Numeri 30:1-16
30 Manje Mose adayankhula na atsogoleri wa madzinza ya Izirayeli kuti: “Bveserani vomwe Yahova walamula:
2 Munthu akapolomisa kwa Yahova panango akalumbira kudzimana, osati ambakangire kukwanirisa mawu yake. Ambachite vose vomwe wapolomisa ivo.
3 Mtsikana yemwe ankukhala pamuyi pa ababa wake akapolomisa kuchita vinthu vinango kwa Yahova, panango akalumbira kudzimana,
4 ababa wake nkumubva ankupolomisa panango ankulumbira kudzimana muko, koma ne kumutsutsa, mapolomisi yake yose mwayo yakhale teno ndipo lumbiro yake iriyose ya kudzimana ikhale teno.
5 Koma peno ababa wake amulambiza pomwe abva vomwe wapolomisa panango pambalumbira kudzimana, mapolomisi mwayo yakhale yalibe basa. Yahova adzamukhululukire ndawa ababa wake adamulambiza.
6 Koma peno mtsikana muyo walowodwa walumbira kale panango wapolomisa kale mosaganiza bwino,
7 manje mwamuna wake nkubva koma ne kumulambiza pantsiku yomwe wabva vomwe adapolomisa ivo, mapolomisi yake panango malumbiro ya kudzimana yomwe adachita ayo yambakhale teno.
8 Koma mwamuna wake akamulambiza pantsiku yomwe wabva vomwe adapolomisa ivo, ndiye kuti wapfudza polomisi panango lumbiro yomwe nkazi muyo adachita mosaganiza bwino ndipo Yahova adzamukhululukire nkazi muyo.
9 Koma nkazi wamasiye panango yemwe banja yake idamala akachita polomisi, polomisi iriyose yomwe wachita imbakhale teno.
10 Koma peno nkazi wapolomisa, panango peno wachita lumbiro ya kudzimana, ankukhala m’nyumba ya mwamuna wake,
11 mwamuna wake nkubva koma ne kumutsutsa panango kumulambiza, mapolomisi yake yose, panango lumbiro iriyose ya kudzimana yomwe wachita imbakhale teno.
12 Koma mwamuna wake akapfudza mapolomisi mwayo pantsiku yomwe wabva vomwe nkazi muyo adapolomisa panango malumbiro yake yodzimana yomwe adachita, mapolomisi mwayo yadzakhale yalibe basa. Mwamuna wake wapfudza ndipo Yahova adzamukhululukire nkazi muyo.
13 Pankhani yonena va polomisi iriyose panango lumbiro yonena va kudzimana panango pomwe kubvuma kubonera, mwamuna wake anamphanvu yobvuma panango kulamba kuti nkazi muyo akwanirise polomisi mwiyo.
14 Koma peno mwamuna muyo alibe kutsutsa vomwe nkazi muyo wapolomisa, ndipo ntsiku zinkupita, ndiye kuti mwamuna muyo wabverana nayo mapolomisi yose panango malumbiro yose ya kudzimana yomwe nkazi muyo adachita. Iye wabverana navo ndawa alibe kumulambiza nkazi muyo pantsiku yomwe adamubva ankupolomisa.
15 Koma peno mwamuna muyo wapfudza mapolomisi mwayo ndipo papita nthawe kuchokera pantsiku yomwe adabva mapolomisi mwayo, mwamuna muyo ndiye wati ambadawire mulandu m’malo mwa nkazi wake muyo.
16 Yamwaya ni malamulo yomwe Yahova adapasa Mose yonena va mwamuna na nkazi wake, komasoti baba na mwana wake wachitsikana yemwe ankukhala pamuyi pake.”
