Numeri 29:1-40
29 “‘Pantsiku yoyamba ya mwezi wachi 7, mumbachite nsonkhano wopatulika. Ayi kuti mumbaphate basa iriyose yonetesa. Ntsiku mwiyi imbakhale ntsiku yoliza lupenga.
2 Pantsiku mwiyi mumbapereke ntsembe yoshoka ya kapfungo kabwino* kwa Yahova. Mumbapereke ng’ombe imuna ibodzi ing’ono, nkhosa ibodzi imuna na wana wa nkhosa 7 amuna, ndipo mwana wa nkhosa aliyese ambakhale wagole ibodzi, vose vimbakhale vosapunduka.
3 Mumbapereke pomwe ufa wonyodoka wothira mafuta ninge ntsembe zake zambewu. Ufa muyo umbakhale wokwana magawo yatatu pa magawo 10 ya mpimo wa efa pa ng’ombe imuna mwiyo, magawo yawiri pa magawo 10 ya nkhosa imuna mwiyo
4 na gawo ibodzi pa magawo 10 ya mwana wankhosa aliyese pa wana wa nkhosa 7 amuna mwawo.
5 Mumbapereke pomwe mbuzi ibodzi ing’ono imuna, ninge ntsembe yamachimo yopsyimphirizira machimo yanu.
6 Mumbapereke ntsembe zimwizi kuingizira pa ntsembe yoshoka ya mwezi na mwezi, pabodzi na ntsembe yake yambewu. Mumbazipereke kuingizira pa ntsembe yoshoka ya ntsiku na ntsiku, pabodzi na ntsembe yake yambewu pabodzi pomwe na ntsembe zachakumwa. Mumbapereke ntsembe zimwizo zoshoka mobverana na dongosolo yake ya nthawe zose, ninge ntsembe yowotcha pamoto ya kapfungo kabwino* kwa Yahova.
7 Pantsiku yachi 10 ya mwezi wa 7 muyu, mumbachite nsonkhano wopatulika ndipo mumbawonese kuti munkudzibvera ntsisi ndawa ya machimo yanu.* Ayi kumbaphata basa iriyose.
8 Pantsiku mwiyi mumbapereke ntsembe yoshoka ya kapfungo kabwino* kwa Yahova. Mumbapereke ng’ombe imuna ibodzi ing’ono, nkhosa imuna ibodzi na wana wa nkhosa 7 amuna, ndipo mwana wa nkhosa aliyese ambakhale wagole ibodzi. Nyama zose mwizo zimbakhale zosapunduka.
9 Mumbapereke pomwe ntsembe zake zambewu za ufa wonyodoka wothira mafuta. Pakupereka ng’ombe imuna mwiyo mumbapereke pomwe ufa wokwana magawo yatatu pa magawo 10 ya mpimo wa efa.
10 Pakupereka aliyese pa wana wankhosa 7 amuna mwawo, mumbapereke pomwe ufa wokwana gawo ibodzi pa magawo 10 ya mpimo wa efa.
11 Mumbapereke pomwe mbuzi ing’ono ibodzi ninge ntsembe yamachimo. Mumbaipereke kuingizira pa ntsembe yamachimo pantsiku yopsyimphiriza machimo, na ntsembe yoshoka ya ntsiku na ntsiku, pabodzi na ntsembe zake zambewu na zachakumwa.
12 Pantsiku ya 15 ya mwezi wa 7, mumbachite nsonkhano wopatulika. Ayi kumbaphata basa iriyose yonetesa. Mumbachite chikondwerero pakuwonesa kulemekeza Yahova kwa ntsiku 7.
13 Pantsiku mwiyi mumbapereke ntsembe yoshoka yowotcha pamoto ya kapfungo kabwino* kwa Yahova. Mumbapereke ng’ombe 13 zing’onozing’ono zimuna, nkhosa zimuna ziwiri na wana wa nkhosa 14 amuna ndipo mwana wa nkhosa aliyese ambakhale wagole ibodzi, vose vimbakhale vosapunduka.
