Numeri 14:1-45
14 Patsogolo pake gulu yose idayamba kudandaula mokuwa, ndipo wanthu mwawo adapitiriza kulira usiku wose.
2 Aizirayeli wose adayamba kung’ung’uzikira Mose na Aroni, ndipo gulu yose idati: “Vidakakhala bwino tidakandofera ku Iguputo, panango tidakandofera muchipululu muno.
3 Ndawa chani Yahova watibweresa mudziko ino kuti tidzaphewe na chibemba? Akazi wathu na wana wathu adzatengewe na azondi. Ko ni bwinolini kuti tindobwerera ku Iguputo?”
4 Iwo adafika mpakana pakuuzana kuti: “Naboni tisankhule mtsogoleri, tibwerere ku Iguputo!”
5 Mose na Aroni padabva vimwivi, adagwada nkujolima mpakana nkhope zawo pasi pamaso pa gulu yose ya Aizirayeli.
6 Ndipo Yoswa mwana wa Nuni na Kalebe mwana wa Yefune, omwe adayenda nawo kukayendeza dziko mwiyo, adang’amba vovala vawo.
7 Iwo adauza gulu yose ya Aizirayeli kuti: “Dziko yomwe tenze tayenda kukaiyendeza ni dziko yabwino maninge.
8 Peno Yahova ankukondwa nase, adzatingenesedi mudziko mwiyo nkuipereka kwa isepano, dziko yoyerera nkaka na uchi.
9 Koma chofunika ni chakuti osati muphindukire Yahova, ndipo wanthu wa mudziko mwiyo ayi kuwagopa, ndawa ali ninge chakudya kwa isepano. Ni wosatetezeka, koma isepano tina Yahova. Ayi kuwagopa.”
10 Koma gulu yose mwiyo idayamba kupangana kuti iwaphwanye na minyala. Patsogolo pake, ulemerero wa Yahova udawonekera kwa Aizirayeli wose padzulu pa chihema chogumanako.
11 Manje Yahova adayankhula na Mose kuti: Ko wanthu mwawa apitirize kuninyoza mpakana lini? Ko nilini pomwe adzayambe kunikhulupirira patsogolo pa vizindikiro vose vomwe nachita pakati pawo?
12 Niwagwesere muliri na kuwadzonga, ndipo iwepo nidzakuchitise kukhala ntundu ukulu na wamphanvu kuposha wanthu mwawa.”
13 Koma Mose adadawira Yahova kuti: “Mukachita teno, Aiguputo omwe mudawatengera wanthu mwawa pakuphatisa basa mphanvu zanu, adzabve vimwivi.
14 Iwo akabva adzauze wanthu wa mudziko ino, omwe abva pomwe kuti imwepo Yahova muli pakati pa wanthu wanu, nakuti muwonekera kwa iwo maso na maso. Imwepo ndimwe Yahova, ndipo ntambo wanu uli padzulu pawo. Masikati muwatsogolera pakuphatisa basa chipilala cha ntambo, ndipo usiku muwatsogolera pakuphatisa basa chipilala cha moto.
15 Mukapha wanthu wose mwawa kabodzi na kabodzi,* makhaindi yose ya wanthu yomwe yabva va imwepo yadzanene kuti:
16 ‘Yahova adakangira kuwafikisa wanthu mwawa mudziko yomwe adawalumbirira, ndipomwapa adandowaphera muchipululu.’
17 Pulizi Yahova, wonesani kuti ndimwe wamphanvu maninge mobverana na momwe mudapolomisira kuti:
18 ‘Yahova akalipalini kamangu, ndipo ni wachikondi chikulu chokhulupirika.* Akhululukira vophonya na machimo, koma adzalekererelini wophonya osamulanga. Alanga wana, azizukulu na wana wa azizukulu mwawo ndawa ya vophonya va ababa wawo.’
19 Pulizi, akhululukireni wanthu mwawa vophonya vawo mobverana na chikondi chanu chikulu chokhulupirika, ninge momwe mwakhala munkuwakhululukira kuchokera ku Iguputo mpakana pano.”
20 Manje Yahova adati: “Viri bwino, nawakhululukira mobverana na vomwe wanena.
21 Komasoti, mpali ine Mulungu wamoyo, dziko yose yapasi idzadzadze na ulemerero wa Yahova.
22 Olo kuti viri teno, wanthu wose omwe awona ulemerero wangu na vizindikiro vangu vomwe nidachita ku Iguputo, na vomwe nachita muchipululu, koma apitiriza kuniyesa maulendo 10 yose mwaya, ndipo alibe kubvera mawu yangu,
23 adzaiwonelini olo pang’ono dziko yomwe nidalumbirira azibereki wawo. Shuwadi, wose omwe ankunilemekezalini, adzaiwonelini dziko mwiyo.
