Numeri 2:1-34

  • Nsasa adaugawa m’magulu ya madzinza yatatu (1-34)

    • Gulu ya madzinza yatatu ya Yuda yenze mbali ya kumachibese (3-9)

    • Gulu ya madzinza yatatu ya Rubeni yenze mbali ya ku sul (10-16)

    • Nsasa wa Alevi wenze pakati (17)

    • Gulu ya madzinza yatatu ya Efuraimu yenze mbali ya kumaulo (18-24)

    • Gulu ya madzinza ya Dani yenze mbali ya ku norte (25-31)

    • Chiwerengero cha amuna wose omwe adanembewa (32-34)

2  Manje Yahova adayankhula na Mose na Aroni kuti: 2  “Aizirayeli ambakhome matenti yawo, pamalo yomwe gulu yawo ya madzinza yatatu yapasiwa, munthu aliyese ambakhale pafupi na chizindikiro cha nyumba ya azibereki wake. Iwo ambakhome matenti yawo mozungulira chihema chogumanako monyang’anana na chihema mwicho. 3  Omwe ambamange nsasa wawo kumachibese kochokera dzuwa ni madzinza yatatu yotsogolerewa na dzinza ya Ayuda na magulu yawo.* Mtsogoleri wa wana wa Ayuda ni Naasoni, mwana wa Aminadabu. 4  Masocha yake yomwe yadanembewa madzina yalipo 74 600. 5  Pafupi na dzinza mwiyi pambakhale dzinza ya Isakara. Mtsogoleri wa wana wa Isakara ni Netaneli, mwana wa Zuwara. 6  Masocha yake yomwe yadanembewa madzina yalipo 54 400. 7  Patsogolo pake pambabwere dzinza ya Zebuloni. Mtsogoleri wa wana wa Zebuloni ni Eliyabu, mwana wa Heloni. 8  Masocha yake yomwe yadanembewa madzina yalipo 57 400. 9  Masocha yose ya gulu ya Yuda yomwe yadanembewa madzina yalipo 186 400. Mwawa ambakhale oyamba kunyamuka. 10  Omwe ambamange nsasa wawo ku sul* ni madzinza yatatu yotsogolerewa na dzinza ya Rubeni na magulu yawo.* Mtsogoleri wa wana wa Rubeni ni Elizuri, mwana wa Sedeuri. 11  Masocha yake yomwe yadanembewa madzina yalipo 46 500. 12  Pafupi na dzinza mwiyi pambakhale dzinza ya Simiyoni. Mtsogoleri wa wana wa Simiyoni ni Selumiyeli, mwana wa Zurisadai. 13  Masocha yake yomwe yadanembewa madzina yalipo 59 300. 14  Patsogolo pake pambabwere dzinza ya Gadi. Mtsogoleri wa wana wa Gadi ni Eliyasafu, mwana wa Reueli. 15  Masocha yake yomwe yadanembewa madzina yalipo 45 650. 16  Masocha yose ya gulu ya Rubeni yomwe yadanembewa madzina yalipo 151 450. Amwawa ambakhale wachiwiri kunyamuka. 17  Pakufulusa chihema chogumanako, gulu ya Alevi imbakhale pakati pa magulu yanango mwayo. Dongosolo yomwe ambatewedze pakufuluka, ndiyo yati ambatewedze pomwe pakumanga misasa yawo, aliyese pamalo yake, mobverana na gulu yawo ya madzinza yatatu. 18  Omwe ambamange nsasa wawo kumaulo ni gulu ya madzinza yatatu ya Efuraimu na magulu yawo.* Mtsogoleri wa wana wa Efuraimu ni Elisama, mwana wa Amihudi. 19  Masocha yake yomwe yadanembewa madzina yalipo 40 500. 20  Pafupi na dzinza mwiyi pambabwere dzinza ya Manase. Mtsogoleri wa wana wa Manase ni Gamaliyeli, mwana wa Pedazuri. 21  Masocha yake yomwe yadanembewa madzina yalipo 32 200. 22  Patsogolo pake pambabwere dzinza ya Benjamim. Mtsogoleri wa wana wa Benjamim ni Abidana, mwana wa Gidiyoni. 23  Masocha yake yomwe yadanembewa madzina yalipo 35 400. 24  Masocha yose ya gulu ya Efuraimu yomwe yadanembewa madzina yalipo 108 100. Mwawa ambakhale wachitatu kunyamuka. 25  Omwe ambamange nsasa wawo ku norte* ni gulu ya madzinza yatatu ya Dani na magulu yawo.* Mtsogoleri wa wana wa Dani ni Ahiyezeri, mwana wa Amisadai. 26  Masocha yake yomwe yadanembewa madzina yalipo 62 700. 27  Pafupi na dzinza mwiyi pambabwere dzinza ya Aseri. Mtsogoleri wa wana wa Aseri ni Pagiyeli, mwana wa Okirani. 28  Masocha yake yomwe yadanembewa madzina yalipo 41 500. 29  Patsogolo pake pambabwere dzinza ya Nafitali. Mtsogoleri wa wana wa Nafitali ni Ahira, mwana wa Enani. 30  Masocha yake yomwe yadanembewa madzina yalipo 53 400. 31  Masocha yose ya gulu ya Dani yomwe yadanembewa madzina yalipo 157 600. Amwawa ambakhale omalizira kunyamuka, mobverana na magulu ya Aizirayeli ya madzinza yatatuyatatu.” 32  Mwawa ni Aizirayeli omwe madzina yawo yadanembewa, mobverana na nyumba ya azibereki wawo. Masocha yose yomwe yadanembewa madzina m’magulu yose, yenzepo 603 550. 33  Koma Alevi alibe kuwerengerewa pabodzi na Aizirayeli anango, mobverana na vomwe Yahova adalamula Mose. 34  Aizirayeli adachita vose mobverana na vomwe Yahova adalamula Mose. Dongosolo yomwe adatewedza pakumanga misasa yawo m’magulu ya madzinza yatatu, ndiyo yadatewedza pomwe pakufuluka, aliyese m’banja yake mobverana na nyumba ya azibereki wake.

Mawu ya m’nyantsi

^ Muchiyankhulo choyambirira adati: “mobverana na magulu yawo ya masocha.”
^ Panango kuti: “kum’mwera.”
^ Muchiyankhulo choyambirira adati: “mobverana na magulu yawo ya masocha.”
^ Muchiyankhulo choyambirira adati: “mobverana na magulu yawo ya masocha.”
^ Panango kuti: “kumpoto.”
^ Muchiyankhulo choyambirira adati: “mobverana na magulu yawo ya masocha.”

Bukhu mweyi niyotetezewa na ufulu wa zamalamulo