Numeri 36:1-13
-
Lamulo yonena va ukwati wa akazi omwe ambatambira chuma cha banja (1-13)
36 Atsogoleri wa mabanja omwe adachokera kwa Giliyadi mwana wa Makiri, mwana wa Manase, ochokera kumabanja ya wana wa Yosefe, adayenda kukayankhula na Mose na akuluakulu omwe enze atsogoleri wa Aizirayeli.
2 Iwo adati: “Pale Yahova adakulamulani imwepo mbuya wathu kuti mugawe dziko mwiyi pakuchita maere kuti ikhale ya Aizirayeli. Yahova adakulamulani pomwe kuti mupereke malo ya m’bale wathu Tselofekadi kwa wana wake akazi.
3 Peno wana akazi mwawa angalowolewe na madzinza yanango ya Aizirayeli, ndiye kuti malo yawo yadzachosewe kwa azibereki wathu, ndipo yadzaingiziriwe kumalo ya dzinza ya aliyese wati adzawalowole. Vikadzateno ndiye kuti malo yathu yomwe tidapasiwa yadzachepe.
4 Manje gole ya Ufulu ya Aizirayeli ikadzafika, malo ya akazi mwawa yadzachosewe kumalo ya dzinza ya azibereki wathu, ndipo yadzaingiziriwe kumalo ya dzinza ya aliyese wa iwo komwe adzalowolewe ndipo yadzakhale ya dzinza mwiyo mpakana kalekale.”
5 Manje Mose adauza Aizirayeli vomwe Yahova adamuuza kuti: “Vomwe dzinza ya wana wa Yosefe inkunena ni vobveka.
6 Vomwe Yahova walamula pakunena va wana akazi wa Tselofekadi ni vakuti: ‘Iwo angalowodwe na aliyese yemwe angafune. Koma afunika kulowodwa na mwamuna wa dzinza ya azibereki wawo okha.
7 Chuma chabanja cha Aizirayeli osati chimbachosewe kudzinza inango kuyenda kudzinza inango. Muizirayeli aliyese afunika kusunga chuma cha dzinza ya azibereki wake.
8 Ndipomwapa mwana nkazi aliyese yemwe watambirako chuma chabanja pakati pa madzinza ya Aizirayeli ambalowodwe na mwamuna wa m’banja ya dzinza ya azibereki wake, kuti Muizirayeli aliyese ambasunge chuma chabanja chochokera kwa azibereki wake.
9 Chuma chabanja chirichose osati chimbachosewe kudzinza inango kuyenda kudzinza inango. Dzinza iriyose imbasunge chuma chake chabanja.”
10 Wana akazi wa Tselofekadi adachitadi vomwe Yahova adalamula Mose.
11 Pamwapo Mala, Tiriza, Hogila, Milika na Nowa, wana akazi wa Tselofekadi, adalowodwa na wana wa azibale wa ababa wawo.
12 Iwo adalowodwa na amuna ochokera m’mabanja ya wana wa Manase mwana wa Yosefe kuti chuma chawo osati chichoke ku dzinza ya banja ya ababa wawo.
13 Yamwaya ni malamulo na vigamulo va Yahova, vomwe adapereka kwa Aizirayeli kupitira mwa Mose ku Yeriko, muchipululu cha Mowabu, pafupi na kamadzi ka Yorodano.
