Numeri 12:1-16
12 Manje Miriamu na Aroni adayamba kumunena Mose ndawa ya nkazi wa Chikusi yemwe adamulowola.
2 Iwo ambanena kuti: “Ko Yahova wayankhula kupitira mwa Mose yekha? Ko alibe kuyankhulambo kupitira mwa isepano?” Koma Yahova ambatetekera.
3 Mose wenze munthu wopfatsa maninge kuposha wanthu wose* omwe enze padziko yapasi.
4 Mwadzidzidzi Yahova adauza Mose, Aroni na Miriamu kuti: “Atatu imwe nyamukani, muyende kuchihema chogumanako.” Pamwapo wose atatu adanyamuka nkuyenda.
5 Manje Yahova adabuluka muchipilala cha ntambo nkuimirira pansuwo wa chihema chogumanako. Patsogolo pake adachemera Aroni na Miriamu ndipo wose adayenda.
6 Iye adawauza kuti: “Tetekerani mawu yangu. Padakakhala mneneri wa Yahova pakati panu, nidakamudziwisa va inepano m’masomphenya, ndipo nidakayankhula naye m’maloto.
7 Koma niribe kuchita vimwivo na ntumiki wangu Mose. Naikha wanthu wangu wose Aizirayeli m’manja mwake.*
8 Niyankhula naye maso na maso,* nkumuuza vinthu mobveka bwino osati mophiphirisa, ndipo awona maonekedwe ya Yahova. Manje ndawa chani mulibe kuchita mantha kumunena Mose ntumiki wangu?”
9 Pamwapo Yahova adakalipa maninge nkuchokapo.
10 Ntambo ule udachoka padzulu pa chihema mwicho. Pamwapoletu, Miriamu adachita khate ichena maninge. Patsogolo pake Aroni padachungunuka nkumunyang’ana Miriamu, adaona kuti wachita khate.
11 Nthawe mwiyoletu Aroni adagwigwirira Mose kuti: “Pepani mbuya wangu, pulizi, ayi kutilanga ndawa ya chimo yomwe tachita iyi. Nkupusa kwatachita uku.
12 Pulizi, ayi kumusiya Miriamu kuti akhale ninge mwana wobadwa wakufa, yemwe mnyompfu wake ni wowola mbali inango.”
13 Pamwapo Mose adayamba kukuwira Yahova kuti: “Pulizi Mulungu wangu, mupoleseni pulizi!”
14 Yahova adauza Mose kuti: “Ko ababa wake adakamuthira mata kunkhope, adakakhalalini wonyozeka kwa ntsiku 7? Manje mubuliseni akakhale kunja kwa nsasa kwa ntsiku 7, patsogolo pake mudzamungenese pomwe munsasa mumo.”
15 Pamwapo Miriamu adabulisiwa nkukakhala kunja kwa nsasa kwa ntsiku 7, ndipo wanthu mwawo alibe kufuluka mpakana pomwe Miriamu adamubweresa pomwe munsasa.
16 Patsogolo pake wanthu mwawo adachoka ku Hazeroti, nkukamanga nsasa muchipululu cha Parana.
