Numeri 3:1-51

  • Wana amuna wa Aroni (1-4)

  • Alevi adasankhuliwa kuti ambatumikire (5-39)

  • Kuwombola wana oyamba kubadwa (40-51)

3  Iyi ni mbiri ya mbadwa za* Aroni na Mose panthawe yomwe Yahova adayankhula na Mose m’phiri ya Sinai. 2  Madzina ya wana wa Aroni yenze aya: Woyamba wenze Nadabu, nkudzabwera Abihu, Eleazara na Itamara. 3  Madzina ya wana wa Aroni yenze mwaya. Iwo enze antsembe odzodzewa omwe adaikhiwa* kuti akhale antsembe. 4  Koma Nadabu na Abihu adafa pamaso pa Yahova padapereka moto wosabvumizika kwa Yahova muchipululu cha Sinai, ndipo iwo adafa alibe wana. Koma Eleazara na Itamara adapitiriza kutumikira ninge antsembe pabodzi na Aroni ababa wawo. 5  Patsogolo pake Yahova adauza Mose kuti: 6  “Chemeresa dzinza ya Levi ndipo uipereke kwa wantsembe Aroni kuti imbamutumikire. 7  Iwo ambakwanirise udindo wawo pakumuthandiza na pakutumikira gulu yose pa basa za pachihema chogumanako. 8  Ambasamalire vombo vose va pachihema chogumanako, na kukwanirisa udindo wawo wotumikira Aizirayeli pakuphata basa za pachihema. 9  Upereke Alevi kwa Aroni na wana wake. Mwawa ndiwo aperekewa. Aperekewa kuchokera kwa Aizirayeli. 10  Uikhe Aroni na wana wake kuti akhale antsembe, ndipo ambaphate basa zawo zauntsembe. Munthu wamba* aliyese yemwe wafenderera malo mwayo, ambaphewe.” 11  Yahova adapitiriza kuyankhula na Mose kuti: 12  “Inepano nasankhula Alevi pakati pa Aizirayeli m’malo mwa wana wose wa Aizirayeli oyamba kubadwa* ndipo Alevi mwawo adzakhale wangu. 13  Mwana aliyese woyamba kubadwa ni wangu. Pantsiku yomwe nidapha mwana aliyese woyamba kubadwa mudziko ya Iguputo, nidapatula mwana aliyese woyamba kubadwa pakati pa Aizirayeli kuti akhale wangu, kuyambira munthu mpakana chipfuwo. Amwawa ambakhale wangu. Inepano ndine Yahova.” 14  Yahova adapitiriza kuyankhula na Mose muchipululu cha Sinai kuti: 15  “Uwerenge wana wa Levi motewedza nyumba ya azibereki wawo na mabanja yawo. Uwerenge mwamuna aliyese kuyambira wa mwezi ubodzi kuyenda kutsogolo.” 16  Manje Mose adawerenga Alevi mwawo pakubvera vomwe Yahova adamulamula. 17  Madzina ya wana wa Levi yenze aya: Gerisoni, Kohati na Merari. 18  Madzina ya wana wa Gerisoni, potewedza mabanja yawo ni aya: Libini na Simeyi. 19  Wana wa Kohati, pakutewedza mabanja yawo, enze Amuramu, Izara, Heburoni na Uziyeli. 20  Wana wa Merari, potengera mabanja yawo, enze Mali na Musi. Mabanja ya Alevi yenze mwaya pakutewedza nyumba za azibereki wawo. 21  Mabanja ya Alibini na Asimeyi yadachokera kwa Gerisoni. Mwaya ndiyo yenze mabanja ya Agerisoni. 22  Amuna wose omwe adawerengewa kuyambira wa mwezi ubodzi kuyenda kutsogolo adakwana 7500. 23  Mabanja ya Agerisoni yambamanga misasa yawo kumbali ya kumaulo kwa chihema. 24  Mtsogoleri wa nyumba ya Agerisoni wenze Eliyasafu, mwana wa Layeli. 25  Basa yomwe wana wa Gerisoni adapasiwa pachihema chogumanako yenze yosamalira chihema na nguwo yoyanza pachihema mwicho, nguwo yake yopsyimphirizira, nguwo yogwatiza yapansuwo, 26  nguwo za mpanda wapanja, nguwo yogwatiza yapansuwo wa mpanda wozungulira chihema na guwa yantsembe, vingwe va chinguwo chake na basa zose za vinthu vimwivi. 27  Mabanja ya Aamuramu, Aizara, Aheburoni na Auziyeli yadachokera kwa Kohati. Mwaya ndiyo yenze mabanja ya Akohati. 28  Amuna wose omwe adawerengewa, kuyambira wa mwezi ubodzi kuyenda kutsogolo, enzepo 8600. Amwawa basa yawo yenze kutumikira pamalo yochena. 29  Mabanja ya wana wa Kohati yambamanga nsasa wawo ku sul* kwa chihema. 30  Mtsogoleri wa nyumba ya Kohati wenze Elizafana, mwana wa Uziyeli. 31  Basa yawo yenze yosamalira Likasa, meza, choikhapo kandyero, maguwa yantsembe, vombo vomwe ambaphatisa basa potumikira m’malo yochena, nguwo yogwatiza na basa zose zobverana na vinthu vimwivi. 