Numeri 1:1-54
1 Yahova adayankhula na Mose muchipululu cha Sinai, muchihema chogumanako. Adayankhula naye pantsiku yoyamba ya mwezi wachiwiri mu gole yachiwiri, padabula mudziko ya Iguputo. Iye adati:
2 “Uwerenge gulu yose ya Aizirayeli* mobverana na mabanja yawo, pakutewedza nyumba za azibereki wawo, nkunemba madzina yawo. Uwerenge amuna wose, m’bodzim’bodzi.
3 Iwepo na Aroni muwachite kanembera mobverana na magulu yawo.* Uwerenge wose kuyambira wa magole 20 kuyenda kutsogolo, omwe ni oyenerera kuyenda ku nkhondo mu Izirayeli.
4 Mutenge amuna anango kuti akuthandizeni. Mutenge mwamuna m’bodzi pa dzinza iriyose ndipo akhale mtsogoleri wa banja ya azibereki wake.
5 Madzina ya amuna omwe akuthandizeni ni aya: Kuchokera ku dzinza ya Rubeni, Elizuri mwana wa Sedeuri,
6 kuchokera ku dzinza ya Simiyoni, Selumiyeli mwana wa Zurisadai,
7 kuchokera ku dzinza ya Yuda, Naasoni mwana wa Aminadabu,
8 kuchokera ku dzinza ya Isakara, Netaneli mwana wa Zuwara,
9 kuchokera ku dzinza ya Zebuloni, Eliyabu mwana wa Heloni.
10 Pa wana wa Yosefe: Kuchokera ku dzinza ya Efuraimu, Elisama mwana wa Amihudi, kuchokera ku dzinza ya Manase, Gamaliyeli mwana wa Pedazuri,
11 kuchokera ku dzinza ya Benjamim, Abidana mwana wa Gidiyoni,
12 kuchokera ku dzinza ya Dani, Ahiyezeri mwana wa Amisadai,
13 kuchokera ku dzinza ya Aseri, Pagiyeli mwana wa Okirani,
14 kuchokera ku dzinza ya Gadi, Eliyasafu mwana wa Deyueli,
15 kuchokera ku dzinza ya Nafitali, Ahira mwana wa Enani.
16 Mwawa ndiwo adasankhuliwa pagulu ya wanthu mwawo. Iwo enze atsogoleri wa madzinza ya azibereki wawo, atsogoleri wa wanthu mamidyau mu Izirayeli.”
17 Pamwapo Mose na Aroni adatenga amuna mwawa, omwe madzina yawo yadatomolewa.
18 Iwo adasonkhanisa wanthu wose pantsiku yoyamba ya mwezi wachiwiri kuti munthu aliyese amuchite kanembera mobverana na mabanja yawo na nyumba za azibereki wawo. Adawanemba madzina kuyambira wa magole 20 kuyenda kutsogolo
19 mobverana na vomwe Yahova adalamula Mose. Pamwapo iye adawerenga wanthu mwawo muchipululu cha Sinai.
20 Mbadwa za Rubeni, mwana woyamba wa Izirayeli, adazinemba madzina m’bodzim’bodzi. Adazinemba mobverana na mabanja yawo na nyumba za azibereki wawo. Adawerenga amuna wose kuyambira wa magole 20 kuyenda kutsogolo, omwe enze oyenerera kuyenda kunkhondo.
21 Wanthu wose wa dzinza ya Rubeni omwe adanembewa madzina adakwana 46 500.
22 Mbadwa za Simiyoni, adazinemba madzina m’bodzim’bodzi. Adazinemba mobverana na mabanja yawo na nyumba za azibereki wawo. Adawerenga amuna wose kuyambira wa magole 20 kuyenda kutsogolo, omwe enze oyenerera kuyenda kunkhondo.
23 Wanthu wose wa dzinza ya Simiyoni omwe adanembewa madzina enzepo 59 300.
24 Mbadwa za Gadi adazinemba madzina mobverana na mabanja yawo komasoti nyumba za azibereki wawo. Adawerenga amuna wose kuyambira wa magole 20 kuyenda kutsogolo, omwe enze oyenerera kuyenda kunkhondo.
25 Wanthu wose wa dzinza ya Gadi omwe adanembewa madzina enzepo 45 650.
26 Mbadwa za Yuda, adazinemba madzina mobverana na mabanja yawo komasoti nyumba za azibereki wawo. Adawerenga amuna wose kuyambira wa magole 20 kuyenda kutsogolo, omwe enze oyenerera kuyenda kunkhondo.
27 Wanthu wose wa dzinza ya Yuda omwe adanembewa madzina enzepo 74 600.
28 Mbadwa za Isakara, adazinemba madzina mobverana na mabanja yawo komasoti nyumba za azibereki wawo. Adawerenga amuna wose kuyambira wa magole 20 kuyenda kutsogolo, omwe enze oyenerera kuyenda kunkhondo.
