Numeri 9:1-23
9 Aizirayeli padabula mudziko ya Iguputo, m’mwezi woyamba wa gole yachiwiri, Yahova adayankhula na Mose muchipululu cha Sinai. Iye adati:
2 “Aizirayeli akonze ntsembe ya Pasika panthawe yomwe idaikhiwiratu.
3 Pantsiku ya 14 ya mwezi uno, maulo kuli bibibi,* mudzakonze ntsembe mwiyo panthawe yoikhiwiratu. Mudzaikonze motewedza malamulo yake yose na njira zose za kakonzedwe kake.”
4 Pamwapo Mose adauza Aizirayeli kuti akonze ntsembe ya Pasika.
5 Iwo adakonza ntsembe ya Pasika pantsiku ya 14 ya mwezi woyamba, maulo kuli bibibi,* muchipululu cha Sinai. Aizirayeli mwawo adachita vose mobverana na vomwe Yahova adalamula Mose.
6 Manje penze azimuna anango omwe adadzipysipiza ndawa yogumirira chitanda cha munthu, mwakuti alibe kukwanisa kukonza ntsembe ya Pasika pantsiku mwiyo. Manje azimuna mwawo adayenda kukaonekera kwa Mose na Aroni pantsiku mwiyo,
7 nkunena kuti: “Isepano ndise wopsyipiziwa ndawa tagumirira munthu wakufa. Olo kuti viri teno, ko tinkufunikadi kulambiziwa kupereka ntsembe kwa Yahova pakati pa Aizirayeli panthawe yomwe idaikhiwiratu?”
8 Manje Mose adawauza kuti: “Yembekezani pamwapo, nibve vomwe Yahova angalamule vokhudza imwepo.”
9 Patsogolo pake Yahova adauza Mose kuti:
10 “Uza Aizirayeli kuti: ‘Munthu aliyese pakati panu panango pakati pa mbadwa zanu, yemwe wapsyipiziwa ndawa yogumirira chitanda, panango yemwe ali paulendo utali, ambakonze basi ntsembe ya Pasika yopereka kwa Yahova.
11 Ambakonze ntsembe mwiyo mwezi wachiwiri pantsiku ya 14, maulo kuli bibibi.* Ambadye nyama ya ntsembe mwiyo pabodzi na mikate yalibe vofufumisa, na masamba yowawa.
12 Osati ambasiye nyama iriyose mpakana machibesebese, ndipo osati ambaphwanye bonzo yake iriyose. Ambaikonze motewedza malamulo yose ya Pasika.
13 Koma peno munthu ni wosapsyipiziwa panango wenzelini paulendo, ndipo wanyalanyaza kukonza ntsembe ya Pasika, munthu muyo ambaphewe kuti aleke kukhala pomwe pakati pa wanthu wake, ndawa alibe kupereka ntsembe mwiyo kwa Yahova panthawe yomwe idaikhiwiratu. Munthu muyo adzafe ndawa ya chimo yake.
14 Peno pali mulendo yemwe akukhala pakati panu, iyembo ambakonze ntsembe ya Pasika yakuti apereke kwa Yahova. Ambaikonze motewedza malamulo yose ya Pasika ninge momwe ikonzerewa nthawe zose. Pambakhale malamulo yolingana kwa mose imwepo, peno ni mulendo panango mbadwa.”
15 Pantsiku yomwe adakonza chihema, ntambo udaimirira padzulu pa chihema cha Umboni mwicho. Koma kuyambira maulo mpakana machibese, moto umbawonekera padzulu pa chihema mwicho.
16 Vimwivi ndivo vimbachitika nthawe zose. Ntambo umbaimirira padzulu pa chihema mwicho masikati ndipo usiku pambaoneka moto.
17 Ntambo muyo ukanyamuka padzulu pa chihema mwicho, Aizirayeli ambanyamuka nthawe mwiyoletu. Ndipo pamalo yomwe ntambo muyo waima, ndipo pomwe Aizirayeli ambamangapo nsasa.
18 Yahova akalamula, Aizirayeli ambanyamuka, ndipo Yahova akalamula, ambamanga nsasa. Ntsiku zose zomwe ntambo umbakhala padzulu pa chihema mwicho, iwo ambapitiriza kukhala pansasa mwapo.
19 Olo ntambo muyo ukhale ntsiku zizinji padzulu pa chihema, Aizirayeli ambapitiriza kubvera Yahova, ndipo ambachokalini pamalo mwapo.
20 Nthawe zinango ntambo muyo umbakhala ntsiku zing’onong’ono padzulu pa chihema mwapo. Yahova akalamula, iwo ambapitiriza kukhala pansasa mwapo ndipo Yahova akalamula, iwo ambachokapo.
21 Nthawe zinango ntambo muyo umbandokhalapo kuchokera maulo mpakana machibesebese, ndipo ntambo muyo ukachoka machibesebese mwayo, wanthu mwawo ambanyamuka. Peno ntambo muyo uchoke masikati panango usiku, iwo ambanyamuka basi.
22 Peno ntambo muyo ukhale padzulu pa chihema mwicho ntsiku ziwiri, mwezi, panango ntsiku zizinji, Aizirayeli ambapitiriza kukhala pansasa mwapo osachoka. Koma ntambo muyo ukanyamuka, iwo ambachoka.
23 Yahova akalamula, iwo ambamanga nsasa, ndipo Yahova akalamula, iwo ambanyamuka. Ambabvera Yahova potewedza malangizo yose yomwe Yahova ambapereka kupitira mwa Mose.
