Numeri 31:1-54
31 Manje Yahova adauza Mose kuti:
2 “Uwabwezere Amidiyani ndawa ya vomwe adachitira Aizirayeli. Patsogolo pake udzaikhiwe m’manda ninge momwe vidakhalira na azibereki wako.”*
3 Pamwapo Mose adayankhula na wanthu mwawo kuti: “Konzekeresani amuna pakati panu kuti ayende kukamenyana* na Amidiyani, ndipo mukapereke chilango cha Yahova kwa Amidiyani mwawo pakubwezera vomwe adachita.
4 Mutenge amuna 1000 pa dzinza iriyose ya Izirayeli kuti ayende kunkhondo.”
5 Kuchokera pa wanthu mamidyau ya Aizirayeli mwawo, adatenga amuna 1000 pa dzinza iriyose. Amuna wose oyenda kunkhondo* adakwana 12 000.
6 Manje Mose adatumiza amuna mwawo kunkhondo, amuna 1000 pa dzinza iriyose. Adawatumiza pabodzi na Pinihasi, mwana wa wantsembe Eleazara. Pinihasi adanyamula vombo vopatulika pabodzi na malupenga yoperekera vizindikiro.
7 Amuna mwawo adayenda kukamenyana na Amidiyani, mobverana na vomwe Yahova adalamula Mose, ndipo adapha mwamuna aliyese.
8 Wanthu omwe adaphewa ankuphatanidzapo mafumu yashanu ya Chimidiyani. Mafumu mwayo yenze Evi, Rekemu, zuri, Hura na Reba. Komasoti adapha Balamu mwana wa Beori na chibemba.
9 Koma Aizirayeli adaphata akazi wa Chimidiyani na wana wawo nkuwatenga kuyenda nawo kwawo. Adatenga pomwe vipfuwo vawo vose na chuma chawo chose.
10 Mathaundi yawo yose yomwe ambakhala komasoti misasa yawo yose* adayashoka na moto.
11 Adatenga vinthu vawo vose, kuphatanidzapo wanthu na vipfuwo kubodzi.
12 Patsogolo pake adatenga wanthu omwe adawaphata pabodzi na vinthu vinango vose nkuyenda nawo kwa Mose, wantsembe Eleazara na gulu yose ya Aizirayeli, kunsasa wawo womwe wenze muchipululu cha Mowabu, pafupi na kamadzi ka Yorodano, ku Yeriko.
13 Padafika nawo kumuko, Mose na wantsembe Eleazara, pabodzi na atsogoleri wose wa wanthu mwawo, adabula nkukagumana nawo kunja kwa nsasa.
14 Koma Mose adakalipa maninge na amuna omwe ambatsogolera masocha, atsogoleri wa masocha 1000 na atsogoleri wa masocha 100, omwe ambachokera kunkhondo.
15 Mose adawabvunza kuti: “Ko akazi wose mwawasiya na moyo?
16 Pale akazi mwawa ndiwo adatewedza mawu ya Balamu nkunyengerera Aizirayeli kuti achimwire Yahova pa vomwe vidachitika ku Peori, mwakuti muliri udagwera gulu ya wanthu wa Yahova.
17 Manje phani mwana mwamuna aliyese pakati pa wana mwawa, ndipo muphe nkazi aliyese yemwe adagonako kale na mwamuna.
18 Koma wana akazi wose ang’onoang’ono omwe akalibe kugonako na mwamuna ayi kuwapha.
19 Mumange nsasa kunja kwa nsasa muyu, ndipo mukhalemo kwa ntsiku 7. Aliyese yemwe wapha munthu na aliyese yemwe wagumirira chitanda cha munthu wophewa, adzichenese pantsiku yachitatu na pantsiku yachi 7. Mudzichenese pomwe pabodzi na wanthu mwawo wamwaphata.
20 Muchenese chovala chirichose, chinthu chirichose chachikumba, chirichose chokonzewa na ukuse wa mbuzi na chirichose chokonzewa na muti.”
21 Manje wantsembe Eleazara adauza masocha yomwe yadayenda kunkhondo yale kuti: “Bvani vomwe Yahova walamula Mose:
22 ‘Vinthu vagolide, vasiliva, vakobre,* vasimbi, vantobve na vashumbo,*
23 chirichose chomwe chingapselini na moto chipite na pamoto kuti chikhale chochena. Patsogolo pake mumbachichenese pomwe na madzi. Koma chirichose chomwe chingapse na moto mumbachichenese na madzi.
24 Mudzawatche vovala vanu pantsiku yachi 7 kuti mudzakhale ochena, patsogolo pake mudzangene munsasa.’”
25 Patsogolo pake Yahova adauza Mose kuti:
26 “Iwepo na wantsembe Eleazara na atsogoleri wa gulu mwiyo, muwerenge vinthu vose vomwe avitenga kunkhondo. Muwerenge wanthu na vipfuwo kubodzi.
