Numeri 20:1-29
20 M’mwezi woyamba, gulu yose ya Aizirayeli idafika muchipululu cha Zini, ndipo wanthu mwawo adakhala ku Kadesi. Kumuko ndiko komwe Miriamu adafera n’kuikhiwa m’manda.
2 Koma wanthu mwawo adasowa madzi pamalo mwapo, ndipo adasonkhana nkuyamba kushupa Mose na Aroni.
3 Wanthu mwawo adayamba kukangana na Mose kuti: “Vidakakhala bwino tidakafera pabodzi na azibale wathu wale omwe adafa pamaso pa Yahova.
4 Ndawa chani mwabweresa mpingo wa Yahova kuchipululu kuno kuti ise pabodzi na vipfuwo vathu tifere kuno?
5 Ndawa chani mudatibulisa mudziko ya Iguputo nkutibweresa kumalo yoipa yano? Kuno kungamerelini mbewu iriyose ndipo kulibe miti ya nkhuyu, miti ya uva panango miti ya makangaza. Olo madzi yakumwa chaiyo kulibe.”
6 Pavidateno, Mose na Aroni adachoka pamaso pa mpingo nkuyenda kunsuwo wa chihema chogumanako. Kumuko adagwada nkujolima mpakana nkhope zawo pasi ndipo ulemerero wa Yahova udayamba kuwonekera kwa iwo.
7 Pamwapo Yahova adauza Mose kuti:
8 “Tenga mpsyimbo ndipo iwepo na m’bale wako Aroni musonkhanise gulu yose ya wanthu mwawo. Muuze mwala pamaso pawo kuti ubulise madzi. Ubulise madzi m’mwala muyo kuti upase gulu mwiyo kuti imwe pabodzi na vipfuwo vawo.
9 Pamwapo Mose adatenga mpsyimbo ire pamaso pa Yahova mobverana na vomwe adamulamula.
10 Patsogolo pake Mose na Aroni adasonkhanisa mpingo wose pabodzi patsogolo pa mwala muyo, ndipo Mose adawauza kuti: “Manje tetekerani wanthu opanduka imwe! Ko tikubulisireni madzi m’mwala uyu?”
11 Mose padateno adayasula* djanja yake n’kumenya mwala muyo kawiri na mpsyimbo yake. Pamwapo madzi yazinji yadayamba kubula ndipo gulu yose mwiyo idayamba kumwa madzi mwayo pabodzi na vipfuwo vawo.
12 Patsogolo pake Yahova adauza Mose na Aroni kuti: “Ndawa yakuti mulibe kunikhulupirira ndipo mulibe kunilemekeza pamaso pa Aizirayeli, mudzaungeneselini mpingo muyu mudziko yomwe nidzawapase.”
13 Madzi mwayo adayapasa dzina yakuti madzi ya ku Meriba,* komwe Aizirayeli adakangana na Yahova ndipo adawawonesa kuti iye ni wochena.
14 Patsogolo pake Mose adatumiza wanthu kuchokera ku Kadesi kuyenda kwa mpfumu ya Edomu kukanena kuti: “Abale wanu Aizirayeli anena kuti: ‘Imwepo munkudziwa bwino va mabvuto yose yomwe tagumana nayo.
15 Pale azibereki wathu adayenda ku Iguputo ndipo tidakhala kumuko magole yazinji.* Aiguputo mwawo ambatidzudza pabodzi na azibereki wathu.
16 Pakumalizira pake, tidalirira Yahova ndipo iye adabva kulira kwathu. Iye adatitumizira mngelo nkutibulisa mudziko ya Iguputo. Manje tiri kuno ku Kadesi, thaundi yomwe iri m’malire ya dziko yanu.
17 Pulizi, mutibvumizeko kupita na mudziko yanu. Tipitelini na m’munda wanu uliwose, panango m’munda wa uva uliwose. Timwelini madzi ya pachitsime chanu chirichose. Timbondofamba mu Nsewu wa Mpfumu, osakhonera kumakulu panango kumadzere mpakana tigwate mudziko yanu.’”
18 Koma mpfumu ya Edomu idawadawira kuti: “Ayi kupitira na mudziko yathu. Mukapitiramo, nibwere na chibemba kudzamenyana namwe.”
19 Aizirayeli mwawo adadawira kuti: “Isepano tindodzapita mu nsewu ukulu, ndipo peno isepano panango vipfuwo vathu, tingamwe madzi yanu tidzakulipireni. Tinkufunalini chirichose neye, koma kundopitako na mudziko yanu basi.”
20 Koma iye adalambiza basi kuti: “Neye, ayi kupita na mudziko yathu.” Mpfumu ya Edomu paidanena vimwivi idabula na chigulu cha wanthu na masocha yamphanvu.*
21 Pamwapo mpfumu ya Edomu idalambiza Aizirayeli kuti apitire na mudziko yake. Pavidateno, Aizirayeli adalambalala dziko ya Edomu.
22 Gulu yose ya Aizirayeli idanyamuka ku Kadesi kule nkukafika ku phiri ya Hora.
23 Patsogolo pake Yahova adauza Mose na Aroni m’phiri ya Hora, m’malire ya dziko ya Edomu kuti:
24 “Aroni aikhiwe m’manda ninge momwe vidakhalira na azibereki wake.* Iye adzangenelini mudziko yomwe nidzapase Aizirayeli ndawa awiri imwe mudapandukira malangizo yangu pankhani ya madzi ya ku Meriba.
25 Utenge Aroni na mwana wake Eleazara nkukwera nawo m’phiri ya Hora.
26 M’phiri mumo ukamuvule Aroni vovala vake vauntsembe, nkuvazika mwana wake Eleazara ndipo Aroni akamwalire kumuko.”
27 Pamwapo Mose adachitadi vomwe Yahova adamulamula. Iwo adakwera phiri ya Hora wanthu wose mwawo ankuwona.
28 Kumuko, Mose adavula Aroni vovala vake vauntsembe nkuvazika mwana wake Eleazara. Patsogolo pake, Aroni adamwalira padzulu pa phiri mwapo. Pomalizira pake Mose na Eleazara adabuluka m’phiri mumo.
29 Gulu yose ya wanthu mwawo paidaona kuti Aroni wamwalira, banja yose ya Izirayeli idalira maliro ya Aroni kwa ntsiku 30.
