Numeri 21:1-35
21 Mpfumu ya Akanani ya ku Aradi yomwe imbakhala ku Negebu paidabva kuti Aizirayeli ankubwera na njira ya ku Atarimu, idayenda kukamenyana nawo ndipo idaphata Aizirayeli anango nkuyenda nawo kudziko yake.
2 Aizirayeli padawona vimwivo adapolomisa Yahova kuti: “Mukapereka wanthu mwawa m’manja mwathu, shuwadi, isepanombo tidzadzonge mathaundi yawo.”
3 Pamwapo Yahova adabva mawu ya Aizirayeli ndipo adapereka Akanani mwawo m’manja mwawo. Aizirayeli adawadzonga Akanani mwawo pabodzi na mathaundi yawo. Ndipomwapa malo mwayo adayapasa dzina yakuti Horima.*
4 Pomwe Aizirayeli mwawo ambapitiriza ulendo wawo kuchokera kuphiri ya Hora, kupitira njira yoyenda ku Nyanja Ifuwira pakufuna kulambalalala dziko ya Edomu, wanthu mwawo adaneta na ulendo muyo.
5 Pamwapo iwo adayamba kudandaula motsutsana na Mulungu komasoti Mose kuti: “Ndawa chani mudatibulisa mudziko ya Iguputo kuti tidzafere muchipululu muno? Kuno kulibe chakudya olo madzi, ndipo chakudya chonyantsa ichi tachitinkha.”
6 Manje Yahova adatumiza nyoka zapoizoni* pakati pawo, ndipo zidayamba kuwaluma mwakuti Aizirayeli azinji adafa.
7 Pamwapo wanthu mwawo adayenda kwa Mose nkumuuza kuti: “Tachimwa isepano ndawa yoyankhula modandaula pakutsutsana na Yahova komasoti imwepo. Tipepeserenkoni kwa Yahova kuti atichosere nyoka mwizi.” Pavidateno Mose adawapepesera kwa Mulungu.
8 Manje Yahova adauza Mose kuti: “Ukonze chifaniziro cha nyoka yapoizoni* ndipo uchiikhe pamuti. Manje munthu aliyese akalumiwa ambanyang’ane chifaniziro mwicho kuti apitirize kukhala na moyo.”
9 Nthawe mwiyoletu Mose adakonza nyoka yakobre nkuiikha pamuti. Manje munthu akalumiwa na nyoka nkunyang’ana nyoka yakobre mwiyo, ambapitiriza kukhala na moyo.
10 Patsogolo pake Aizirayeli adafuluka nkuyenda kukamanga nsasa ku Oboti.
11 Padafuluka ku Oboti adayenda nkukamanga nsasa ku Iye-abarimu, muchipululu chonyang’anana na dziko ya Mowabu, chakumachibese.
12 Padachoka kumuko adakamanga nsasa mu chigwa cha Zeredi.
13 Padafuluka kumuko adayenda kukamanga nsasa m’dera ya chigwa cha Arinoni, muchipululu chochokera kumalire ya dziko ya Aamori. Chigwa cha Arinoni chenze malire ya pakati pa dziko ya Mowabu na ya Aamori.
14 Ndipomwapa bukhu ya Nkhondo za Yahova inena va “Vahebi ku Sufa na vigwa va Arinoni.
15 Tukamadzi twa vigwa mwivo tufika ku Ari ndipo tupita na m’malire ya dziko ya Mowabu.”
16 Padachoka kumuko adayenda ku Beere. Kumuko ndiko kwenze chitsime chomwe Yahova adauza Mose kuti: “Sonkhanisa wanthu mwawo kuti niwapase madzi.”
17 Pa nthawe mwiyo Aizirayeli adaimba nyimbo yakuti:
“Bulisa madzi, chitsime iwe! Dawikizani* nyimbo iyi!
18 Chitsime mwichi chidakumbiwa na wana wa mpfumu, chidafukuliwa na wanthu olemekezeka,Chidafukuliwa na mpsyimbo ya mtsogoleri wa masocha komasoti mpsyimbo zawo.”