27 Vinthu mwivo muvigawe pawiri. Hafu iperekewe kwa masocha yomwe yenze yadayenda kunkhondo, ndipo hafu inango iperekewe kwa gulu yose ya wanthu mwawo.
28 Pa vinthu vomwe vaperekewa kwa masocha yomwe yenze yadayenda kunkhondo, mutengepo chamoyo chibodzi pa vamoyo 500 virivose, pa wanthu, ng’ombe, abulu na nkhosa kuti vikhale mtsonkho woperekewa kwa Yahova.
29 Vimwivi muvitenge pa hafu yomwe iwo atambire ndipo muvipereke kwa wantsembe Eleazara ninge chopereka kwa Yahova.
30 Pa hafu yomwe Aizirayeli atambire, mutengepo chamoyo chibodzi pa vamoyo 50 virivose, pa wanthu, ng’ombe, abulu, nkhosa na pa vipfuwo vakhaindi iriyose. Muvipereke kwa Alevi, omwe aphata basa zobverana na utumiki wa pachihema cha Yahova.”
31 Manje Mose na wantsembe Eleazara adachita mobverana na vomwe Yahova adalamula Mose.
32 Pa vinthu vose vomwe wanthu omwe adayenda kunkhondo mwawo adabweresa, penze nkhosa 675 000,
33 ng’ombe 72 000
34 na abulu 61 000.
35 Akazi omwe enze akalibe agonako na mwamuna enzepo 32 000.
36 Pa hafu yomwe idaperekewa kwa amuna omwe adayenda kunkhondo penze nkhosa 337 500.
37 Nkhosa zomwe adazipereka kwa Yahova ninge mtsonkho zenzepo 675.
38 Ng’ombe zenzepo 36 000, ndipo pa ng’ombe zimwizi, 72 adazipereka kwa Yahova ninge mtsonkho.
39 Abulu enzepo 30 500, ndipo 61 adawapereka kwa Yahova ninge mtsonkho.
40 Wanthu enzepo 16 000, ndipo 32 adaperekewa kwa Yahova ninge mtsonkho.
41 Manje Mose adapereka mtsonkho muyo kwa wantsembe Eleazara ninge chopereka kwa Yahova, mobverana na vomwe Yahova adalamula Mose.
42 Pa hafu yomwe Mose adapereka kwa Aizirayeli, ya vinthu vomwe wanthu adabweresa kuchokera kunkhondo,
43 penze nkhosa zokwana 337 500,
44 ng’ombe 36 000,
45 abulu 30 500,
46 ndipo wanthu enzepo 16 000.
47 Manje pa hafu yomwe adapereka kwa Aizirayeli mwawo, Mose adatengapo chamoyo chibodzi pa vamoyo 50 virivose, pa wanthu na pa vipfuwo. Vinthu vimwivi adavipereka kwa Alevi omwe ambatumikira pachihema cha Yahova, mobverana na vomwe Yahova adalamula Mose.
48 Patsogolo pake atsogoleri wa mamidyau ya masocha adafika kwa Mose. Mwawa enze atsogoleri wa masocha 1000 na atsogoleri wa masocha 100.
49 Iwo adauza Mose kuti: “Isepano atumiki wanu tawerenga amuna wose wankhondo omwe tinkuwanyang’anira, ndipo palibe ne m’bodzi yemwe ankushota.
50 Manje bvumani kuti aliyese wa isepano apereke vinthu vomwe wabwera navo ninge chopereka kwa Yahova. Tabwera na vinthu vagolide, tumatcheni tovala m’minyendo, vizerenga, ma aneli yachifumu, mphete na vinthu vinango vodzikhuzisira. Tipereke vinthu vimwivi kwa Yahova kuti tipsyimphirize machimo yathu.”
51 Manje Mose na wantsembe Eleazara adatambira golide muyo kwa iwo, kutanthauza vodzikhuzisira vose vodula maninge.
52 Golide wose womwe adaupereka kwa Yahova udakwana masekeli* 16 750. Muyu ni golide yemwe atsogoleri wa masocha 1000 na atsogoleri wa masocha 100 adapereka.
53 Mwamuna aliyese yemwe adayenda kunkhondo adabwerako na vinthu.
54 Manje Mose na wantsembe Eleazara adatambira vinthu vagolide mwivo kwa atsogoleri wa masocha 1000, na kwa atsogoleri wa masocha 100. Ndipo vinthu vagolide mwivo adaviikha muchihema chogumanako, kuti vikhale chikumbuso kwa Aizirayeli pamaso pa Yahova.
Mawu ya m’nyantsi
^ Muchiyankhulo choyambirira adati: “udzagone pabodzi na azibereki wako.”
^ Panango kuti: “akhale mugulu ya masocha yoyenda kukamenyana.”
^ Panango kuti: “omwe enze mugulu ya masocha.”
^ Panango kuti: “misasa yawo yose yokhala na mipanda.”
^ Panango kuti: “vankuwa.”
^ Shumbo ni chinthu chowoneka ninge ntobve.
^ Sekeli ibodzi yenze yolingana na magrama 11,4. Onani vakumapeto B14.