14 Mumbapereke pomwe ntsembe zake zambewu za ufa wonyodoka wothira mafuta. Ng’ombe iriyose pa ng’ombe 13 zimuna mwizo mumbaiperekere ufa wokwana magawo yatatu pa magawo 10 ya mpimo wa efa.
15 Nkhosa iriyose pa nkhosa ziwiri mwizo zimuna, mumbaiperekere ufa wokwana magawo yawiri pa magawo 10 ya mpimo wa efa.
16 Mumbapereke pomwe mbuzi ing’ono ibodzi ninge ntsembe yamachimo, kuingizira pa ntsembe yoshoka ya ntsiku na ntsiku, pabodzi na ntsembe yake yambewu na ntsembe yake yachakumwa.
17 Pantsiku yachiwiri, mumbapereke ng’ombe 12 zing’onozing’ono zimuna, nkhosa ziwiri zimuna, wana wa nkhosa 14 amuna, ndipo mwana wa nkhosa aliyese ambakhale wagole ibodzi, vose vimbakhale vosapunduka.
18 Pakupereka ng’ombe zimuna, nkhosa zimuna na wana wa nkhosa amuna, mumbapereke pomwe ntsembe zake zambewu na ntsembe zake zachakumwa mobverana na kuwanda kwa nyama mwizo pakutewedza dongosolo ya nthawe zose.
19 Mumbapereke pomwe mbuzi ing’ono ibodzi ninge ntsembe yamachimo. Mumbaipereke kuingizira pa ntsembe yake yoshoka ya ntsiku na ntsiku na ntsembe yake yambewu, pabodzi na ntsembe zake zachakumwa.
20 Pantsiku yachitatu, mumbapereke ng’ombe 11 zimuna na wana wankhosa 14 amuna, ndipo mwana wa nkhosa aliyese ambakhale wagole ibodzi, vose vimbakhale vosapunduka.
21 Pakupereka ng’ombe zimuna, nkhosa zimuna na wana wa nkhosa amuna, mumbapereke pomwe ntsembe zake zambewu na ntsembe zake zachakumwa mobverana na kuwanda kwa nyama mwizo, pakutewedza dongosolo ya nthawe zose.
22 Mumbapereke pomwe mbuzi ibodzi ninge ntsembe yamachimo kuingizira pa ntsembe yoshoka ya ntsiku na ntsiku pabodzi na ntsembe yake yambewu na ntsembe yake yachakumwa.
23 Pantsiku yachinayi, mumbapereke ng’ombe 10 zimuna, nkhosa ziwiri zimuna na wana wa nkhosa 14 amuna, ndipo mwana wa nkhosa aliyese ambakhale wagole ibodzi, vose vimbakhale vosapunduka.
24 Pakupereka ng’ombe zimuna, nkhosa zimuna na wana wa nkhosa amuna, mumbapereke pomwe ntsembe zake zambewu na ntsembe zake zachakumwa mobverana na kuwanda kwa nyama mwizo, pakutewedza dongosolo ya nthawe zose.
25 Mumbapereke pomwe mbuzi ing’ono ibodzi ninge ntsembe yamachimo, kuingizira pa ntsembe yoshoka ya ntsiku na ntsiku, pabodzi na ntsembe yake yambewu, komasoti ntsembe yake yachakumwa.
26 Pantsiku yachishanu, mumbapereke ng’ombe 9 zimuna, nkhosa ziwiri zimuna na wana wa nkhosa 14 amuna, ndipo mwana wa nkhosa aliyese ambakhale wagole ibodzi, vose vimbakhale vosapunduka.
27 Pakupereka ng’ombe zimuna, nkhosa zimuna na wana wa nkhosa amuna, mumbapereke pomwe ntsembe zake zambewu na ntsembe zake zachakumwa mobverana na kuwanda kwa nyama mwizo, pakutewedza dongosolo ya nthawe zose.
28 Mumbapereke pomwe mbuzi ibodzi ninge ntsembe yamachimo, kuingizira pa ntsembe yoshoka ya ntsiku na ntsiku, pabodzi na ntsembe yake yambewu, komasoti ntsembe yake yachakumwa.
