Numeri 18:1-32
18 Patsogolo pake Yahova adauza Aroni kuti: “Iwepo na wana wako, na banja yose ya ababa wako, mudzadawire mulandu wa vophonya vanu pa malamulo yonena va malo yopatulika. Iwepo na wana wako mudzadawire mulandu wa vophonya vanu pa malamulo yonena va untsembe wanu.
2 Utenge pomwe abale wako wa dzinza ya Levi, omwe ni wa ntundu wa ababa wako, kuti ambakuthandize. Ambatumikire iwepo ndipo ambatumikire pomwe wana wako pachihema cha Umboni.
3 Ambachite utumiki womwe mwawapasa na kuphata basa zawo zose za pachihema. Koma ayi kuti ambafenderere vipangizo va malo yochena, panango kufenderera guwa yantsembe kuti iwo panango imwepo muleke kufa.
4 Ambakuthandizeni na kuphata basa zawo zose za pachihema chogumanako, ndipo munthu wamba* aliyese osati ambakufenderereni.
5 Imwepo mwekha ndimwe mwati mumbaphate basa za antsembe m’malo yopatulika na paguwa yantsembe, kuti osati nidzakalipe pomwe ndawa ya Aizirayeli.
6 Inepano natenga Alevi omwe ni azibale wanu pakati pa Aizirayeli ndipo nawapereka kwa imwepo kuti akhale mphaso yanu. Iwo aperekewa kwa Yahova kuti ambatumikire pachihema chogumanako.
7 Iwepo na wana wako, udindo wanu ni kuphata basa zauntsembe paguwa yantsembe na pa vinthu vankati na kuseri kwa nguwo yogwatiza. Muyu ni utumiki wanu. Nakupasani utumiki wauntsembe kuti ukhale mphaso kwa imwepo, ndipo munthu wamba* aliyese akafenderera pafupi ambaphewe.”
8 Yahova adapitiriza kuyankhula na Aroni kuti: “Inepano nakupasa udindo wonyang’anira vinthu vose vomwe wanthu ambapereke kwa inepano. Pa vinthu vose vopatulika vomwe Aizirayeli ambapereke, iwepo na wana wako nakupasani gawo, kuti ikhale yanu mpakana kalekale.
9 Gawo yomwe mumbatambire imbachokere pa ntsembe zose zopatulika maninge zowotcha pamoto. Ntsembe zake ni izi: Ntsembe zose zomwe angapereke kwa inepano, kuphatanidzapo ntsembe zawo zambewu, ntsembe zawo zamachimo na ntsembe zawo zakupalamula. Gawo mwiyo imbakhale chinthu chopatulika maninge kwa iwepo na kwa wana wako.
10 Umbaidyere m’malo yopatulika maninge, ndipo mwamuna aliyese wa dzinza yanu angadyembo. Gawo mwiyi imbakhale chinthu chopatulika kwa iwepo.
11 Vinthu vomwe vimbakhale pomwe vako ni ivi: Mphaso za Aizirayeli, pabodzi na ntsembe zawo zose zoyendesa uku na uku zomwe ambapereke. Nazipereka kwa iwepo na kwa wana wako amuna na kwa wana wako akazi kuti zikhale gawo yanu mpakana kalekale. Aliyese yemwe ni wa m’nyumba yako yemwe ni wosapsyipiziwa angadye namwe.
12 Nakupasa mafuta yose yabwino maninge, vinyu wose unyowani wabwino maninge na mbewu zabwino maninge, vose mwivi ni vipaso vawo voyambirira vomwe ambapereke kwa Yahova.
13 Vipaso vose voyambirira kupsa m’minda yawo, vomwe ambavipereke kwa Yahova vimbakhale vako. Aliyese wa m’banja mwako yemwe ni wosapsyipiziwa angadye namwe.
14 Chinthu chirichose chomwe wanthu achipereka kwa Mulungu* mu Izirayeli chimbakhale chako.
15 Chamoyo chirichose choyamba kubadwa chomwe ambachipereke kwa Yahova, peno ni munthu panango nyama, chimbakhale chako. Olo nteno, umbawonesese kuti waombola mwana woyamba kubadwa wa munthu na mwana woyamba kubadwa wa nyama yopsyipiziwa.
16 Mwana muyo akakwanisa mwezi ubodzi panango kuposha, umbamuwombole na ntengo wowombolera. Umbamuwombole pa ntengo womwe adaikhiratu wa masekeli yasiliva yashanu, mobverana na sekeli ya kumalo yochena* yomwe ni yokwana magera 20.*
17 Koma ayi kuwombola ng’ombe imuna yoyamba kubadwa, mwana wa nkhosa mwamuna woyamba kubadwa, panango mbuzi yoyamba kubadwa. Vimwivi ni vopatulika. Magazi yake umbayawaze paguwa yantsembe, ndipo mafuta yake umbayawotche pamoto kuti yakhale ntsembe ya kapfungo kabwino* kwa Yahova.
