Numeri 4:1-49
4 Manje Yahova adayankhula na Mose na Aroni kuti:
2 “Muwerenge wana wose wa Kohati pa wana wa Levi, potewedza mabanja yawo na nyumba za azibereki wawo.
3 Muwerenge wose kuyambira wamagole 30 mpakana 50, omwe ali mugulu ya wanthu omwe adasankhuliwa kuti ambaphate basa muchihema chogumanako.
4 Utumiki womwe wana wa Kohati ambauchite muchihema chogumanako, womwe ni utumiki wopatulika maninge, ni uyu:
5 Mukambafulusa nsasa, Aroni na wana wake ambangene muchihema nkuchosa nguwo yogwatiza ndipo ambafunikize likasa ya Umboni na nguwo yogwatisa mwiyo.
6 Ambafunikize pomwe na vikumba va akatumbu, nkuyanzapo nguwo zagirini* padzulu pake. Patsogolo pake ambabwezerese m’malo mwake tumiti twake tonyamulira.
7 Iwo ambayanze pomwe nguwo yagirini pameza ya nkate wachiwonesero, nkuikhapo mbale, makhapu, mbale zonoka na mitsuko ya ntsembe yachakumwa. Nkate wachiwonesero womwe ni ntsembe ya nthawe zose umbapitirize kukhala pamwapo.
8 Akachita teno, ambavifunikize na nguwo ifuwira maninge, komasoti ambafunikize meza mwiyo na vikumba va akatumbu. Patsogolo pake ambabwezerese m’malo mwake tumiti twake tonyamulira.
9 Manje ambatenge nguwo yagirini nkufunikiza choikhapo kandyero, pabodzi na kandyero zake, vopanira vake vodzimwira kandyero, voikhamo dotha* ya vingwe va kandyero na vombo vake vose vosungiramo mafuta yophatisira basa nthawe zose.
10 Choikhapo makandyero mwicho pabodzi na vipangizo vake vose, ambavikulungire muchikumba cha akatumbu nkuviikha pa tumiti tonyamulira.
11 Patsogolo pake, ambafunikize guwa yantsembe yagolide na nguwo yagirini. Ambaifunikize pomwe na vikumba va akatumbu, nkubwezeresa m’malo mwake tumiti twake tonyamulira.
12 Akachita teno, ambatenge vombo vose vomwe aphatisa basa pa utumiki wawo nthawe zose m’malo yochena, nkuvikukutidza na nguwo yagirini. Patsogolo pake ambavifunikize na vikumba va akatumbu, nkuviikha patumiti tonyamulira.
13 Ambachose dotha* paguwa yantsembe nkuyanzapo nguwo ya ukuse wa nkhosa wapsupsupsu.
14 Ambaikhepo vombo vose vomwe aviphatisa basa akambatumikira paguwa yantsembe. Ambaikhepo voikhamo dotha ya vingwe va kandyero, magarfu yakuluyakulu, mafosholo, mbale zonoka na vombo vose va paguwa yantsembe. Patsogolo pake ambavifunikize na vikumba va akatumbu, nkubwezeresa m’malo mwake tumiti tonyamulira.
15 Pomwe munkufulusa nsasa, Aroni na wana wake ambakhale kuti amaliza kale kufunikiza vinthu va m’malo yochena na vombo vose va m’malo yochena mwayo. Patsogolo pake wana wa Kohati ambabwere kudzanyamula, koma iwo osati ambagumirire vinthu mwivo va m’malo yochena ndawa akachita teno adzafe. Wana wa Kohati ndiwo anaudindo wonyamula vinthu mwivi pachihema chogumanako.
16 Eleazara mwana wa wantsembe Aroni ndiye anaudindo wonyang’anira mafuta ya kandyero, vofukiza vonunkhira, ntsembe ya nthawe zose na yambewu na mafuta yodzodzera. Anaudindo wonyang’anira chihema chose na vinthu vose va mumo, kuphatanidzapo malo yochena na vombo vake.”
17 Yahova adayankhula pomwe na Mose na Aroni kuti:
18 “Ayi kubvuma kuti dzinza ya mabanja ya Kohati idzongeke pakati pa Alevi.
19 Koma uchite ivi kuti iwo osati aphewe ndawa yofenderera vinthu vopatulika maninge. Aroni na wana wake ambangene muchihema mwicho, ndipo ambapase munthu aliyese basa na vinthu vakuti anyamule.
20 Wana wa Kohati mwawo osati adzangene kuti akawone vinthu vopatulika olo pang’ono pokha ndawa akadzachita teno adzafe.”
21 Manje Yahova adayankhula na Mose kuti:
22 “Uwerenge wana wose wa Gerisoni pakutewedza nyumba za azibereki wawo na mabanja yawo.
23 Muwerenge wose kuyambira wamagole 30 mpakana 50, omwe ali mugulu ya wanthu omwe adasankhuliwa kuti ambaphate basa muchihema chogumanako.