29 Pantsiku yachi 6, mumbapereke ng’ombe 8 zimuna, nkhosa ziwiri zimuna na wana wa nkhosa 14 amuna, ndipo mwana wa nkhosa aliyese ambakhale wagole ibodzi, vose vimbakhale vosapunduka.
30 Pakupereka ng’ombe zimuna, nkhosa zimuna na wana wa nkhosa amuna mumbapereke pomwe ntsembe zake zambewu na ntsembe zake zachakumwa mobverana na kuwanda kwa nyama mwizo, pakutewedza dongosolo ya nthawe zose.
31 Mumbapereke pomwe mbuzi ibodzi ninge ntsembe yamachimo, kuingizira pa ntsembe yoshoka ya ntsiku na ntsiku, pabodzi na ntsembe yake yambewu, komasoti ntsembe yake yachakumwa.
32 Pantsiku yachi 7, mumbapereke ng’ombe 7 zimuna, nkhosa ziwiri zimuna na wana wa nkhosa 14 amuna, ndipo mwana wa nkhosa aliyese ambakhale wagole ibodzi, vose vimbakhale vosapunduka.
33 Pakupereka ng’ombe zimuna, nkhosa zimuna, na wana wa nkhosa amuna, mumbapereke pomwe ntsembe zake zambewu na ntsembe zake zachakumwa, mobverana na kuwanda kwa nyama mwizo, pakutewedza dongosolo ya nthawe zose ya ntsembe mwizi.
34 Mumbapereke pomwe mbuzi ibodzi ninge ntsembe yamachimo, kuingizira pa ntsembe yoshoka ya ntsiku na ntsiku, pabodzi na ntsembe yake yambewu, komasoti ntsembe yake yachakumwa.
35 Pantsiku yachi 8, mumbachite nsonkhano wapadera. Ayi kumbaphata basa iriyose yonetesa.
36 Pantsiku mwiyi mumbapereke ntsembe yoshoka yowotcha pamoto ya kapfungo kabwino* kwa Yahova. Mumbapereke ng’ombe ibodzi imuna, nkhosa ibodzi imuna na wana wa nkhosa 7 amuna, ndipo mwana wa nkhosa aliyese ambakhale wagole ibodzi, vose vimbakhale vosapunduka.
37 Pakupereka ng’ombe zimuna, nkhosa zimuna na wana wa nkhosa amuna, mumbapereke pomwe ntsembe zake zambewu na ntsembe zake zachakumwa, mobverana na kuwanda kwa nyama mwizo, pakutewedza dongosolo ya nthawe zose.
38 Mumbapereke pomwe mbuzi ibodzi ninge ntsembe yamachimo, kuingizira pa ntsembe yoshoka ya ntsiku na ntsiku, pabodzi na ntsembe yake yambewu, komasoti ntsembe yake yachakumwa.
39 Mumbapereke vimwivi kwa Yahova pa vikondwerero vanu, kuingizira pa ntsembe zomwe munkupereka ndawa ya polomisi yomwe mudachita, ntsembe zanu zaufulu zomwe mupereka kuti zikhale ntsembe zanu zoshoka, ntsembe zanu zambewu, ntsembe zanu zachakumwa na ntsembe zanu zachibverano.’”
40 Mose adauza Aizirayeli vose vomwe Yahova adamulamula.
Mawu ya m’nyantsi
^ Muchiyankhulo choyambirira adati: “kapfungo kokhazika ntima pasi.”
^ Muchiyankhulo choyambirira adati: “kapfungo kokhazika ntima pasi.”
^ Ambawonesa kudzibvera ntsisi muku pakudzimana kudya na vinthu vinango.
^ Muchiyankhulo choyambirira adati: “kapfungo kokhazika ntima pasi.”
^ Muchiyankhulo choyambirira adati: “kapfungo kokhazika ntima pasi.”
^ Muchiyankhulo choyambirira adati: “kapfungo kokhazika ntima pasi.”