18 Umbatenge nyama yake kuti ikhale yako. Ninge momwe uchitira na nganga ya ntsembe yoyendesa uku na uku komasoti mwendo wakumbuyo wakumakulu, nyama mwiyi imbakhale yako.
19 Vopatulika vose vomwe Aizirayeli ambapereke kwa Yahova, nakupasa iwepo na wana wako amuna na akazi, kuti ikhale gawo yanu mpakana kalekale. Imwiyi ni pangano yamunyu* mpakana kalekale yomwe Yahova ankuchita na iwepo komasoti mbadwa zako.”
20 Yahova adapitiriza kuyankhula na Aroni kuti: “Iwepo udzakhale ulibe mbali mudziko yawo, ndipo udzapasiwelini malo pakati pawo kuti yakhale yako. Inepano ndine gawo yako na mbali yako pakati pa Aizirayeli.
21 Inepano napereka kwa wana wa Levi chakhumi chirichose mu Izirayeli kuti ikhale mbali yawo ndawa ya utumiki womwe ankuchita, utumiki wa pachihema chogumanako.
22 Aizirayeli osati adzafenderere pomwe chihema chogumanako, ndawa akadzachita teno adzachimwe nkufa.
23 Alevi mwawo ambachite utumiki wawo pa chihema chogumanako ndipo ndiwo wati ambadawire mulandu wa vophonya va wanthu mwawo. Iwo ayi kuti ambakhale na malo pakati pa Aizirayeli. Imwiyi ni lamulo mpakana kalekale ku mibadwo yanu yose.
24 Chakhumi chomwe Aizirayeli ambapereke kwa Yahova, napereka kwa Alevi kuti chikhale gawo yawo. Ndipomwapa nidawauza kuti osati atambire malo pakati pa Aizirayeli.’”
25 Patsogolo pake Yahova adauza Mose kuti:
26 “Uza Alevi kuti: ‘Mumbatambire kwa Aizirayeli chakhumi chomwe nakupasani kuti chikhale gawo yanu. Ndipo pa chakhumi chomwe mumbatambire icho, mumbapereke chakhumi kwa Yahova.
27 Chakhumi mwicho, Mulungu ambachiwone kuti ni chopereka chanu molingana na tirigu wochokera pamalo yopulira, vinyu uzinji wochokera mopondera uva, panango mafuta yazinji yochokera mu chosikinyira mafuta.
28 Mukambachita vimwivi, imwepo mudzakhale kuti mwaperekambo chopereka chanu kwa Yahova, kuchokera pa vakhumi vose vomwe mumbatambire kuchokera kwa Aizirayeli. Kuchokera pa vakhumi mwivo, mumbapereke chopereka chanu kwa Yahova pakupereka kwa Aroni wantsembe.
29 Pa mphaso zose zabwino maninge zomwe mwatambira ninge chinthu chopatulika, mumbapereke kwa Yahova vopereka vosiyanasiyana.’
30 Ndipo uwauze kuti: ‘Mukapereka vabwino maninge pa vopereka mwivo, Mulungu ambawone kuti imwepo Alevi mwapereka tirigu wochokera pamalo yopulira, vinyu wochokera moponderamo uva panango mafuta yochokera mu chosikinyiramo mafuta.
31 Imwepo na wa m’banja mwanu mumbadye vimwivo pamalo yaliyose, ndawa yamwayo ni malipiro yanu pa utumiki womwe mumbachite pachihema chogumanako.
32 Mukambapereka vinthu vabwino maninge kuchokera pa vinthu vimwivi, mudzachimwelini peno mungadye, ndipo ayi kuipisa vinthu vopatulika va Aizirayeli kuti osati mufe.’”
Mawu ya m’nyantsi
^ Muchiyankhulo choyambirira adati: “mulendo,” kutanthauza mwamuna yemwe ni wam’banjalini ya Aroni.
^ Muchiyankhulo choyambirira adati: “mulendo,” kutanthauza mwamuna yemwe ni wam’banjalini ya Aroni.
^ Kutanthauza chirichose chomwe achikonza kuti chikhale chopatulika pochipereka kwa Mulungu mwakuti chingawombolewelini pomwe mpakana kalekale.
^ Panango kut: “sekeli yochena.”
^ Gera ibodzi ni yolingana na magrama 0,57. Onani vakumapeto B14.
^ Panango kuti: “kapfungo kokhazika ntima pasi.”
^ Imwiyi ni pangano yosamala ndipo ingachinjiwelini.
