Numeri 19:1-22
-
Ng’ombe ifuwira komasoti madzi yochenesera (1-22)
19 Yahova adayankhula na Mose komasoti Aroni kuti:
2 “Iyi ni lamulo yomwe Yahova wapereka: ‘Uza Aizirayeli kuti akupasire ng’ombe ikazi ifuwira yathanzi, komasoti yosapunduka yomwe ikalibe yamangiwako djoko.
3 Mupereke ng’ombe mwiyo kwa wantsembe Eleazara kuti ayende nayo kunja kwa nsasa, ndipo kumuko ikaphewe pamaso pake.
4 Akateno wantsembe Eleazara atenge magazi yanango ya ng’ombe mwiyo na chala* chake n’kuyawaza kutsogolo kwa chihema chogumanako maulendo 7.
5 Patsogolo pake ng’ombe mwiyo ishokewe iye ankuwona. Ashoke chikumba chake, nyama yake, magazi yake pabodzi na ndowe zake.
6 Wantsembe muyo atenge muti wa nkungudza, kamuti ka hisope na usalu ufuwira maninge nkuviponya pamoto womwe ankushokerapo ng’ombe mwiyo.
7 Akamaliza, wantsembe muyo awatche vovala vake nkusamba* na madzi. Patsogolo pake angangene munsasa, koma adzakhale wopsyipiziwa mpakana maulo.
8 Munthu yemwe washoka ng’ombe mwiyo awatche vovala vake nkusamba* na madzi, ndipo adzakhale wopsyipiziwa mpakana maulo.
9 Manje munthu yemwe ni wosapsyipiziwa awole dotha ya ng’ombe mwiyo nkukaisiya pamalo yochena kunja kwa nsasa muyo. Aizirayeli wose ambasunge dotha mwiyo kuti ambaiphatise basa pakukonza madzi yochenesera. Imwiyi ni ntsembe ya machimo.
10 Munthu yemwe wayola dotha ya ng’ombe mwiyo ambawatche vovala vake ndipo ambakhale wopsyipiziwa mpakana maulo.
Imwiyi ni lamulo mpakana kalekale kwa Aizirayeli na kwa mulendo wokhala pakati pawo.
11 Aliyese wogumirira chitanda cha munthu aliyese, ambakhale wopsyipiziwa kwa ntsiku 7.
12 Munthu wateneuyo ambadzichenese na madzi yochenesera yale pa ntsiku yachitatu, ndipo pantsiku yachi 7 ambakhale wochena. Koma akaleka kudzichenesa pantsiku yachitatu, adzakhalelini wochena pantsiku yachi 7.
13 Munthu aliyese yemwe wagumirira chitanda cha munthu koma alibe kudzichenesa, wapsyipiza chihema cha Yahova. Munthu muyo ambaphewe kuti osati akhale pomwe pakati pa Aizirayeli. Iye adakali wopsyipiziwa ndawa alibe kuwaziwa madzi yochenesera. Ndipomwapa adzapitirize kukhala wopsyipiziwa.
14 Peno munthu wafera mutenti, lamulo yake ni iyi: Munthu aliyese yemwe wangena mutenti mumo komasoti aliyese yemwe wenze mutenti mumo adzakhale wopsyipiziwa kwa ntsiku 7.
15 Chombo chirichose chosabwinikira bwino* ni chopsyipiziwa.
16 Aliyese yemwe wagumirira munthu yemwe waphewa na chibemba kunja kwa nsasa, panango chitanda, bonzo, panango manda, adzakhale wopsyipiziwa kwa ntsiku 7.
17 Munthu wopsyipiziwa muyo amutapireko dotha ya ntsembe yamachimo yomwe idashokewa ire. Dotha mwiyo aiikhe mu chombo nkuikhamo madzi ya kukamadzi.
18 Manje munthu yemwe ni wosapsyipiziwa ambatenge kamuti ka hisope nkukavuwika m’madzi mumo patsogolo pake ambawazire tenti mwiyo, vombo vose na wanthu wose omwe enze mu tenti mwiyo. Komasoti ambawazire munthu yemwe adagumirira bonzo ya munthu, munthu yemwe waphewa, chitanda panango manda.
19 Munthu yemwe ni wosapsyipiziwa ule awazire munthu wopysipiziwa madzi pantsiku yachitatu komasoti pantsiku yachi 7 ndipo pantsiku yachi 7 mwiyo ambamuchenese ku chimo yake. Patsogolo pake yemwe ankuchenesewa muyo awatche vovala vake n’kusamba na madzi ndipo maulo yake ambakhale wochena.
20 Koma munthu wopsyipiziwa akaleka kudzichenesa, ambaphewe kuti osati akhale pomwe mumpingo muyo, ndawa wapsyipiza malo yopatulika ya Yahova. Iye alibe kuwaziriwa madzi yochenesera, ndipomwapa ni wopsyipiziwa.
21 Iyi ikhale lamulo kwa iwo mpakana kalekale: Munthu yemwe adawaza madzi yochenesera, ambawatche vovala vake. Ndipo munthu yemwe angagumirire madzi yochenesera mwayo ambakhale wopsyipiziwa mpakana maulo.
22 Chinthu chirichose chomwe munthu wopsyipiziwa muyo angagumirire, chimbakhale chopsyipiziwa. Komasoti munthu yemwe angagumirire chinthu mwicho, ambakhale wopsyipiziwa mpakana maulo.’”
