Numeri 5:1-31
5 Yahova adapitiriza kuyankhula na Mose kuti:
2 “Lamula Aizirayeli kuti ambachose mu nsasa munthu aliyese wakhate, aliyese wochucha ku vidzo voberekera na aliyese wopsyipiziwa ndawa yogumirira munthu wakufa.
3 Peno akhale mwamuna panango nkazi, mumbamubulise munsasa kuti osati apsyipize misasa ya wanthu omwe inepano ninkukhala pakati pawo.”
4 Pamwapo Aizirayeli adachitadi vimwivo mwakuti adawachosa wanthu mwawo kunja kwa nsasa, mobverana na vomwe Yahova adauza Mose.
5 Yahova adapitiriza kuyankhula na Mose kuti:
6 “Uza Aizirayeli kuti: ‘Peno mwamuna panango nkazi wachita machimo yaliyose yomwe wanthu achita, nkuchita vinthu mosakhulupirika pamaso pa Yahova, munthu muyo wapalamula mulandu.
7 Munthu muyo ambaulule chimo yomwe wachita. Ambapereke malipiro yose ya mulandu wake, komasoti ambaingizirepo gawo ibodzi pa magawo 5 ya malipiro mwayo. Ambapereke malipiro mwayo kwa munthu yemwe wamuphonyera.
8 Koma peno munthu yemwe waphonyerewa uyo wamwalira ndipo alibe wachibale wapafupi yemwe angatambire malipiro ya mulandu muyo, malipiro mwayo yambaperekewe kwa Yahova kuti yakhale ya wantsembe. Munthu yemwe wachimwa uyo ambapereke pomwe nkhosa imuna yakuti wantsembe muyo amupsyimphirizire machimo yake.
9 Vopereka vose va vinthu vopatulika, vomwe Aizirayeli avipereka kwa wantsembe, vimbakhale vake.
10 Vinthu vopatulika va munthu aliyese vimbakhale vake. Chirichose chomwe munthu angapereke kwa wantsembe, chimbakhale cha wantsembe muyo.’”
11 Yahova adapitiriza kuyankhula na Mose kuti:
12 “Yankhula na Aizirayeli, ndipo uwauze kuti: ‘Mumbachite ivi peno nkazi wachimwira mwamuna wake nkuchita vosakhulupirika
13 mwakuti mwamuna munango wagona naye, koma mwamuna wake alibe kudziwa komasoti palibe aliyese yemwe wadziwa. Mumbachite vimwivi peno nkazi muyo wadzipsyipiza, koma palibe munthu yemwe angachitire umboni va nkhani mwiyo komasoti alibe kuphatiwa:
14 Peno mwamuna wake ankuchita ntsanje ndipo ankukaikira kuti nkazi wake wachita chigololo nkudzipsyipiza pomwe nkazi muyo wachitadi chigololo, panango peno ankuchita ntsanje nkumbakaikira kuti nkazi wake wachita chigololo pomwe iye alibe kuchita,
15 mwamuna muyo ambatenge nkazi muyo nkuyenda naye kwa wantsembe. Ambayende na ntsembe ya nkazi muyo ya ufa wonyodoka wokwana gawo ibodzi pa magawo 10 ya mpimo wa efa.* Ufa muyo osati ambauthire mafuta panango lubani ndawa ni ntsembe yambewu ya ntsanje, ntsembe yambewu yokumbusa chophonya.
16 Wantsembe muyo ambatenge nkazi muyo nkumuimiririsa pamaso pa Yahova.
17 Patsogolo pake ambatenge madzi yopatulika mu chombo cha dothi. Ambatengeko pomwe pfumbi yapasi muchihema, nkuithira m’madzi mwayo.
18 Manje wantsembe muyo ambaimiririse nkazi muyo pamaso pa Yahova nkumumasula chovala cha kunsolo kwake. Patsogolo pake, ambatenge ntsembe yambewu yachikumbuso, yomwe ni ntsembe yambewu yantsanje, nkuiikha m’manja mwa nkazi muyo. Wantsembe muyo ambatenge madzi yowawa m’manja mwake yobweresa temberero.
