Numeri 24:1-25
24 Balamu padawona kuti Yahova ankufuna* kudalisa Aizirayeli, alibe kuyenda pomwe kukafagafaga njira yakuti awalodzere, koma adanyang’ana kuchipululu.
2 Balamu padakwiza maso yake nkuona Aizirayeli ali m’misasa mobverana na madzinza yawo, mzimu wa Mulungu udafika pa iye.
3 Patsogolo pake adayankhula mwa ndakatulo kuti:
“Mawu ya Balamu mwana wa Beori,Mawu ya mwamuna yemwe maso yake yafunguka,
4 Mawu ya munthu yemwe wabva mawu ya Mulungu,Yemwe waona masomphenya ya Wamphanvu zose,Yemwe wagwada pasi maso yake yali yofungula. Mawu yake ni yakuti:
5 Ona kukhuza kwa matenti yako, iwe Yakobo,Na kukhuza kwa malo yako yokhala, iwe Izirayeli!
6 Yandanda nkukafika kutali ninge vigwa,Ninge minda m’mphepete mwa kamadzi.
Ninge miti ya aloye yomwe Yahova adabzala,Ninge miti ya mikungudza m’mphepete mwa madzi.
7 Madzi yodzadza mitsuko yake yawiri yankupitiriza kutaikira pasi,Ndipo mbewu* yake yabzaliwa m’mphepete mwa madzi yazinji.
Nayombo mpfumu yake idzakhale yamphanvu kuposha Agagi,Ndipo ufumu wake udzakwiziwe.
8 Mulungu ankumubulisa mu Iguputo.
Iye ali ninge minyanga ya ng’ombe imuna yam’thengo.
Adzadzonge wanthu wa makhaindi yanango omwe ankumujerera,Adzakungudzule* mabonzo yawo, ndipo adzawaphwanye na mikondo yawo.
9 Iye wagwada pasi, wagona pasi ninge mphondolo,Ninge mphondolo, mbani angayese kumumusa?
Yemwe ankudalisa iwepo adzadalisiwe,Ndipo yemwe ankukutemberera, adzatembererewe.”
10 Patsogolo pake Balaki adakalipa naye Balamu. Manje Balaki adawombera m’manja mokalipa nkuuza Balamu kuti: “Nidakuchemera kuti udzatemberere azondi wangu, koma iwepo wawadalisa maulendo yatatu yose mwaya.
11 Choka pano mbayenda kwanu. Ine nimbafuna kukupasa malipiro, manje ona! Yahova wakukangisa kutambira malipiro.”
12 Balamu adadawira Balaki kuti: “Ko wanthu wamudatuma wale niribe kuwauza kuti:
13 ‘Olo Balaki achinipasa nyumba yake yodzala na siliva na golide, ningachitelini chirichose chomwe ninkufuna,* peno chabwino panango choipa chosabverana na vomwe Yahova walamula? Ko niribe kunena kuti nikayankhule vinthu vokha vomwe Yahova akaniuze’?
14 Manje ninkuyenda kwa wanthu wa khaindi yangu. Koma bwerani nikuuzeni vomwe wanthu mwawa adzachitire wanthu wanu kutsogolo.”
15 Patsogolo pake adayankhula mwa ndakatulo kuti:
“Mawu ya Balamu mwana wa Beori,Mawu ya mwana mwamuna yemwe maso yake ni yofungula,
16 Mawu ya munthu yemwe wabva mawu ya Mulungu,Yemwe ankudziwa Wam’dzulum’dzulu,Adaona masomphenya ya Wamphanvu zose,Ali gwade pasi, maso yake yali yofungula. Mawu yake yankufotokoza kuti:
17 Nidzamuwone, koma osati manjemanje;Nidzamunyang’ane, koma osati manjemanje.
Nyenyezi idzabule mwa Yakobo,Mpsyimbo yachifumu idzabule mu Izirayeli.
Ndipo iye adzaphwanyedi nkuma wa MowabuNa misolo ya masocha yose yankhanza.
18 Edomu adzatengewe,Shuwadi Seiri adzatengewe na azondi wake,Pomwe Izirayeli ankuwonesa kulimba ntima kwake.
19 Munango adzabule mwa Yakobo nkukawina,Ndipo adzadzonge aliyese yemwe wapulumuka mu thaundi mumo.”
20 Balamu padawona Amaleki, adapitiriza mawu yake ya ndakatulo kuti:
“Amaleki wenze woyamba pa wanthu wamakhaindi yanango,*Koma mapeto yake adzadzongewe.”
21 Padawona Akeni, adapitiriza kuyankhula mwa ndakatulo kuti:
“Mukhala otetezeka, m’malo yanu yokhala ya pamwala.
22 Koma Kayini* adzashokewe na moto.
Ko padzapite nthawe itali tani Asuri akalibe kukuphata nkuyenda nawe kudziko inango?”
23 Adapitiriza kuyankhula mwa ndakatulo kuti:
Maine! Ni mbani wati adzapulumuke Mulungu akadzachita vimwivi?
24 Barko idzafike kumalo yotsamisira mabarko ya Kitimu,Ndipo iwo adzadzudze Asuri,Adzadzudze Ebere.
Koma iyembo adzadzongeweretu.*
25 Patsogolo pake Balamu adanyamuka nkubwerera kwawo. Nayembo Balaki adayenda kwawo.
Mawu ya m’nyantsi
^ Muchiyankhulo choyambirira adati: “padaona kuti ni vabwino m’maso mwa Yahova.”
^ Panango kuti: “mbadwa.”
^ “Kukungudzula” ni kuchoseratu nyama yose ku bonzo tikambadya nyama.
^ Muchiyankhulo choyambirira adati: “chochokera muntima mwangu.”
^ Kutanthauza kuti enze oyamba kumenyana na Aizirayeli padabula mu dziko ya Iguputo.”
^ “Kayini” ankuimira dzinza ya “Akeni.”
^ Panango kuti: “adzachenekewe.”