24 Wanthu wa dzinza ya Agerisoni adapasiwa basa yosamalira na kunyamula vinthu ivi:
25 Ambanyamule nguwo za chihema panango kuti chihema chogumanako, nguwo yofunikiza chihema, chofunikiza cha chikumba cha katumbu chomwe chiri padzulu pake na nguwo yogwatiza ya pansuwo wa chihema chogumanako.
26 Ambanyamule pomwe nguwo za mpanda wa malo ya pachihema, nguwo yogwatisa ya pansuwo wa mpanda womwe wazungulira chihema na guwa yantsembe, vingwe volimbisira mpanda muyo, vombo vake vose na vinthu vinango vose vomwe aviphatisira basa pa utumiki muyu. Basa yati ambaphate ni mwiyi.
27 Aroni na wana wake ambanyang’anire basa yomwe wana wa Gerisoni akuchita na vinthu vomwe akunyamula. Ambawauze basa zomwe ambaphate na vinthu vomwe ambanyamule.
28 Utumiki womwe mabanja ya wana wa Gerisoni ambachite muchihema chogumanako ni muyu. Itamara mwana wa wantsembe Aroni, ndiye wati ambanyang’anire utumiki wawo.
29 Nawombo wana wa Merari uwawerenge pakutewedza mabanja yawo na nyumba za azibereki wawo.
30 Muwerenge wose kuyambira wamagole 30 mpakana 50, omwe ali mugulu ya wanthu omwe adasankhuliwa kuti ambaphate basa muchihema chogumanako.
31 Vinthu vomwe ambanyamule, mobverana na utumiki wawo pa chihema chogumanako ni ivi: Maferemu ya chihema, tumiti twake, vipilala vake na visimbi vokhazikapo vipilala na maferemu.
32 Ambanyamule pomwe vipilala vozungulira malo ya pachihema, visimbi vokhazikapo vipilala mwivo, nkhokho na vingwe volimbisira mpanda muyo pabodzi na vipangizo vose vomwe ambaphatise basa pa utumiki muyu. Munthu aliyese mumbamupase vinthu vakuti ambanyamule.
33 Vimwivi ndivo vomwe mabanja ya wana wa Merari ambachite ninge mbali ya utumiki wawo pachihema chogumanako. Itamara mwana wa wantsembe Aroni, ndiye wati ambanyang’anire utumiki wawo.”
34 Patsogolo pake Mose na Aroni pabodzi na atsogoleri wa wanthu mwawo, adawerenga wana wa Kohati pakutewedza mabanja yawo na nyumba za azibereki wawo.
35 Adawerenga wose kuyambira wamagole 30 mpakana 50, omwe enze mugulu ya wanthu omwe adasankhuliwa kuti ambaphate basa pachihema chogumanako.
36 Wose omwe adawerengewa, mobverana na mabanja yawo, adakwana 2750.
37 Amwawa ni wanthu omwe adawerengewa kuchokera m’mabanja ya wana wa Kohati, wose omwe ambatumikira pa chihema chogumanako. Mose na Aroni adawawerenga pobvera vomwe Yahova adawalamula kupitira mwa Mose.
38 Wana wa Gerisoni adawerengewa potewedza mabanja yawo na nyumba za azibereki wawo,
39 adawerenga wose kuyambira wamagole 30 mpakana 50, omwe enze mugulu ya wanthu omwe adasankhuliwa kuti ambatumikire pa chihema chogumanako.
40 Wose omwe adawerengewa pakutewedza mabanja yawo na nyumba za azibereki wawo, adakwana 2630.
41 Amwawa ni wanthu omwe adawerengewa kuchokera m’mabanja ya wana wa Gerisoni, wose omwe ambatumikira pa chihema chogumanako. Mose na Aroni adawawerenga pakubvera vomwe Yahova adawalamula.
42 Wana wa Merari adawerengewa pakutewedza mabanja yawo na nyumba za azibereki wawo,
43 adawerenga wose kuyambira wamagole 30 mpakana 50, omwe enze mugulu ya wanthu omwe adasankhuliwa kuti ambaphate basa pachihema chogumanako.
44 Wose omwe adawerengewa mobverana na mabanja yawo adakwana 3200.
45 Amwawa ni wanthu omwe adawerengewa kuchokera m’mabanja ya Merari, omwe Mose na Aroni adawawerenga pakubvera vomwe Yahova adawalamula kupitira mwa Mose.
46 Mose na Aroni, pabodzi na atsogoleri wa Izirayeli, adawerenga Alevi wose pakutewedza mabanja yawo na nyumba za azibereki wawo.
47 Adawerenga kuyambira wamagole 30 mpakana 50, ndipo wose adasankhuliwa kuti ambatumikire na kutakula vinthu va pachihema chogumanako.
48 Wanthu wose omwe adawerengewa adakwana 8580.
49 Wanthu mwawa adawerengewa pobvera vomwe Yahova adalamula kupitira mwa Mose, aliyese mobverana na utumiki wake na vinthu vomwe ambanyamula. Adawerengewa mobverana na vomwe Yahova adalamula Mose.
