sapallan Diosmanta mañakushajtin discipulosnin payman qayllaykorqanku. Jesustaj paykunata taporqa: “¿Pi kasqaytataj runas ninku?”,+ nispa.
19 Paykunataj kuticherqanku: “Juan Bautista kasqaykita ninku, wakintaj Elías kasqaykita. Wakintaj ninku unay profetasmanta ujnin kausarimusqanta”,+ nispa.
20 Jesús tapullarqataj: “Qankunarí, ¿pi kasqaytataj ninkichej?”, nispa. Pedrotaj kuticherqa: “Qanqa Diospa kachamusqan Cristo kanki”,+ nispa.
21 Chantá Jesusqa paykunata kamacherqa amapuni pimanpis chayta willanankuta.+
22 Jesús nillarqataj: “Noqaqa* maytapuni ñakʼarinay kashan. Kurajkuna, kuraj sacerdotes, leymanta yachachejkunapis chejnikuwanqanku, runaspis wañuchiwanqanku,+ kinsa pʼunchayninmantaj kausarichisqa kasaj”,+ nispa.
23 Tukuyninkumantaj nerqa: “Sichus pipis qhepayta jamuyta munan chayqa, pay kikinta chejnikuchun,*+ ñakʼarina kʼaspin* aparisqataj sapa día qhepayta jamullachunpuni.+
24 Kausayninta salvayta munajqa wañonqa. Noqarayku wañojrí kausayninta salvanqa.+
25 Chanta, ¿ima allintaj runapaj kanman mundo enterota japʼikapojtin, kausaynintataj chinkachejtin chayri ñakʼarejtinri?+
26 Sichus pipis noqamanta, nisqasniymantawan pʼenqakun chayqa, noqapis* paymanta pʼenqakullasajtaj, maypachachus atiyniypi chayamusaj, Tataypa atiyninpi, ajllasqa angelespa atiyninpiwan chaypacha.+
27 Cheqatapuni niykichej: Kaypi kajkunamanta wakenqa mana wañonqankuchu, Diospa Gobiernonta rikunankukama”.+
28 Ajinataj karqa. Chay nisqanmanta pusaj pʼunchayninman jina, Jesusqa Pedrota, Juanta, Santiagotawan pusariykukuspa orqoman wicharerqa, Diosmanta mañakunanpaj.+
29 Mañakushajtintaj uyanpa rijchʼaynenqa waj jinaman tukorqa, ropanpis yuraj lliphipejman tukorqa.
30 Jinallapi iskay runas rikhurimuspa Jesuswan parlasharqanku, paykunaqa karqanku Moiseswan Eliaswan.
31 Iskayninku jatun kʼanchaywan rikhurimuspa parlayta qallarerqanku Jesús ripunanmanta, chaytaj Jerusalenpi juntʼakunanmanta.+
32 Pedropis paywan kajkunapis puñuy machasqa jina kasharqanku. Allinta rijchʼarispataj rikorqanku Jesuspa jatun kʼanchayninta,+ chay iskay runastawan ladonpi sayashajta.
33 Chay runas karunchakushajtinkutaj Pedroqa Jesusta nerqa: “Yachachejníy, sumajpuni kaypi kasqaykoqa. Kaypi kinsa chʼujllasta ruwasqayku,* ujta qanpaj, ujta Moisespaj, ujtataj Eliaspaj”, nispa. Pedroqa imatachus nishasqanta mana reparakorqachu.
34 Parlashajtillanraj, phuyu rikhurimuspa paykunata pʼampaykorqa. Paykunataj mayta mancharikorqanku.
35 Diostaj phuyu ukhumanta nimorqa:+ “Kaymin ajllakusqay Wawayqa.+ Payta uyariychej”,+ nispa.
36 Chayta uyarishajtinkutaj Jesusllataña sapanta rikorqanku. Paykunaqa chʼinlla karqanku, chay rikusqankutataj mana pimanpis chay pʼunchaykunapi willarqankuchu.+
37 Qʼayantenqa orqomanta uraykusqankutawan, ashkha runas Jesusta taripaj jamorqanku.+
38 Runas chaupimantataj uj runa qhaparimorqa: “Yachachejníy, kay kʼata wawayta* qhawaykuripuway.+
39 Paytaqa uj supay japʼispa ujllata qhaparichin, sinchʼita thalaspataj siminmanta phosoqota ajtuchimun, qʼoyollata ruwaspataj ñakʼayta paymanta llojsin.
40 Mañakorqaniña discipulosniykita chay supayta wawaymanta qharqonankuta, manataj atinkuchu”, nispa.
41 Jesustaj kuticherqa: “Ay kay tiempomanta mana creej runas, juchasapas.+ ¿Maykʼajkamataj qankunawan kallasajpuniri? ¿Maykʼajkamataj aguantasqaykichejri? Wawaykita pusamuy”,+ nispa.