19 Wantsembe muyo ambalumbirise nkazi muyo kuti: “Peno mwamuna aliyese alibe kugona nawe ndipo peno ulibe kuchita vosakhulupirika kwa mwamuna wako pomwe uli m’manja mwake nkuchita chopsyipiza chirichose, madzi yowawa yobweresa temberero aya osati yakupweteke.
20 Koma peno udachitira vosakhulupirika mwamuna wako pomwe uli m’manja mwake nkudzipsyipiza, mwakuti wagona na mwamuna munango—”*
21 Wantsembe muyo ambalumbirise nkazi muyo na lumbiro yomwe ikuphatanidzapo temberero. Iye ambauze nkazi muyo kuti: “Yahova akuikhe kukhala chitsanzo cha temberero na lumbiro mwiyi pakati pa wanthu wa ntundu wako. Yahova achite vimwivo pakufotesa* ntchafu* yako na kutupisa mimba yako.
22 Madzi ya temberero mwaya yangene m’matumbo mwako kuti yakatupise mimba yako na kufotesa* ntchafu* yako.” Ndipo nkazi muyo ambadawire kuti: “Vikhale teno! Vikhale teno!”*
23 Patsogolo pake wantsembe muyo ambanembe matemberero mwaya m’bukhu ndipo ambayapfudze m’madzi yowawa mwayo.
24 Akachita teno ambamwese nkazi muyo madzi yowawa ya temberero mwayo, ndipo madzi mwayo yakangena mthupi mwake, nkazi muyo ambabve kuwawa.
25 Manje wantsembe muyo ambatenge ntsembe yambewu yantsanje yomwe iri m’manja mwa nkazi muyo, nkuifambisa uku na uku pamaso pa Yahova. Akachita teno, ambaibwerese pafupi na guwa yantsembe.
26 Wantsembe muyo ambatapeko ntsembe yambewu mwiyo kuimira ntsembe yose mwiyo, nkuiwotcha paguwa yantsembe. Patsogolo pake, ambapase nkazi muyo madzi mwayo kuti amwe.
27 Akamumwesa madzi mwayo, peno iye adadzipsyipiza pakugona na mwamuna munango, madzi ya temberero mwayo yambakhale yowawa yakangena mthupi mwake. Vikakhala teno mimba yake imbatupe ndipo ntchafu* yake imbafote.* Nkazi muyo ambakhale chitsanzo cha munthu wotembererewa pakati pa wanthu wa ntundu wake.
28 Koma peno nkazi muyo ni wochena ndawa alibe kudzipsyipiza, chilango mwicho osati chimbamugwere, ndipo ambakhale na mimba nkubereka wana.
29 Mwiyi ni lamulo pankhani ya ntsanje, pomwe nkazi wachitira mwamuna wake vosakhulupirika, nkudzipsyipiza ali m’manja mwa mwamuna wake muyo,
30 panango peno mwamuna ankuchita ntsanje ndipo ankuganiza kuti nkazi wake alibe kufamba bwino. Vikakhala teno, mwamuna muyo ambabwere na nkazi wake pamaso pa Yahova, ndipo wantsembe ambachite vose vofunika pa nkazi muyo mobverana na lamulo mwiyi.
31 Mwamuna muyo adzakhale alibe mulandu, koma nkazi wake adzalangiwe ndawa ya kuphonya kwake.’”
Mawu ya m’nyantsi
^ Gawo ibodzi pa magawo 10 ya mpimo wa efa ni yolinganan na malitru 2,2. Onani vakumapeto B14.
^ Kankwekwe kamwaka kankuwonesa kuti mawu mwaya yamalira panjira.
^ Vingachitike kuti vimwevi vimbatanthauza kuti ambakhala wosabereka.
^ Vinkuwoneka kuti mawu yakuti “ntchafu,” yankuyimira vidzo voberekera.
^ Vingachitike kuti vimwevi vimbatanthauza kuti ambakhala wosabereka.
^ Vinkuwoneka kuti mawu yakuti “ntchafu,” yankuyimira vidzo voberekera.
^ Muchiyankhulo choyambirira adati: “Ame! Ame!”
^ Vinkuwoneka kuti mawu yakuti “ntchafu,” yankuyimira vidzo voberekera.
^ Vingachitike kuti vimwevi vimbatanthauza kuti ambakhala wosabereka.