32  Nkulu wa atsogoleri wose wa Alevi wenze Eleazara, mwana wa wantsembe Aroni. Iye ndiye ambanyang’anira wanthu wose omwe ambatumikira pamalo yochena. 33  Mabanja ya Amali na Amusi yadachokera kwa Merari. Yamwaya ndiyo yenze mabanja ya Amerari. 34  Amuna wose omwe adawerengewa, kuyambira wa mwezi ubodzi kuyenda kutsogolo enzepo 6200. 35  Mtsogoleri wa nyumba ya mabanja ya Merari wenze Zuriyeli, mwana wa Abihaili. Iwo ambamanga nsasa wawo ku norte* kwa chihema. 36  Basa yomwe wana wa Merari adapasiwa yenze yosamalira maferemu ya chihema, tumiti twake, vipilala vake, visimbi vokhazikapo maferemu na vipilala, vombo vake vose na basa zose zobverana na vinthu vimwivi. 37  Ambasamalira pomwe vipilala va mpanda wozungulira malo mwayo, visimbi vokhazikapo vipilala mwivo komasoti nkhokho na vingwe vake. 38  Omwe ambamanga nsasa wawo kumachibese kwa chihema, kumbali yobulira dzuwa, enze Mose na Aroni, komasoti wana wa Aroni. Basa yawo yenze kutumikira m’malo yopatulika, m’malo mwa Aizirayeli. Munthu wamba aliyese* yemwe wafenderera malo mwayo ambafunika kuphewa. 39  Amuna wose wa dzinza ya Levi omwe Mose na Aroni adawawerenga, pobvera lamulo ya Yahova enzepo 22 000. Adawerenga amuna wose kuyambira wa mwezi ubodzi kuyenda kutsogolo pakutewedza mabanja yawo. 40  Patsogolo pake Yahova adauza Mose kuti: “Uwerenge wana wose amuna oyamba kubadwa wa Aizirayeli kuyambira wa mwezi ubodzi kuyenda kutsogolo ndipo unembe madzina yawo. 41  Unitengere Alevi kuti akhale wangu m’malo mwa wana wose amuna oyamba kubadwa wa Aizirayeli. Unitengere pomwe vipfuwo vose va Alevi m’malo mwa vipfuwo vose voyamba kubadwa va Aizirayeli. Inepano ndine Yahova.” 42  Mose adawerenga wana wose amuna oyamba kubadwa wa Aizirayeli, mobverana na vomwe Yahova adamulamula. 43  Wana wose amuna woyamba kubadwa omwe adawawerenga, kuyambira wa mwezi ubodzi kuyenda kutsogolo, adakwana 22 273. 44  Yahova adapitiriza kuyankhula na Mose kuti: 45  “Utenge Alevi m’malo mwa wana wose amuna woyamba kubadwa wa Aizirayeli. Utenge pomwe vipfuwo va Alevi m’malo mwa vipfuwo va Aizirayeli. Alevi mwawo ankufunika kukhala wangu. Inepano ndine Yahova. 46  Ninge malipiro* ya wana amuna oyamba kubadwa wa Aizirayeli okwana 273 omwe apitirira chiwerengero cha Alevi, 47  utenge masekeli* 5 kwa munthu aliyese, mobverana na mpimo wa sekeli ya kumalo yochena.* Sekeli ibodzi ikwana magera* 20. 48  Kobiri mwizi uzipereke kwa Aroni na wana wake. Zikhale malipiro* yowombolera Aizirayeli omwe apitirira chiwerengero cha Alevi.” 49  Pamwapo Mose adatambira kobiri zowombolera Aizirayeli omwe chiwerengero chawo chidapitirira cha Alevi. 50  Kwa wana amuna woyamba kubadwa wa Aizirayeli, adatambira kobiri zokwana masekeli 1365, mobverana na mpimo wa sekeli ya kumalo yochena. 51  Manje Mose adapereka kobiri za malipiro kwa Aroni na wana wake pobvera mawu ya Yahova, mobverana na vomwe Yahova adalamula Mose.

Mawu ya m’nyantsi

^ Muchiyankhulo choyambirira adati: “mibadwo ya.”
^ Muchiyankhulo choyambirira adati: “omwe manja yawo yadadzadziwa.”
^ Muchiyankhulo choyambirira adati: “Mulendo,” kutanthauza mwamuna yemwe ni wa m’banjalini ya Aroni.
^ Muchiyankhulo choyambirira adati: “wana wose woyamba kubadwa, ofungula mimba ya amayi wawo.”
^ Panango kuti: “kum’mwera.”
^ Panango kuti: “kumpoto.”
^ Muchiyankhulo choyambirira adati: “Mulendo aliyese,” kutanthauza munthu yemwe ni Mlevilini.
^ Sekeli ibodzi ni yolingana na magrama 11,4. Onani vakumapeto B14.
^ Panango kuti: “mobverana na sekeli yochena.”
^ Gera ibodzi yenze yolingana na magrama 0,57. Onani vakumapeto B14.

Bukhu mweyi niyotetezewa na ufulu wa zamalamulo