24 Koma ndawa yakuti ntumiki wangu Kalebe wenze wosiyana na anango,* ndipo wakhala ankunibvera na ntima wake wose, shuwadi nidzamungenese mudziko yomwe adayenda kukaiyendeza, ndipo mbadwa zake zidzatenge dziko mwiyo nkukhala yawo.
25 Pakuti Aamaleki na Akanani akukhala kuchigwa, mangwana mubwerere nkuyamba ulendo woyenda kuchipululu kupita na njira yoyenda ku Nyanja Ifuwira.”
26 Patsogolo pake Yahova adauza Mose na Aroni kuti:
27 “Ko gulu ya wanthu oipa mwawa imbang’ung’uzike motsutsana na inepano mpakana lini? Nabva kung’ung’uzika komwe Aizirayeli ankuchita motsutsana na inepano.
28 Uwauze kuti: ‘Yahova wanena kuti: “Mpali ine Mulungu wamoyo, nidzakuchitireni mobverana na vomwe nabva munkuyankhula.
29 Mose imwepo omwe mudawerengewa kuyambira wamagole 20 kuyenda kutsogolo, imwepo omwe mwakhala munkudandaula motsutsana na inepano vitanda vanu vidzagone muchipululu muno.
30 Mose imwepo mudzangenelini mudziko yomwe nidalumbira* kuti mudzakhalemo, kupatulapo Kalebe mwana wa Yefune na Yoswa mwana wa Nuni.
31 Koma wana wanu omwe mudati adzatengewe na azondi, mwawo ndiwo omwe nidzawangenese mudziko mwiyo ndipo adzadziwe dziko yomwe imwepo mwailamba.
32 Koma imwepo vitanda vanu vidzagone muchipululu muno.
33 Wana wanu adzakhale anyakabusa muchipululu kwa magole 40, ndipo adzabonere ndawa ya kusakhulupirika kwanu,* mpakana womalizira kufa wa imwepo adzagone m’manda muchipululu muno.
34 Mudzalangiwe mobverana na kuwanda kwa ntsiku zomwe mudayendeza dziko mwiyo kwa ntsiku 40. Mudzalangiwe kwa ntsiku 40 ndawa ya vophonya vanu, ntsiku ibodzi kuwerengera gole ibodzi, ntsiku ibodzi gole ibodzi, kuti mudziwe kuipa kotsutsana na inepano.*
35 Inepano Yahova nayankhula. Vomwe nidzachitire gulu yose ya wanthu oipa iyi, omwe asonkhana kuti atsutsane na inepano ni ivi: Wose adzafere muchipululu muno ndipo adzamalire muchipululu muno.
36 Komasoti amuna omwe Mose adawatuma kukawona dziko mwiyo, omwe adabweresa mawu yosalimbikisa nkuchitisa kuti wanthu wose adandaule motsutsana na Mose,
37 amuna omwe adabwera kudzanena voipa va dziko mwiyo, Yahova adzawalange ndipo adzafe.
38 Koma Yoswa mwana wa Nuni na Kalebe mwana wa Yefune, omwe enze mu gulu ya wanthu omwe adayenda kukayendeza dziko mwiyo, adzapitirize kukhala na moyo.”’”
39 Mose padauza Aizirayeli wose mawu mwaya, wanthu wose adayamba kulira maninge.
40 Komasoti, iwo adamuka machibesebese maninge kuti ayende kudera yamapiri, ndipo adati: “Isepano takonzeka kuti tiyende kumalo yomwe Yahova adanena, ndawa tachimwa.”
41 Koma Mose adati: “Ndawa chani munkubveralini malamulo ya Yahova? Vimwivi vikuthandizenilini.
42 Ayi kuyenda kumuko ndawa Yahova alirini namwe pabodzi ndipo azondi wanu akakuwineni.
43 Kumuko mukagumane na Aamaleki na Akanani, ndipo akakupheni na chibemba. Yahova ayendelini namwe kumuko ndawa mwaleka kutewera Yahova.”
44 Olo kuti venze teno, wanthu mwawo adadzikuza ndipo adanyamuka nkuyenda kudera ya mapiri kule, koma Mose pabodzi na likasa ya pangano ya Yahova alibe kuchoka pakati pa nsasa.
45 Pavidateno Aamaleki na Akanani omwe ambakhala kudera ya mapiri mwiyo adabuluka nkuyamba kuwapha nkuwang’ondosa mpakana ku Horima.
Mawu ya m’nyantsi
^ Muchiyankhulo choyambirira adati: “ninge munthu m’bodzi.”
^ Panango kuti: “awonesa kukoma ntima kosamala.”
^ Panango kuti: “adawonesa khalidwe yosiyana na ya anango.”
^ Muchiyankhulo choyambirira adati: “nidakwiza djanja yangu.”
^ Muchiyankhulo choyambirira adati: “uhule wanu.”
^ Panago kuti: “koniwona ninge ndine woipa.”