Patsogolo pake adachoka kuchipululu muko nkuyenda ku Matana.
19 Padachoka ku Matana adayenda ku Nahaliyeli ndipo padachoka ku Nahaliyeli adayenda ku Bamoti.
20 Padachoka ku Bamoti adayenda ku chigwa chomwe chiri mudziko ya Mowabu, pafupi na ntunthu wa Pisiga womwe ni wonyang’anana na dera ya Yesimoni.*
21 Manje Aizirayeli adatuma wanthu kuti ayende kwa Sihoni mpfumu ya Aamori kukanena kuti:
22 “Tibvumizenkoni kuti tipiteko na mudziko yanu. Tipatukirelini m’munda uliwose panango m’munda wa uva. Timwelini madzi pachitsime chirichose. Timbondofamba mu Msewu wa Mpfumu mpakana tipitirire dziko yanu.”
23 Koma Sihoni alibe kubvuma kuti Aizirayeli apite na mudziko yake. M’malo mwake iye adasonkhanisa wanthu wake wose nkuyenda kukamenyana na Aizirayeli mu chipululu mumo. Adafika ku Yahazi ndipo adayamba kumenyana na Aizirayeli.
24 Koma Aizirayeli adapha wanthu mwawo na chibemba nkuwatengera dziko yawo, kuyambira kuchigwa cha Arinoni mpakana kuchigwa cha Yaboki, pafupi na Aamoni, ndawa Yazeri adachita malire na Aamoni.
25 Pamwapo Aizirayeli adatenga mathaundi mwaya nkuyamba kukhala m’mathaundi yose ya Aamori ku Hesiboni na miyi yake yose yozungulira.
26 Adayamba kukhala kumuko ndawa Hesiboni yenze thaundi ya Sihoni, mpfumu ya Aamori, yemwe adamenyana na mpfumu ya Mowabu nkutenga dziko yake yose mpakana kukafika ku dziko ya Arinoni.
27 Ndipomwapa panandakatulo yonyoza yakuti:
“Bwerani ku Hesiboni.
Thaundi ya Sihoni imangiwe nkukhala yolimba.
28 Ndawa moto udabula ku Hesiboni, moto wangandanganda udabula mu thaundi ya Sihoni.
Washoka Ari thaundi yaku Mowabu, washoka olamulira wa m’malo yokwizika ya ku Arinoni.
29 Tsoka iwepo Mowabu! Mudzadzongewe, imwepo wanthu wa Kemosi!
Iye adzachitise wana wake amuna kukhala othawa kwawo, ndipo adzasanduse wana wake akazi kukhala akapolo wa Sihoni, mpfumu ya Aamori.
30 Naboni tiwalase.
Hesiboni adzadzongewe mpakana ku Diboni.
Naboni tiwasanduse matongwe mpakana ku Nofa,Moto udzayenderere mpakana ku Medeba.”
31 Pamwapo Aizirayeli adayamba kukhala mudziko ya Aamori.
32 Patsogolo pake Mose adatumiza wanthu anango kuti akayendeze thaundi ya Yazeri. Padateno Aizirayeli mwawo adatenga miyi yozungulira thaundi mwiyo, nkuthamangisa Aamori omwe enze kumuko.
33 Patsogolo pake adachungunuka nkupita na njira yoyenda ku Basana. Manje Ogi mpfumu ya ku Basana adabwera pabodzi na wanthu wake wose kudzamenyana nawo ku Edirei.
34 Yahova adauza Mose kuti: “Ayi kumugopa muyu, ndawa nimupereke kwa iwepo pabodzi na wanthu wake wose komasoti dziko yake m’manja mwako ndipo umuchitire vomwe udachitira Sihoni mpfumu ya Aamori yomwe imbakhala ku Hesiboni.”
35 Pamwapo Aizirayeli mwawo adapha iye, wana wake na wanthu wake wose, mwakuti palibe olo m’bodzi yemwe adapulumuka, ndipo adatenga dziko yake.
