Numeri 23:1-30
23 Patsogolo pake Balamu adauza Balaki kuti: “Mumange maguwa yantsembe yokwana 7 pamalo yano. Mukateno muniphere ng’ombe zimuna 7 na nkhosa zimuna 7 nkuzikonzakonza.”
2 Nthawe mwiyoletu Balaki adachita vomwe Balamu adamuuza. Patsogolo pake Balaki na Balamu adapereka ntsembe. Adapereka ng’ombe imuna na nkhosa imuna paguwa iriyose.
3 Manje Balamu adauza Balaki kuti: “Mukhale pampano pafupi na ntsembe yanu yoshoka ndipo inepano ninkuyamba nachoka. Panango Yahova ayankhule nane ndipo vati aniuze nikuuzenimbo.” Pamwapo Balamu adayenda padzulu pa phiri.
4 Patsogolo pake Mulungu adagumana na Balamu ndipo iye adauza Mulungu muyo kuti: “Namanga* maguwa yantsembe yokwana 7 ndipo napereka ntsembe ng’ombe imuna na nkhosa imuna paguwa iriyose.”
5 Yahova adauza Balamu vakuti akanene.* Patsogolo pake adamuuza kuti: “Bwerera kwa Balaki, ukamuuze mawu mwaya.”
6 Iye adabwerera kwa Balaki ndipo adagumana kuti Balaki muyo pabodzi na akuluakulu* wose wa ku Mowabu aima pafupi na ntsembe yake yoshoka.
7 Pamwapo Balamu adanena ndakatulo yakuti:
“Balaki mpfumu ya Mowabu wanibweresa kuno kuchokera ku Aramu,Kuchokera kumapiri yakumachibese nkuniuza kuti:
‘Bwera, udzanitembererere Yakobo.
Bwera, udzachemerere tsoka Izirayeli.’
8 Ningakwanise tani kutemberera wanthu omwe Mulungu alibe kuwatemberera?
Ndipo ningakwanise tani kuchemerera tsoka wanthu omwe Yahova alibe kuwachemerera tsoka?
9 Ninkukwanisa kuwaona na padzulu pa minyala pano,Ndipo ninkukwanisa kuwaona na padzulu pa mapiri pano.
Wanthu mwawa ankukhala paokhaokha.
Iwo ankudziona kuti ni osiyana na makhaindi yanango.
10 Ni mbani angakwanise kuwerenga ntundu wa Yakobo, womwe ni uzinji ninge pfumbiPanango kuwerenga gawo ibodzi pa magawo yanayi ya Izirayeli?
Nisiyeni nife impfa ya munthu wolungama,Ndipo mapeto yangu yakhale ninge yawo.”
11 Patsogolo pake Balaki adauza Balamu kuti: “Ndawa chani mwanichitira vimwivi? Nakubweresani kuno kuti mudzatemberere azondi wangu, koma imwepo mwawadalisa.”
12 Koma iye adamudawira kuti: “Ko nifunikalini kuyankhula vomwe Yahova waniuza?”*
13 Balaki adauza Balamu kuti: “Naboni tiyende kumalo yanango komwe mukakwanise kuwaona wanthu mwawo. Mukaonelini wose, koma mundokaona ang’onong’ono. Mukatemberere mwawo.”
14 Pamwapo adayenda naye ku Zofimu, padzulu pa phiri ya Pisiga. Kumuko adamanga maguwa yantsembe 7, nkupereka ntsembe ng’ombe imuna na nkhosa imuna paguwa iriyose.
15 Manje Balamu adauza Balaki kuti: “Mukhale pampano, pafupi na ntsembe yanu mwiyi yoshoka, koma inepano ninkuyenda uko kukayankhula na Mulungu.”
16 Kumuko Yahova adayankhuladi na Balamu nkumuuza vati akanene kuti:* “Bwerera kwa Balaki ndipo ukamuuze vomwe nakuuza.”
17 Pamwapo Balamu adabwerera kwa Balaki, ndipo adamugumana ankudikhira pafupi na ntsembe yake yoshoka, akuluakulu wa ku Mowabu ali naye pabodzi. Manje Balaki adabvunza Balamu kuti: “Ko Yahova wakuuza chani?”
18 Pamwapo Balamu adayamba pomwe kuyankhula mwa ndakatulo kuti:
“Nyamuka Balaki iwe, bvaya.
Nibvesere iwe mwana wa Zipori.
19 Mulungu alilini ninge munthu yemwe anena mabodza,Alilini ninge mwana wa munthu yemwe achinja maganizo.*
Akanena chinthu, ko angakangire kuchita?
Akayankhula, ko angakangire kukwanirisa?
20 Ine nabwera kudzadalisa,Manje Iye wadalisa, ndipo ningakwaniselini kuchinja vimwivo.
21 Iye angabvumelini kuti mphanvu zirizose zamatsenga zidzonge Yakobo,Ndipo angabvumelini kuti Izirayeli agumane na bvuto iriyose.
Mulungu wake Yahova ali naye,Ndipo amutamanda mokuwa ninge mpfumu yawo.
22 Mulungu ankuwabulisa ku Iguputo.
Kwa iwo, Iye ali ninge minyanga ya ng’ombe imuna yam’thengo.
23 Palibe yemwe angalodze Yakobo,Panango kuwombeza polimbana na Izirayeli.
Manjeuno wanthu anganene va Yakobo panango kuti Izirayeli kuti:
‘Onani vomwe Mulungu wachita!’
24 Uyu ni ntundu wa wanthu womwe udzamuke ninge mphondolo,Udzanyamuke ninge mphondolo.
Udzagonelini pasi mpakana udye nyamaNa kumwa magazi ya nyama mwizo zophewa.”
25 Padateno Balaki adauza Balamu kuti: “Peno mungakwaniselini kuwatemberera olo pang’ono, ayi kuwadalisa pomwe ndipo.”
26 Balamu adadawira Balaki kuti: “Ko niribe kukuuzani kuti: “Nichite vose vomwe Yahova wanena’?”
27 Balaki adauza Balamu kuti: “Pulizi bwerani kuno. Naboni tiyende pomwe kumalo yanango. Panango kumuko Mulungu chaiye akabvume kuti mutemberere wanthu mwawa.”
28 Manje Balaki adatenga Balamu nkuyenda naye padzulu pa phiri ya Peori, yomwe idanyang’anana na Yesimoni.*
29 Patsogolo pake Balamu adauza Balaki kuti: “Mumange maguwa yantsembe 7 pamalo yano ndipo muniphere ng’ombe zimuna 7 na nkhosa zimuna 7 nkuzikonzakonza.”
30 Pamwapo Balaki adachita vomwe Balamu adanena ndipo adapereka ntsembe ng’ombe imuna na nkhosa imuna paguwa iriyose.
Mawu ya m’nyantsi
^ Panango kuti: “Nandandalika.”
^ Muchiyankhulo choyambirira adati: “adaikha mawu nkamwa mwa Balamu.”
^ Panango kuti: “anzake omuthandizira kutonga.”
^ Muchiyankhulo choyambirira adati: “mawu yomwe Yahova waikha nkamwa mwangu umu.”
^ Muchiyankhulo choyambirira adati: “nkumuikha mawu aya nkamwa.”
^ Panango kuti: “yemwe adziringa.”
^ Mabaibolo yanango yanena kuti: “chipululu.”