29 Wanthu wose wa dzinza ya Isakara omwe adanembewa madzina enzepo 54 400.
30 Mbadwa za Zebuloni, adazinemba madzina mobverana na mabanja yawo komasoti nyumba za azibereki wawo. Adawerenga amuna wose kuyambira wa magole 20 kuyenda kutsogolo, omwe enze oyenerera kuyenda kunkhondo.
31 Wanthu wose wa dzinza ya Zebuloni omwe adanembewa madzina enzepo 57 400.
32 Mbadwa za Yosefe za dzinza ya Efuraimu adazinemba madzina mobverana na mabanja yawo komasoti nyumba za azibereki wawo. Adawerenga amuna wose kuyambira wa magole 20 kuyenda kutsogolo, omwe enze oyenerera kuyenda kunkhondo.
33 Wanthu wose wa dzinza ya Efuraimu omwe adanembewa madzina enzepo 40 500.
34 Mbadwa za Manase adazinemba madzina mobverana na mabanja yawo komasoti nyumba za azibereki wawo. Adawerenga amuna wose wa magole 20 kuyenda kutsogolo, omwe enze oyenerera kuyenda kunkhondo.
35 Wanthu wose wa dzinza ya Manase omwe adanembewa madzina enzepo 32 200.
36 Mbadwa za Benjamim, adazinemba madzina mobverana na mabanja yawo komasoti nyumba za azibereki wawo. Adawerenga amuna wose kuyambira wa magole 20 kuyenda kutsogolo, omwe enze oyenerera kuyenda kunkhondo.
37 Wanthu wose wa dzinza ya Benjamim omwe adanembewa madzina enzepo 35 400.
38 Mbadwa za Dani, adazinemba madzina mobverana na mabanja yawo komasoti nyumba za azibereki wawo. Adawerenga amuna wose kuyambira wa magole 20 kuyenda kutsogolo, omwe enze oyenerera kuyenda kunkhondo.
39 Wanthu wose wa dzinza ya Dani omwe adanembewa madzina enzepo 62 700.
40 Mbadwa za Aseri, adazinemba madzina mobverana na mabanja yawo komasoti nyumba za azibereki wawo. Adawerenga amuna wose kuyambira wa magole 20 kuyenda kutsogolo, omwe enze oyenerera kuyenda kunkhondo.
41 Wanthu wose wa dzinza ya Aseri omwe adanembewa madzina enzepo 41 500.
42 Mbadwa za Nafitali, adazinemba madzina mobverana na mabanja yawo komasoti nyumba za azibereki wawo. Adawerenga amuna wose wa magole 20 kuyenda kutsogolo, omwe enze oyenerera kuyenda kunkhondo.
43 Wanthu wose wa dzinza ya Nafitali omwe adanembewa madzina enzepo 53 400.
44 Mwawa ni amuna omwe Mose na Aroni adawanemba madzina mothandiziwa na atsogoleri 12 wa Izirayeli. Mtsogoleri aliyese ambaimira nyumba ya azibereki wake.
45 Aizirayeli wose kuyambira wa magole 20 kuyenda kutsogolo, omwe enze oyenerera kuyenda kunkhondo mu Izirayeli, adanembewa madzina mobverana na nyumba za azibereki wawo.
46 Wanthu wose omwe adanembewa madzina adakwana 603 550.
47 Koma Alevi, mobverana na dzinza ya azibereki wawo, alibe kuwawerengera kubodzi na wanthu anango.
48 Pamwapo Yahova adauza Mose kuti:
49 “Wanthu wa dzinza ya Levi wokha ayi kuwanemba madzina yawo, ndipo ayi kuphatanidza chiwerengero chawo pabodzi na cha Aizirayeli anango.
50 Uikhe Alevi kuti ambanyang’anire chihema cha Umboni na vombo vake vose komasoti chirichose cha muchihema mumo. Iwo ndiwo wati ambanyamule chihema mwicho na vombo vake vose. Ndiwo wati ambatumikire pachihema mwapo ndipo ambamange misasa yawo mozungulira chihema mwicho.
51 Nthawe zose mukambafulusa chihema, Alevi mwawo ambachipasule, ndipo mukafika pamalo yakuti mumange nsasa, Alevi ndiwo wati ambamange chihema mwicho. Munthu aliyese yemwe ni Mulevilini ambaphewe akafenderera chihema mwicho.
52 Aizirayeli ambamange matenti yawo mobverana na nsasa wawo, munthu aliyese mobverana na gulu yake ya madzinza yatatu, pakutewedza magulu yawo.*
53 Alevi ambamange matenti yawo mozungulira chihema cha Umboni kuti ukali wa Mulungu osati ugakire Aizirayeli. Alevi mwawo ndiwo anaudindo wosamalira* chihema cha Umboni mwicho.”
54 Aizirayeli adachita vose mobverana na vomwe Yahova adalamula Mose. Adachitadi vimwivo.