42 Jesusman qayllaykushajtintaj, supayqa chay waynuchuta pampaman wijchʼuspa sinchʼita thalarqa. Jesustajrí chay supayta kʼamerqa, waynuchuta sanoyachispataj tatanman qoporqa.
43 Tukuy runastaj mayta tʼukorqanku Diospa chay jina jatun atiyninmanta.
Tukuyninku chay ruwasqanmanta tʼukushajtinku, Jesusqa discipulosninta nerqa:
44 “Allinta uyariychej, amataj qonqaychejchu kay nisqayta: Noqataqa* enemigosniypa makinkuman jaywaykuwanqanku”,+ nispa.
45 Paykunatajrí chay nisqanta mana entienderqankuchu, paykunapajqa pakasqa jina karqa mana entiendeyta atinankupaj, manchachikorqankutaj tapuyta.
46 Chantá paykunapura siminakuyta qallarerqanku, mayqenninkuchus kurajpaj qhawasqa kasqanmanta.+
47 Jesustaj sonqonkupi imatachus yuyashasqankuta yachaspa, uj wawata ladonman sayaykucherqa.
48 Paykunamantaj nerqa: “Pillapis kay wawata sutiypi wajyarikojqa, noqatapis wajyarikullawantaj. Noqata wajyarikuwajrí kachamuwajniytapis wajyarikullantaj.+ Pichus sullkʼaykichej jina kajqa, chaymin kurajqa”,+ nispa.
49 Chayta uyarispa Juanqa nerqa: “Yachachejníy, uj runata sutiykipi supaykunata qharqoshajta rikorqayku, mana noqanchejwan kasqanraykutaj jarkʼayta munarqayku”,+ nispa.
50 Jesustaj nerqa: “Ama jarkʼaychejchu. Pichus mana contraykichejpi kajqa, qankunawan kashan”, nispa.
51 Jesusqa cieloman ripunan qayllata,+ Jerusalenman riytapuni munarqa.
52 Chayrayku wakin discipulosninta ñauparicherqa. Discipulosnintaj rispa samaritanospa ujnin ranchonkuman yaykorqanku, Jesús chayakunanpaj tukuy imata wakichisqata suyachinankupaj.
53 Chay ranchomanta kajkunataj mana Jesusta wajyarikorqankuchu,+ Jerusalenman riytapuni munasqanrayku.
54 Discipulosnin Santiago, Juan ima,+ chayta rikuspa Jesusta nerqanku: “Señor, ¿munawajchu cielomanta ninata mañakunaykuta uraykamuspa paykunata qʼolarparinanpaj?”,*+ nispa.
55 Jesustaj kutirikuspa paykunata kʼamerqa.
56 Chaymantataj waj ranchoman riporqanku.
57 Ñanta rishajtinku uj runa nerqa: “Qhepaykita risaj maymanchá rinki chayman”, nispa.
58 Jesustajrí nerqa: “Atojkunaqa juskʼuspi wasiyoj kanku, pʼisqospis thapayoj kanku, noqaypatataj* ni imay kanchu puñurikunallaypajpis”,+ nispa.
59 Chantá Jesús waj runaman nerqa: “Qhepayta jamuy”, nispa. Chay runataj nerqa: “Señor, ñaupajtaqa tataytaraj pʼampaykamusaj ari”,+ nispa.
60 Jesustaj nerqa: “Saqey wañusqas+ wañusqasninkuta pʼampanankuta, qantajrí rispa tukuynejpi Diospa Gobiernonmanta willamuy”,+ nispa.
61 Chantá ujpis nillarqataj: “Señor, qhepaykita risaj. Ñaupajtaqa wasiypi kajkunamanraj ripushasqayta willamusaj”, nispa.
62 Jesustaj nerqa: “Pillapis llankʼay patapi aradoj manceranta japʼispaña qhepata qhawajqa,+ mana Diospa Gobiernonpaj jinachu”,+ nispa.
Sutʼinchaykunasnin
^ Chayri “nillataj waj ropatapis”.
^ Griego parlaypeqa nin, “ni qolqe metalta”.
^ Chayri “bolsata”.
^ Griego parlaypeqa nin, “Runaj Wawan”. Glosariopi runaj wawan nisqata leeriy.
^ Chayri “amaña pay kikinpaj kausachunchu”.
^ Chayri “ñakʼarina posten”. Glosariopi ñakʼarina kʼaspi nisqata leeriy.
^ Griego parlaypeqa nin, “Runaj Wawan”. Glosariopi runaj wawan nisqata leeriy.
^ Ruwasqayku: waj lugarespi ninku ruwasajku.
^ Chayri “sapan wawayta”.
^ Griego parlaypeqa nin, “Runaj Wawan”. Glosariopi runaj wawan nisqata leeriy.
^ Chayri “rupharparinanpaj”.
^ Griego parlaypeqa nin, “Runaj Wawan”. Glosariopi runaj wawan nisqata leeriy.
