Numeri 8:1-26
8 Yahova adayankhula na Mose kuti:
2 “Yankhula na Aroni ndipo umuuze kuti: ‘Ukagasa makandyero, makandyero yose 7 yambavunike malo yapatsogolo pa choikhapo kandyero mwicho.’”
3 Pamwapo Aroni adachita ivi: Adagasa makandyero mwayo kuti yavunikire malo yapatsogolo pa choikhapo kandyero mwicho, mobverana na vomwe Yahova adalamula Mose.
4 Choikhapo kandyero mwicho adachikonza tene: Chenze chagolide komasoti chochita kupfula kuchokera kutsinde mpakana kumaluwa yake. Choikhapo kandyero mwicho adachikonza mobverana na chitsanzo chomwe Yahova adawonesa Mose m’masomphenya.
5 Yahova adayankhula pomwe na Mose kuti:
6 “Utenge Alevi pakati pa Aizirayeli ndipo uwachenese.
7 Kuti uwachenese uchite ivi: Uwawawazire madzi yochenesera machimo ndipo iwo agere thupi yose na leza. Komasoti awatche vovala vawo nkudzichenesa.
8 Patsogolo pake iwo atenge ng’ombe ing’ono imuna, pabodzi na ntsembe yake yambewu ya ufa wonyodoka wothira mafuta. Iwepo utenge ng’ombe inango ing’ono imuna ya ntsembe yamachimo.
9 Ukateno, ubwerese Alevi mwawo kuchihema chogumanako ndipo usonkhanise gulu yose ya Aizirayeli.
10 Ukambakapereka Alevi mwawo pamaso pa Yahova, Aizirayeli mwawo ambakaikhe manja yawo pa Alevi mwawo.
11 Manje Aroni ambakapereke Alevi mwawo kwa Yahova ninge ntsembe yoyendesa uku na uku yochokera kwa Aizirayeli ndipo iwo ambaphate basa yotumikira Yahova.
12 Patsogolo pake Alevi mwawo ambaikhe manja yawo pamisolo ya ng’ombe zimuna. Akateno, upereke kwa Yahova ng’ombe ibodzi ninge ntsembe yamachimo, ndipo inango iyo uipereke ninge ntsembe yoshoka yopsyimphirizira machimo ya Alevi.
13 Uimiririse Alevi mwawo pamaso pa Aroni na wana wake ndipo uwapereke kwa Yahova ninge ntsembe yoyendesa uku na uku.
14 Upatule Alevi mwawo pakati pa Aizirayeli ndipo adzakhale wangu.
15 Patsogolo pake Alevi mwawo ambatumikire pachihema chogumanako. Umbachite vimwivi pakuwachenesa na kuwapereka ninge ntsembe yoyendesa uku na uku.
16 Amwawa ni operekewa. Aperekewa kwa inepano kuchokera pakati pa Aizirayeli. ‘Inepano ninkuwatenga kukhala wangu m’malo mwa wose oyamba kubadwa pakati pa Aizirayeli.
17 Mwana aliyese woyamba kubadwa pakati pa Aizirayeli ni wangu, peno akhale wa munthu panango wa nyama. Pantsiku yomwe nidapha mwana aliyese woyamba kubadwa mudziko ya Iguputo, nidawapatula kuti akhale wangu.
18 Ndipomwapa ninkutenga Alevi kuti akhale wangu m’malo mwa wana wose oyamba kubadwa pakati pa Aizirayeli.
19 Nidzapereke Alevi kwa Aroni na wana wake ninge operekewa kuchokera kwa Aizirayeli. Alevi mwawo adzatumikire m’malo mwa Aizirayeli pachihema chogumanako, ndipo ambapsyimphirize machimo ya Aizirayeli kuti muliri osati ugwe pakati pawo ndawa Aizirayeli mwawo afenderera malo yochena.”
20 Mose na Aroni na gulu yose ya Aizirayeli adachita vimwivi kwa Alevi mwawo. Aizirayeli adachitira Alevi mwawo mobverana na vose vomwe Yahova adalamula Mose pakunena va Alevi.
21 Pamwapo Alevi mwawo adadzichenesa nkuwatcha vovala vawo. Patsogolo pake Aroni adawapereka kwa Yahova ninge ntsembe yoyendesa uku na uku. Patsogolo pake Aroni muyo adawapsyimphirizira machimo yawo kuti awachenese.
22 Manje Alevi mwawo adangena muchihema chogumanako nkukayamba utumiki wawo pamaso pa Aroni na wana wake. Wanthu adachitira Alevi mwawo mobverana na vomwe Yahova adalamula Mose pakunena va Alevi.
23 Manje Yahova adauza Mose kuti:
24 “Lamulo iyi ni yonena va Alevi: Kuyambira wamagole 25 kuyenda kutsogolo ambangene m’gulu ya Alevi omwe ankutumikira muchihema chogumanako.
25 Koma akakwanisa magole 50, ambachoke mugulu mwiyo ndipo osati ambatumikire pomwe.
26 Iye ambandothandizira azibale wake omwe ankuphata basa pachihema chogumanako, koma osati ambatumikire kuchihema muko. Vimwivi ndivo vati umbachite na Alevi mobverana na basa zawo.”
