Numeri 35:1-34
35 Yahova adapitiriza kuyankhula na Mose muchipululu cha Mowabu ku Yeriko, pafupi na kamadzi ka Yorodano kuti:
2 “Lamula Aizirayeli kuti pa malo yawo yati akatambire, akaperekeko mathaundi yanango yokhalamo kwa Alevi. Akapereke pomwe kwa Alevi mwawo malo yodyeserako vipfuwo yozungulira mathaundi mwayo.
3 Alevi mwawo ambakakhale m’mathaundi mwayo ndipo malo yodyeserako vipfuwo mwayo yakakhale yawo, katundu wawo na nyama zawo zose.
4 Malo yodyeserako vipfuwo ya mathaundi yomwe mukapereke kwa Alevi mwawo yakakhale mametro 445* kuchokera pa mpanda wa thaundi mwiyo kuzungulira thaundi yose.
5 Mukapime kunja kwa thaundi, mametro 890 kumbali yakumachibese, mametro 890 kumbali yaku sul* na mametro 890 kumbali yaku norte,* kuzungulira thaundi. Yamwaya yakakhale malo yodyeserako vipfuwo ya wanthu wa m’mathaundi mwayo.
6 Mukapereke kwa Alevi mathaundi 6 kuti munthu yemwe wapha munzake ambakathawireko. Kuingizira pa mathaundi mwaya, mukapereke kwa Alevi mwawo mathaundi yanango 42.
7 Mathaundi yose yomwe mukapereke kwa Alevi yakakwane 48. Mukawapase mathaundi mwaya pabodzi na malo yodyeserako vipfuwo.
8 Mathaundi yomwe mukawapase ayo yakachokere pamalo yomwe Aizirayeli adzapasiwe. Pa dzinza ikulu mukatenge mathaundi yazinji, ndipo pa dzinza ing’ono mukatenge yang’onong’ono. Dzinza iriyose ikapereke mathaundi yanango kwa Alevi mobverana na malo yomwe akatambire.”
9 Yahova adapitiriza kuyankhula na Mose kuti:
10 “Yankhula na Aizirayeli, uwauze kuti: ‘Muyambuke Yorodano nkuyenda kudziko ya Kanani.
11 Musankhule mathaundi yoyenerera kwa imwepo, kuti yakhale mathaundi yanu yothawirako. Munthu yemwe wapha munzake mwangozi ambathawire kumuko.
12 Mathaundi mwayo yakhale malo yomwe munthu yemwe wapha munzake, yemwe ankuthawa wobwezera magazi ambathawireko, kuti yemwe wapha munzake uyo osati aphewe mpakana mulandu wake utongewe pamaso pa oweruza.
13 Mathaundi 6 yothawirako yomwe mukapereke ayo, yambakaphate basa mwiyi.
14 Mupereke mathaundi yatatu tsidya ino ya Yorodano, komasoti mukapereke mathaundi yatatu tsidya inango iyo, mudziko ya Kanani. Yamwaya yakakhale mathaundi yothawirako.
15 Mathaundi 6 mwaya ambakathawireko Aizirayeli, mulendo, na munthu aliyese yemwe ankukhala pakati pawo, aliyese yemwe wapha munthu mwangozi.
16 Koma peno munthu wamenya munzake na chisimbi nkufa, muyo ni chigananga. Ndipo chigananga mwicho chifunika kuphewa.
17 Peno waboma munzake na mwala wakuti ungaphe munthu, munzake muyo nkufa, muyo ni chigananga, ndipo chigananga mwicho chiphewe.
18 Peno wamenya munzake na muti wakuti ungaphe munthu, munzake muyo nkufa, munthu muyo ni chigananga. Chigananga mwicho chiphewe.
19 Wobwezera magazi ndiye anfunika kupha munthu wakupha munzake muyo. Akandodzamugumana, wobwezera magazi muyo adzamuphe.
20 Peno munthu wafa ndawa yakuti munthu munango wamugwinya, ndawa yakuti amuzonda, panango peno wafa ndawa yakuti wamuboma na chinthu na volinga voipa,*
21 panango wafa pawamumenya na djanja yake ndawa yakuti amuzonda, yemwe wapha munzake uyo aphewembo. Iye ni chigananga. Wobwezera magazi akandomugumana munthu muyo amuphe.
22 Koma peno wamugwinya mwangozi, osati ndawa yakuti ambazondana naye, panango peno wamuboma na chinthu mwangozi, osati na volinga voipa,*
23 panango peno ambamuwonalini ndipo wamugwesera mwala, munzake muyo nkufa, koma ambazondanalini naye komasoti wenze alibe cholinga chakuti amupweteke,
24 oweruza atonge pakati pa wakupha munzake muyo na wofunika kubwezera magazi, mobverana na malamulo mwaya.
25 Patsogolo pake oweruza mwawo ambapulumuse munthu wakupha munthu muyo m’manja mwa wobwezera magazi, ndipo amubwezere kuthaundi yothawirako komwe adathawira. Iye afunika kukhala muthaundi mwiyo mpakana nkulu wa antsembe yemwe adadzodzewa na mafuta yopatulika adzamwalire.
26 Koma wakupha munthu muyo akabula kunja kwa malire ya thaundi yothawirako komwe adathawira,
27 wobwezera magazi nkumugumana kunja kwa malire ya thaundi yothawirako nkumupha, wobwezera magazi muyo alibe mulandu wamagazi.
28 Wakupha munthu muyo afunika kukhala muthaundi yothawirako mpakana nkulu wa antsembe adzamwalire. Nkulu wa antsembe akamwalira, wakupha munthu muyo angabwerere kumalo yake.
29 Yamwaya yadzakhale malamulo kumibadwo yanu yose kulikose kwamungakhale.
30 Aliyese yemwe wapha munthu ambaphewe patsogolo pakuti mboni zatsimikizira. Koma munthu afunikalini kuphewa peno pali umboni woperekewa na munthu m’bodzi yekha.
31 Ayi kumbatambira malipiro yowombolera munthu yemwe wapha munzake, ndawa afunika kuphewa. Aphewedi muyo.
32 Komasoti ayi kumbatambira malipiro yowombolera munthu yemwe adathawira kuthaundi yothawirako na cholinga chakuti abvumiziwe kubwerera kwawo nkulu wa antsembe akalibe kumwalira.
33 Ayi kupsyipiza dziko yomwe munkukhalamo ndawa magazi ni yomwe yapsyipiza dziko. Ndipo dziko yomwe yapsyipiziwa na magazi ingachenesewelini na chinthu chirichose. Kupatulapo magazi ya munthu yemwe adakhesa magazi* mwayo.
34 Ayi kumbapsyipiza dziko yomwe munkukhalamo, yomwe inepanombo ninkukhalamo, ndawa inepano Yahova ninkukhala pakati pa Aizirayeli.’”
